ކ.ހިންމަފުށީގައި ހުންނަ އައްސޭރިޖަލު ބަލަހައްޓާ އޮފިސަރުންނާއި ގައިދީން ވެގެން އެރަށުގައި ހުންނަ ސްކޫލަށް ޑެސްކްތަކެއް ޖަހައިދީފިއެވެ.
މިކަމާ ގުޅޭގޮތުން ވޮއިސްއާ މައުލޫމާތު ހިއްސާކުރަމުން މޯލްޑިވްސް ކަރެކްޝަނަލް ސާވިސްގެ މީޑިއާ އޮފިސަރު ވިދާޅުވީ، މިއީ އިޖުތިމާއީ ޒިންމާގެ ދަށުން އެރަށު ސްކޫލަށް އެހީތެރިވެދިނުމުގެ ގޮތުން ޖަހައިދިން ޑެސްކްތަކެއް ކަމަށެވެ. ޖަލު އޮފިސަރުންނާއި ގައިދީން ވަނީ ހިންމަފުށީ ސްކޫލަށް 130 ޑެސްކް ޖަހައިދީފައެވެ.
މިއީ ދެ މަސްދުވަހުގެ މަސައްކަތެވެ. ގަދިދީންނަށް އަމާޒުކޮށް ކަރެކްޝަނުން ތަފާތުއެކިއެކި މަސައްކަތްތައް ދަސްކޮށްދިނުމަށް އެކި ޕްރޮގްރާމްތައް ހިންގައެވެ. ކަރެކްޝަނުން ބުނީ މިފަދަ މަސައްކަތްތަކުން ޤައިދީންގެ ރިހެބިލިޓޭޝަނަށް ހެޔޮ އަސަރުކޮށް، އެފަރާތްތަކުގެ ހުނަރުތައް ތަރައްޤީވެގެން ދާނެ ކަމަށެވެ.
އައްސޭރި ޖަލުގެ ގައިދީންނާއި އޮފިސަރުން ޖަހައިދިން ޑެސްކުތައް.. ފޮޓޯ: ކަރެކްޝަނަލް ސާވިސް
ޖަލުތަކުގައި ހުނަރުވެރި މަސައްކަތްތެރިން ތިބޭއިރު، ކަރެކްޝަނުން ކުރާ ގިނަ މަސައްކަތްތަކުގައި ގައިދީން ބައިވެރިވެއެވެ. އެގޮތުން ކަރެކްޝަނުގެ އައު އިމާރާތް ބިނާކުރުމާއި މިސްކިތް ބިނާކުރުމުގައިވެސް ޖަލު ގައިދީންގެ ބައިވެރިވުން ވަރަށް ބޮޑުކަމަށް ކަރެކްޝަނުން ބުނެއެވެ.
ގަދިދީންގެ ބައިވެރިވުމާއެކު ޖަލުގައި ދަނޑުވެރިކަމުގެ މަސައްކަތްތައް ކުރާއިރު، އެ ދަނޑުތަކުގައި ހައްދާ އުފެއްދުންތައް މާލޭ މާރުކޭޓަށް ގެނެސް ވިއްކައެވެ. ގަދިދީން ކުރާ މަސައްކަތްތަކުން އެމީހުންނަށް އުޖޫރަވެސް ލިބޭކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
