ސިވިލް ކޯޓުން މިދިޔަ އަހަރު ނިންމި ޤަޟިއްޔާތަކުގެ އަދަދު 6،000 އަށް ވުރެ ގިނަ އެ ކޯޓުގެ ތަފާސްހިސާބުތަކުން ދައްކައިފިއެވެ. 

މިއީ މިހާތަނަށް އެންމެ ގިނަ އަދަދަކަށް މައްސަލަތައް ނިންމި އަހަރެވެ. 

ސިވިލް ކޯޓުން މިއަދު އާންމުކޮށްފައިވާ ނިމުނު 2025 ގެ ތަފާސްހިސާބުތަކަށް ބަލާއިރު، އެ ކޯޓުގައި އެ އަހަރު 5،680 ޤަޟިއްޔާ ރަޖިސްޓްރީކޮށްފައިވެއެވެ. މިއީ އޭގެ ކުރީގެ އަހަރާ އަޅާބަލާއިރު %10.46 އިތުރު އަދެދެކެވެ. ސިވިލް ކޯޓުގައި 2024 ވަނަ އަހަރު ރަޖިސްޓަރީކުރީ 5،142 ޤަޟިއްޔާ އެވެ. 

ތަފާސްހިސާބުތަކުގައި ވާގޮތުން މިދިޔަ އަހަރު ސިވިލް ކޯޓުން ވަގުތީ އަމުރުތައް ފަދަ މައްސަލަތައް ނުހިމަނާ ޖުމްލަ 6،718 މައްސަލަ ނިންމާފައިވެ އެވެ. އޭގެ ކުރީގެ އަހަރު ނިންމާފައިވަނީ 5،432 މައްސަލަ އެވެ. އެހެންކަމުން، މިއީ 23.68 ޕަސެންޓްގެ އިތުރުވުމެކެވެ.

މީގެ އިތުރުން، މިދިޔަ އަހަރުގެ ތެރޭގައި އިޖުރާއީ ނިންމުމާއި އިހުތިސާސްއާ މެދު 126 މައްސަލައެއްގައި ގޮތް ނިންމާފައިވާކަމަށޤވެސް ތަފާސްހިސާބުތަކުން ދައްކައެވެ. 2024 ވަނަ އަހަރުގެ މި އަދަދަކީ 135 އެވެ. 

ދައުވާގެ ތެރެއިން ހުށަހެޅުނު ވަގުތީ އަމުރާއި މެދު މިދިޔަ އަހަރު 166 މައްސަލައެއްގައި ގޮތް ނިންމާފައިވެ އެވެ. އަދި އޭގެ ކުރީގެ އަހަރު އަމުރާ ގުޅޭގޮތުން ނިންމާފައިވަނީ 103 މައްސަލަ އެވެ.

ސިވިލް ކޯޓުގައި ރާއްޖޭގައި އެންމެ ގިނައިން މައްސަލަތަށް ހުށަހަޅާ، އެންމެ ގިނަ ގާޒީން މަސައްކަތްކުރައްވާ ކޯޓެވެ. އެގޮތުން މިހާރު 17 ގާޒީން އެ ކޯޓުގައި މަސައްކަތްކުރައްވައެވެ.