މޯލްޑިވްސް ރިޓަޔަމަންޓް ޕެންޝަން ސްކީމަށް ޤަވާއިދުން ފައިސާ ނުދައްކާ މައްސަލާގައި ސިވިލް ކޯޓުން ޖާހް ޕްރައިވެޓް ލިމިޓެޑްގެ މައްޗަށް ޕެންޝަން ދެއްކުމަށް ހުކުމްކޮށްފިއެވެ.

މި މައްސަލަ ޕެންޝަން އޮފީހުން ސިވިލް ކޯޓަށް ހުށަހަޅެޅުމުން ކޯޓުން މައްސަލަ ރަޖިސްޓްރީ ކޮށްފައިވަނީ، މިދިޔަ އަހަރުގެ އޮކްޓޯބަރުމަހުގެ 16 ވަނަ ދުވަހުއެވެ. ޕެންޝަން އޮފީހުން ކުރި ދައުވާގައި ބުނެފައިވަނީ، ޖާހް ޕްރައިވެޓް ލިމިޓެޑުން މިދިޔަ އަހަރުގެ ފެބުރުއަރީމަހުން ފެށިގެން އެއަހަރުގެ އޮގަސްޓްމަހުގެ ނިޔަލަށް ރިޓަޔަމަންޓް ޕެންޝަން ސްކީމަށް ފައިސާދައްކަމުން ނުދާކަމަށެވެ. 

ދައުވާއަށް ބަލާއިރު، ޖާހުން ޕެންޝަނަށް 15،488.22 ރުފިޔާ ނުދައްކާ އެބައޮތެވެ. ސިވިލްކޯޓުން މި މައްސަލަ ބެލުމަށްފަހު އިއްވި ނިޔާގައި ބުނެފައިވަނީ، ދައްކަންޖެހޭ ފައިސާ އާއި ޖޫރިމަނާ އިއްޔެއިން ފެށިގެން ދެމަސްދުވަހުގެ ތެރޭގައި ދައްކައި ނިންމުމަށް އަމުރުކޮށްފައެވެ. ސިވިލްކޯޓުން މި ހުކުމްކޮށްފައިވަނީ ޖާހްގެ ޢައިރު ހާޒިރުގައެވެ.

ހުޅުމާލޭގައި ތަރައްޤީކުރަމުންދާ "ދަ ގާޑަންސް" ޓަވަރު ތަރައްޤީކުރަން ފެށި ޖާހު އިންވެސްޓްމަންޓް ޕްރައިވެޓް ލިމިޓެޑާއި، ޖާހް ޕްރައިވެޓް ލިމިޓެޑަކީ އެއްބަޔަކު ހިއްސާވާ ދެ ކުންފުންޏެވެ. ދަ ގާޑަންސް ޓަވަރު ތަރައްޤީކޮށް ނިންމަން ދިން މުއްދަތަށް ނުނިމިގެން އެޗްޑީސީން ވަނީ މިދިޔަ އަހަރުގެ ޖޫންމަހު އެ މަސައްކަތް ނިންމަން ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާ ހަވާލުކޮށްފައެވެ.

"ދަ ގާޑަންސް" ނަމުގައި 2017 ވަނަ އަހަރުން ފެށިގެން ހަދަމުން އަންނަ އެޕާޓްމަންޓުތައް ނިންމަން އެޗްޑީސީން ވަނީ ޖާހު ކުންފުންޏަށް އެކި ފަހަރު މަތިން މުއްދަތު އިތުރުކޮށްދީފައެވެ. އެގޮތުން އެންމެ ފަހުގެ ފުރުސަތު ދިނީ މިދިޔަ އަހަރުގެ ޖެނުއަރީމަހުގެ 27 ވަނަ ދުވަހަށެވެ.