އެމްޑީޕީ ސަރުކާރުގައި މިސްކިތްތަކަށް ގެއްލުންދިން ފަރާތްތަކާމެދު ފިޔަވަޅުއަޅާފައި ނުވާ ކަމަށް ޖޭޕީގެ ލީޑަރު އަދި މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ. 

ޤާސިމް މިހެން ވިދާޅުވެފައިވަނީ، މިސްކިތަށް ގެއްލުންދިނުމަކީ ޓެރަރިޒަމްގެ އަމަލަކަށް ހަދަން ޓެރަރިޒަމް މަނާކުރުމުގެ ޤާނޫނަށް ހުށަހެޅި އިސްލާހަށް ބަހުސްކުރައްވަމުންނެވެ. މި އިސްލާޙް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) އެވެ. 

މަޖިލީހުގެ މިއަދުގެ ޖަލްސާގައި އެ އިސްލާހަށް ވާހަކަ ދައްކަވަމުން ޤާސިމް ވިދާޅުވީ، މިސްކިތްތަކަށް ގެއްލުންދޭ މީހުންނަށް އަދަބު ދިނުމަކީ އާއްމު ގާނޫނޫގެ ތެރެއިން ކުރިންވެސް މިހާރުވެސް ކުރެވެން އޮންނަ ކަމެއް ކަމަށެވެ. އަދި އެކަމަށް ވަކި ޤާނޫނެއް ހަދަން ނުޖެހޭ ކަމަށެވެ. 

މިއާއެކު ޤާސިމް ވިދާޅުވީ، ނިމިދިޔަ ސަރުކާރުގައިވެސް މިސްކިތްތަކަށް ގެއްލުންދޭ މައްސަލަތައް ފެންމަތިވި ކަމަށެވެ. އަދި އޭރުވެސް ގާނޫނުގެ ތެރެއިން އެފަރާތްތަކަށް ފިޔަވަޅު އެޅެން އޮތް ކަމަށާ އެހެން ނަމަވެސް އެ ސަރުކާރުން އެކަން ކޮށްފައި ނުވާ ކަމަށް ޤާސިމް ވިދާޅުވިއެވެ.  

މިސްކިތްތައް ނޭޅި ލަސްވާ ކަމަށްބުނެ އިދިކޮޅު ފަރާތްތަކުން ސަރުކާރަށް ފާޑުވިދާޅުވަމުންދާތީ އެކަމަށް ރައްދުދެއްވައި ޤާސިމް ވިދާޅުވީ، މިސްކިތްތައް އެޅޭނީވެސް އަދި މަރާމާތު ކުރެވޭނީވެސް އެކަމަށް ބޭނުންވާ ފައިސާ ހުރެގެން ކަމަށެވެ.

މީގެ އިތުރުން ނިމިދިޔަ ތިން ސަރުކާރުން ދައުލަތް ދަރުވާލާފައިވާ ކަމަށާ، އެކަމުގެ ބުރަ މި ސަރުކާރަށް އުފުލަންޖެހިފައިވާ ކަަމަށެވެ. އެހެންކަމުން، މި ސަރުކާރުން އެކި ގޮތްގޮތުން ފައިސާ ހޯދައިގެން އެ ބޮޑު ދަރަނިން ސަލާމަތްވެވޭތޯ މަސައްކަތް ކުރަމުންދާކަމަށްވެސް ޤާސިމް ވިދާޅުވި އެވެ.