ރަޝިޔާއިން ޔޫކްރެއިންއަށް ދިން ޑްރޯން ޙަމަލާއެއްގައި 12 މީހުން މަރުވެ 7 މީހުންނަށް ޒަހަމްވެއްޖެއެވެ.
ރަޝިޔާގެ މި ހަމަލާ އަމާޒުކޮށްފައި ވަނީ ޔޫކްރެއިންގެ ދެކުނު އިރުމަތީ ސަރަޙައްދެއް ކަމަށްވާ ނިޕްރޮޕެޓްރޮވްސްކާގައި އޮތް ބަހެއް ކައިރިއަށެވެ. ޔޫކްރެއިނުން ބުނީ ބަހުގައި ދަތުރުކުރަމުން ދިޔައީ އެ ސަރަޙައްދުގެ މައިންއެއްގައި މަސައްކަތްކުރާ ބައެއް ކަމަށެވެ. އަދި މަރުވި އެންމެންނަކީ ވެސް އެއް ކުންފުންޏެއްގެ މުވައްޒަފުން ކަމަށް އެ ޤައުމުން ބުނެއެވެ.
ރަޝިޔާއިން ޔޫކްރެއިންއަށް މި ޙަމަލާ ދީފައި މި ވަނީ ހަކަތައިގެ ދާއިރާއަށް ޙަަމަލާ ދިނުން މަޑުޖައްސައިލުމަށް ރަޝިޔާއާއި ޔޫކްރެއިންއާ ދެމެދު އެއްބަސްވެފައި ވަނިކޮށެވެ. އަދި ހަނގުރާމަ ހުއްޓައިލުމާ ގުޅޭގޮތުން ޔޫކްރެއިންއާއި ރަޝިޔާއާައި އެމެރިކާއިން ކުރަމުންދާ މަޝްވަރާތަކުގެ ދެވަނަ ބުރު އަންނަ ހަފްތާގައި އަބޫ ދާބީގައި ބޭއްވުމަށް ހަަމަޖެހިފައިވާ ކަމަށް ޔޫކްރެއިންގެ ރަޢީސް ވޮލޮޑޮމީރު ޒެލެންސްކީ އިޢުލާނުކުރެއްވިތާ ގަޑިއިރުކޮޅެއް ފަހުންނެވެ.
ނިޕްރޮޕެޓްރޮވްސްކަށް ޙަމަލާ ދިނުމުގެ ކުރިން ވެސް ޔޫކްރެއިންގެ ޒަޕޮރީޖާގައި ހުންނަ މާބަނޑު މީހުންގެ ހަސްފަތާލަކަށާއި މީހުން ދިރިއުޅޭ އިމާރާަތަކަށް ވެސް ރަޝިޔާއިން ޙަމަލާ ދީފައިވެއެވެ. އެ ޙަމަލާތަކުގައި ނުވަ މީހުންނަށް އެކި ވަރުގެ ޒަހަމްތައް ލިބިފައިވެއެވެ.
Advertisement
This content is created and paid for by advertisers and does not involve Voice Journalists
