ގާތްގަނޑަކަށް 20 އަހަރަށް ދެމިގެންދިޔަ މަޝްވަރާތަކަށްފަހު، އިންޑިއާ އާއި ވިލާތުގެ އިއްތިހާދުން، މުހިންމު މިނިވަން ވިޔަފާރީގެ އެއްބަސްވުމެއްގައި ސޮއިކޮށްފިއެވެ.

"މަދަރ އޮފް އޯލް ޓްރޭޑް ޑީލްސް" ނުވަތަ ވިޔަފާރީގެ އެންމެ ބޮޑު އެއްބަސްވުމުގެ ގޮތުގައި ސިފަކުރެވޭ މި އެއްބަސްވުމުގައި ސޮއިކޮށްފައިވަނީ މިއަދު ނިއުދިއްލީގައި ބޭއްވުނު ސަމިޓެއްގައެވެ. 

ސޮއިކުރެވުނު މި އެއްބަސްވުމުގެ ސަބަބުން ދުނިޔޭގެ ޖުމްލަ އުފެއްދުންތެރިކަމުގެ (ޖީ.ޑީ.ޕީ) ހަތަރުބައިކުޅަ އެއްބައި ހިއްސާކުރާ އަދި ގާތްގަނޑަކަށް ދެ ބިލިއަން މީހުންގެ އާބާދީއެއް ހިމެނޭ ބޮޑު ދެ އިގްތިސާދު ގުޅިގެންދާނެއެވެ. ރޮއިޓާސް އިން ރިޕޯޓްކޮށްފައިވާ ގޮތުގައި، މި އެއްބަސްވުމުގެ މައިގަނޑު މަގްސަދަކީ ވިޔަފާރީގެ ހުރަސްތައް ކުޑަކުރުމާއި، އިންވެސްޓްމަންޓްތައް އިތުރުކުރުމާއި، އަދި ދުނިޔޭގެ ސިޔާސީ މަޝްރަހަށް އަންނަ ބަދަލުތަކާ ގުޅިގެން ދެ ފަރާތުގެ އިގްތިސާދީ ގުޅުން އިތުރަށް ބަދަހިކުރުމެވެ.

މި އެއްބަސްވުމުގެ ދަށުން، ވިލާތުގެ އިއްތިހާދުން އިންޑިއާއަށް އެތެރެކުރާ މުދަލުގެ 96 އިންސައްތައާއި 97 އިންސައްތައާ ދެމެދުގެ މިންވަރަކުން ނަގާ ޓެރިފް ނުވަތަ އިމްޕޯޓް ޑިއުޓީ ކުޑަކުރުމަށް ނުވަތަ އުވާލުމަށް އިންޑިއާއިން ވަނީ އެއްބަސްވެފައެވެ. ފައިނޭންޝަލް ޓައިމްސް އިން ބުނާ ގޮތުގައި މީގެ ސަބަބުން ވިލާތުގެ އެކްސްޕޯޓަރުންނަށް އަހަރަކު ގާތްގަނޑަކަށް 4 ބިލިއަން ޔޫރޯ ސަލާމަތްކުރެވޭނެއެވެ. މީގެ ތެރޭގައި ހިމެނޭ މުހިންމު ބާވަތްތަކަކީ އުޅަނދުފަހަރާއި، މެޝިނަރީ، ކެމިކަލް، ސިއްހީ އާލާތްތައް، އަދި ރަލުގެ ބާވަތްތަކެވެ. ބަދަލުގައި އިންޑިއާގެ އުފެއްދުންތައް ކަމަށްވާ ފޭރާމާއި، ހަމުގެ ބާވަތްތަކާއި، އިންޖީނިއަރިންގ އުފެއްދުންތަކާއި، ބޭސްވެރިކަމުގެ ސާމާނު އަދި ކަނޑުމަހުގެ ބާވަތްތަކަށް ވިލާތުގެ ބާޒާރުން ބޮޑެތި ފުރުސަތުތަކެއް ފަހިވެގެންދާނެއެވެ.

