ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބުގައި ބ. އޭދަފުށީ ކައުންސިލަށް އިންތިހާބު ކުރާ ފަސް މެންބަރުންގެ ތެރެއިން ސަރުކާރު ހިންގާ ޕީއެންސީން ކުރިމަތިލީ ކެންޑިޑޭޓަކަށް ވޯޓެއް ނެތި ގޮނޑި ކަށަވަރު ވެއްޖެ އެވެ.
އަންނަ އޭޕްރީލް މަހު އޮންނަ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބުގައި ވާދަކުރަން ބޭނުންވާ ކެންޑިޑޭޓުންނަށް ހުޅުވާލި ފުރުސަތު ވަނީ ހަމަވެފަ އެވެ. އިންތިހާބުގައި 2،993 ކެންޑިޑޭޓުން ވާދަ ކުރާނެ އެވެ.
ނަމަވެސް އިންތިހާބު ކުރަން ޖެހޭ އަދަދަށް ކުރިމަތިލުމުގެ ސަބަބުން އިންތިހާބުގެ ކުރީން ވޯޓެއް ނެތި ބައެއް ކެންޑިޑޭޓުންނަށް ވަނީ ގޮނޑި ކަށަވަރު ވެފަ އެވެ.
އެގޮތުން އޭދަފުށީ ކައުންސިލަށް އިންތިހާބު ކުރާ ފަސް މެންބަރުންގެ ތެރެއިން ސަރުކާރު ހިންގާ ޕީއެންސީން ކުރިމަތިލީ ކެންޑިޑޭޓަކަށް ވޯޓެއް ނެތި ގޮނޑި ވަނީ ކަށަވަރު ވެފަ އެވެ. އެއީ އަންހެނުންނަށް ހާއްސަ ދެ ގޮނޑި އެވެ. އެ ދެ ގޮނޑިއަށް ކުރިމަތިލީ ޒީމާ އިބްރާހީމް އާއި ނާޒްނީން ޔޫސުފް އެވެ. ނަމަވެސް އިތުރު ބަޔަކު ކުރިމަތި ނުލާތީ އެ ދެ ކެންޑިޑޭޓުންނަށް ވަނީ ގޮނޑި ކަށަވަރު ވެފަ އެވެ.
ގޮނޑި ކަށަވަރުކުރި ނާޒްނީން އަކީ ހިނގަމުންދާ ދައުރުވެސް އޭދަފުށީ ކައުންސިލްގެ މެންބަރެކެވެ. ޒީމާ އަކީ އެ ރަށު އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ ރައީސާ އެވެ.
އޭދަފުށީގައި ދެން އޮންނާނީ ކަައުންސިލްގެ ރައީސްގެ މަގާމާއި މެންބަރު ކަމުގެ ދެ މަގާމާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ މެންބަރުން އިންތިހާބު ކުރުމަށް ވޯޓް ނެގުމެވެ.
Advertisement
This content is created and paid for by advertisers and does not involve Voice Journalists
