ހުސްވި އަހަރަކީ މިފަހުގެ ތާރީހެއްގައި ޕާކިސްތާނަށް ކުރިމަތިވި އެންމެ ނުރައްކާތެރި އަހަރުކަމަށް ސައުތު އޭޝިއަން ޓެރަރިޒަމް ޕޯޓަލުން ނެރުނު ރިޕޯޓުގައި ބުނެފިއެވެ.

އަވަށްޓެރި އަފްޣާނިސްތާނާއެކު އޮތް ގުޅުން ގޯސްވަމުންދިޔަ ދަނޑިވަޅެއްގައި، ބަޑީގެ ހަމަލާތަކާއި، ވައިގެ ހަމަލާތަކާއި އަދި އަމިއްލައަށް މަރުވެގެން ދިން ބޮމުގެ ހަމަލާތަކާއެކު 2025 ވަނަ އަހަރު ވެފައިވަނީ ފާއިތުވި ދިހަ އަހަރުތެރޭގައި ޕާކިސްތާނަށް ކުރިމަތިވި އެންމެ ނުރައްކާތެރި އަހަރަށް ކަމަށް މި ރިޕޯޓްގައި ވަނީ ބުނެފައެވެ.

'ސައުތު އޭޝިއަން ޓެރަރިޒަމް ޕޯޓަލް' އިން އާންމުކުރި އެންމެ ފަހުގެ ތަފާސްހިސާބުތަކަށް ބަލާއިރު، ހަނގުރާމަވެރިންގެ ހަމަލާތަކުގައި މުޅި ގައުމުން މަރުވި މީހުންގެ އަދަދު ވަނީ 3،967 އަށް އަރާފައެވެ. މިއީ 2015 ވަނަ އަހަރަށްފަހު މި އަދަދު މިހާ މައްޗަށް ދިޔަ ފުރަތަމަ ފަހަރެވެ. ޑިސެމްބަރު 27 ގެ ނިޔަލަށް، ބޮން ގޮއްވުމާއި ބަޑީގެ ހަމަލާތައް ހިމެނޭގޮތަށް ޖުމްލަ 1،070 ހަމަނުޖެހުން ހިނގާފައިވާއިރު، މީގެ ތެރޭގައި އާންމުންނާއި، ސިފައިންނާއި އަދި ހަނގުރާމަވެރިން މަރުވެފައިވެއެވެ.

ޕާކިސްތާނުން ތުހުމަތުކުރާ ގޮތުގައި، އަފްޣާނިސްތާނުގެ ޠާލިބާން ސަރުކާރުން ދަނީ 'ތަހްރީކޭ ތާލިބާން ޕާކިސްތާން' އަށް ހިމާޔަތާއި އެހީތެރިކަން ފޯރުކޮށްދެމުންނެވެ. މި އަހަރު ދިން ނުރައްކާތެރި ހަމަލާތަކުގެ ފަހަތުގައިވަނީ އެ ޖަމާއަތް ކަމަށް ޕާކިސްތާނުން ބުނެއެވެ. މީގެ ތެރޭގައި އުތުރު ވަޒީރިސްތާނުގެ އަސްކަރީ މަރުކަޒަކަށް ދިން ބޮމުގެ ހަމަލާގައި ހަތް ސިފައިން މަރުވި ހާދިސާ ހިމެނެއެވެ.

އަނެއްކޮޅުން، ޕާކިސްތާނުގެ ތުހުމަތުތައް އަފްޣާނިސްތާނުން ދޮގުކުރެއެވެ. އެ ގައުމުން ބުނާގޮތުގައި ތެހެރިކޭ ތާލިބާން ޖަމާޢަތް އުފެދުނީ 2002 ވަނަ އަހަރުން ފެށިގެން އެމެރިކާއިން ދިން ހަމަލާތަކަށް ޕާކިސްތާނުން އެހީތެރިވުމުގެ ސަބަބުންނެވެ.

ބައިނަލްއަޤްވާމީ ޓެރަރިޒަމް އިންޑެކްސް ދައްކާގޮތުން، ޕާކިސްތާނަކީ މިހާރު ދުނިޔޭގައި ޓެރަރިޒަމްގެ ނުރައްކާ ދެވަނައަށް އެންމެ ބޮޑު ގައުމެވެ. ސަލާމަތީ މާހިރުން އަންދާޒާކުރާ ގޮތުގައި އެ ސަރަހައްދުގައި މިހާރުވެސް ތާލިބާނުންގެ 8،500 އެއްހާ ހަނގުރާމަވެރިން ހަރަކާތްތެރިވަމުންދެއެވެ.