އދ. މާމިގިލީގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ ދަށުން، އެ ރަށުގެ މަގުތަކުގައި ތާރު އެޅުމުގެ އަމަލީ މަސައްކަތް ރަސްމީކޮށް ފަށައިފިއެވެ.

މި މަސައްކަތް ފައްޓަވައިދެއްވީ އިމާރާތް ކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުالله މުއްޠަލިބްއެވެ. މިކަމަށްޓަކައި މާމިގިލީގައި ބޭއްވި ހާއްސަ ރަސްމިއްޔާތުގައި ރޯޑް ޑިވެލޮޕްމަންޓް ކޯޕަރޭޝަން (އާރް.ޑީ.ސީ) ގެ މެނޭޖިންގ ޑިރެކްޓަރ އިބްރާހީމް ނަޡީމްގެ އިތުރުން، މާމިގިލީ ދާއިރާގެ މަޖިލިސް މެންބަރު ޤާސިމް އިބްރާހިމް ބައިވެރިވެވަޑައިގެންނެވިއެވެ.

މުޅި މަޝްރޫޢުގެ %89 މަސައްކަތް މިހާރު ނިމިފައިވާއިރު، މީގެ ދަށުން ރަށުގެ ޖުމްލަ 6 މަގެއްގައި 4.8 ކިލޯމީޓަރުގެ ސަރަޙައްދެއް ތާރު އަޅައިގެން ތަރައްޤީކުރާނެއެވެ.

މި މަޝްރޫޢުގެ ދަށުން ކޭބަލް ޖަންޝަނާ ހޮޅި އެޅުމުގެ މަސައްކަތާއި، ސެޓްލްމަންޓް ޓޭންކާއި ހޮޅި އެޅުމުގެ މަސައްކަތް މިހާރު ވަނީ އެއްކޮށް ނިމިފައެވެ. އަދި ދުވާރާއި ކާރބް ސްޓޯން ޖެހުމުގެ %99 މަސައްކަތާއި، ތާރު އެޅުމުގެ ކުރިން އަޅާ އޭބީސީ ފަށަލައިގެ މަސައްކަތްވެސް ވަނީ ނިމިފައެވެ. މީގެ އިތުރުން ޕަމްޕް ސްޓޭޝަންތަކުގެ %61 މަސައްކަތް ވަނީ ނިންމާލެވިފައެވެ.

މި މަޝްރޫޢުގެ ތެރޭގައި ހިމެނޭ މައިގަނޑު މަސައްކަތްތަކަކީ:

ތާރު އަޅައިގެން މަގުތައް ތަރައްޤީ ކުރުން.

ކެރިއޭޖްވޭ އަދި ސައިޑްވޯކް ހެދުން.

މަގުމަތީ ކާނުތަކާއި ސްޓޯރމް ވޯޓަރ މަނޭޖްމަންޓް ސިސްޓަމް ގާއިމު ކުރުން.

މަގު ބައްތި ހަރުކުރުމާއި، މިހާރު ހުރި މަގުތަކުގައި ސްޓްރީޓް ލައިޓް ހަރުކުރުން.

ސްޕީޑް ބްރޭކަރާއި ރޯޑް ސައިން ބޯޑު ހަރުކުރުން.

ޒީބްރާ ކްރޮސިންގްސް މާކު ކުރުން.

ޖުމްލަ 95,043,314.41 (ނުވަދިހަ ފަސް މިލިއަން ސާޅީސް ތިން ހާސް ތިންސަތޭކަ ސާދަ ރުފިޔާ ސާޅީސް އެއް ލާރި) ޚަރަދުކޮށްގެން ކުރިއަށްގެންދާ މި މަޝްރޫޢުގެ އަމަލީ މަސައްކަތް ފުރަތަމަ ފަށާފައިވަނީ 26 ސެޕްޓެމްބަރު 2020 ގައެވެ.