ވޯޓެއް ނެތި ބާރަށާއި އުތީމު ކައުންސިލްގެ ރައީސްކަން ވެސް ޕީއެންސީއަށް
ތިލަދުންމަތީ އުތުރުބުރީ އުތީމާއި ބާރަށު ކައުންސިލްގެ ރައީސް ކަމަށް ސަރުކާރު ހިންގާ ޕީއެންސީން ކުރިމަތިލީ ކެންޑިޑޭޓުން ވޯޓެއް ނެތި ހޮވިއްޖެ އެވެ.
އަންނަ އޭޕްރީލް މަހު އޮންނަ ލޯކަލް ކައުންސިލް އިންތިހާބުގައި ވާދަކުރަން ބޭނުންވާ ކެންޑިޑޭޓުންނަށް ހުޅުވާލި ފުރުސަތު ވަނީ ހަމަވެފަ އެވެ. އިންތިހާބުގައި 2،993 ކެންޑިޑޭޓުން ވާދަ ކުރާނެ އެވެ.
ނަމަވެސް އިންތިހާބު ކުރަން ޖެހޭ އަދަދަށް ކުރިމަތިލުމުގެ ސަބަބުން އިންތިހާބުގެ ކުރީން ވޯޓެއް ނެތި ބައެއް ކެންޑިޑޭޓުންނަށް ވަނީ ގޮނޑި ކަށަވަރު ވެފަ އެވެ.
އެގޮތުން އުތީމާއި ބާރަށު ކައުންސިލްގެ ރައީސް ކަމަށް ސަރުކާރު ހިންގާ ޕީއެންސީން ކުރިމަތިލީ ކެންޑިޑޭޓުން ވަނީ ހޮވިފަ އެވެ. އުތީމު ރައީސް ކަމަށް ކުރިމަތިލީ މިހާރު ވެސް އެ މަގާމުގައި ހުންނެވި ޢަބްދުﷲ ރަޝީދު އެކަންޏެވެ. އެހެން ކަމުން ވޯޓެއް ނެތި އިތުރު ދައުރެއް ވަނީ ކަށަވަރު ކޮށްފަ އެވެ. ލާމަރުކަޒީ ނިޒާމު އައިފަހުން އުތީމުގެ ރައީސްކަން ކުރި ހަމައެކަނި ބޭފުޅަކީ ރަޝީދެވެ.
ބާރަށު ކައުންސިލްގެ ރައީސް ކަމަށް ކުރިމަތިލީ އަލީ ޝަމީމް އެވެ. އޭނާ ވެސް ވޯޓެއް ނެތި ވަނީ އިންތިހާބުވެފަ އެވެ.
މީގެ އިތުރުން އދ ދިއްދޫއާ މަންދޫ ކައުންސިލްގެ ރައީސްގެ ގޮނޑި ވެސް ޕީއެންސީން ވަނީ ކަށަވަރު ކޮށްފަ އެވެ.
Advertisement
This content is created and paid for by advertisers and does not involve Voice Journalists