މުދަލުގެ އިތުރުން، ޚިދުމަތްތަކާއި، އިންވެސްޓްމަންޓް އުސޫލުތަކާއި، އަދި ގަވާއިދުތަކަށްވެސް މި އެއްބަސްވުމުގައި ވަނީ އަލިއަޅުވާލާފައެވެ. އެސޯސިއޭޓެޑް ޕްރެސް އިން ރިޕޯޓްކުރާ ގޮތުގައި، މި އެއްބަސްވުމުގެ ސަބަބުން ކަސްޓަމްސްގެ މަރުހަލާތައް ފަސޭހަވެ، އިދާރީ ހުރަސްތައް ކުޑަވެގެންދާނެއެވެ. މީގެ ސަބަބުން އިންޑިއާގެ އުފެއްދުންތެރިކަމާއި އުމްރާނީ ތަރައްގީއަށް ވިލާތުގެ އިންވެސްޓްމަންޓްތައް އިތުރުވެ، އިންޑިއާގެ އައި.ޓީ އަދި ވިޔަފާރި ޚިދުމަތްތައް ދޭ ކުންފުނިތަކަށް ވިލާތުގައި އާ ފުރުސަތުތައް ހުޅުވިގެންދާނެއެވެ.

މި އެއްބަސްވުމުގައި ސޮއި ކުރުމަށް ބޭއްވުމުނު ސަމިޓުގެ ތެރެއިން-- ފޮޓޯ/ އޭޕީ 

މި އެއްބަސްވުން ފުޅާ ދާއިރާއެއްގައި އެކުލަވާލާފައިވީ ނަމަވެސް، ސިޔާސީ ގޮތުން ނާޒުކު ބައެއް ދާއިރާތަކަށް ވަނީ ރައްކާތެރިކަން ދީފައެވެ. އެގޮތުން، ދަނޑުވެރިކަމުގެ ބައެއް ބާވަތްތަކާއި ކިރުގެ އުފެއްދުންތައް ވަނީ ޑިއުޓީ ކުޑަކުރުމުގެ އުސޫލުން ބައެއް މިންވަރަށް އިސްތިސްނާކޮށްފައެވެ. މިއީ ގިނަ އަހަރުތަކެއް ވަންދެން މަޝްވަރާތައް ހުއްޓިފައި އޮތް މައިގަނޑު ސަބަބުތައް ހައްލުކުރުމަށް އެޅުނު މުހިންމު ފިޔަވަޅެކެވެ.

މި އެއްބަސްވުމާ ގުޅޭގޮތުން ވާހަކަ ދައްކަމުން އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވީ، މީގެ ސަބަބުން ކުރިއެރުމުގެ އާ މަގުތައް ހުޅުވި، ވަޒީފާގެ ފުރުސަތުތައް އިތުރުވެ، ދުނިޔޭގެ ސަޕްލައި ޗެއިންގައި އިންޑިއާގެ ދައުރު ބޮޑުވެގެންދާނެ ކަމަށެވެ.

ވިލާތުގެ ކޮމިޝަނުގެ ރައީސާ އުރްސުލާ ފޮން ޑަރލޭން ބުނީ، މިއީ ވިޔަފާރި ފުޅާކުރުމަށާއި، އިގްތިސާދީ ނުރައްކާތައް ކުޑަކުރުމަށް އެޅުނު މުހިންމު ބިންގަލެއް ކަމަށެވެ.

މި އެއްބަސްވުމުގެ ސަބަބުން، މިހާރުވެސް އަހަރަކު 130 ބިލިއަން ޑޮލަރަށްވުރެ ގިނަ އަދަދަކަށް ހިނގަމުންދާ ދެ ގައުމުގެ ވިޔަފާރި ވަރަށް ބޮޑަށް އިތުރުވެގެންދާނެ ކަމަށް މާހިރުން ލަފާކުރެއެވެ. ރިޕޯޓްތައް ބުނާ ގޮތުން، ހުރިހާ ހުއްދަތަކެއް ލިބިއްޖެނަމަ 2027 ވަނަ އަހަރު މި އެއްބަސްވުމަށް އަމަލުކުރަން ފެށޭނެއެވެ.