ރ. ކިނޮޅަހު ބޭރުން އޮޔާދަނިކޮށް މި މަހުގެ ކުރީކޮޅު ފެނުނު ހަށިގަނޑަކީ، ގެއްލިގެން ހޯދަމުންދާ ރަޝިއާގެ ފަތުރުވެރިޔާގެ ހަށިގަނޑު ނޫންކަން ފުލުހުން ކަށަވަރުކޮށްދީފިއެވެ.
ފުލުހުން ބުނީ 2026 ޖެނުއަރީ 04 ވަނަ ދުވަހު ކިނޮޅަހު ބޭރުން ފެނުނު ހަށިގަނޑުގެ ޑީއެންއޭ ތަހުލީލުތަކުން އެއީ ފިރިހެނެއްގެ ހަށިގަނޑުކަން މިހާރު ކަށަވަރުވެފައިވާ ކަމަށެވެ.
އަދި އެ ހަށިގަނޑާއި، 2025 ޑިސެމްބަރު 21 ވަނަ ދުވަހު ކ. ކަނޑޫމާތިލަ ކައިރިން ފެނުނު ހަށިގަނޑުގެ ޑީއެންއޭ ނަތީޖާއަށް ބަލާއިރު، އެއީ 2025 ޑިސެމްބަރު 17 އިން ފެށިގެން އއ.އުކުޅަހުން ގެއްލިގެން ހޯދަމުންދާ ރަޝިއާ ފަތުރުވެރިޔާގެ ހަށިގަނޑު ނޫންކަން ޔަގީންކުރެވިފައިވާ ކަމަށްވެސް ފުލުހުން ބުންޏެވެ.
ކިނޮޅަހާ ދިމާ ބޭރު ކަނޑުމަތިން މަރުވެފައި އޮތް މީހެއްގެ ހަށިގަނޑު އޮޔާދާ ކަމުގެ މައުލޫމާތު ފުލުހުންނަށް ލިބިފައިވަނީ މި މަހުގެ 4 ވަނަ ދުވަހުގެ ހަވީރު 4:24 އެހާކަންހާއިރުއެވެ. މި ރިޕޯޓާ ގުޅިގެން ފުލުހުން ވަނީ އެ ސަރަހައްދުގައި ހަރަކާތްތެރިވެ، ހަށިގަނޑު ނަގައި ތަހުލީލުތައް ފަށާފައެވެ.
ފުލުހުން އިތުރަށް ހާމަކުރި ގޮތުގައި، މި މައްސަލައާ ގުޅިގެން އިތުރަށް ބަލަންޖެހޭ ކަންކަން ދަނީ ބަލަމުންނެވެ.
Advertisement
This content is created and paid for by advertisers and does not involve Voice Journalists
