ބަންގްލަދޭޝްގައި މިއަދު ކުރިއަށްދާ ރައްޔިތުންގެ މަޖިލީހުގެ އިންތިޚާބުގެ ވޯޓުލުން ފަށާފައިވަނިކޮށް، ވޯޓުލާ މަރުކަޒަކަށް ގޮވާ އެއްޗެއް އުކުމުގެ ސަބަބުން ތިން މީހަކު ޒަޚަމްވެއްޖެއެވެ.

ބަންގްލަދޭޝްގެ 'ޕްރޮތޮމް އާލޯ' ނޫހުން ރިޕޯޓްކޮށްފައިވާ ގޮތުގައި، މި ހާދިސާ ހިނގާފައިވަނީ ގޯޕާލްގަންޖްގައި ހުންނަ ރޭޝްމާ އިންޓަނޭޝަނަލް ސްކޫލްގެ ވޯޓުލާ މަރުކަޒުގައެވެ.

މި ހާދިސާއާ ގުޅޭގޮތުން އެ މަރުކަޒުގައި ޑިއުޓީގައި ހުރި ފުލުސް އޮފިސަރު ޖާހިދުލް އިސްލާމް މައުލޫމާތު ދިން ގޮތުގައި، ވޯޓުލުމުގެ ކަންކަން ވަރަށް އަމާންކަމާއެކު ކުރިއަށް ދަނިކޮށް، ބަޔަކު މީހުން ވަނީ "ކޮކްޓެއިލް" ނުވަތަ އަތުން ތައްޔާރުކޮށްފައިވާ ގޮވާ އެއްޗެހިތަކެއް ސްކޫލާ ދިމާލަށް އުކާފައެވެ.

މި ހަމަލާގައި ޒަޚަމްވެފައިވަނީ ބަންގްލަދޭޝްގެ އަންސާރު ޕެރާމިލިޓަރީ ފޯސްގެ ދެ މެންބަރުންނާއި، ވޯޓުލާން ދިޔަ މީހަކާއެކު އެ ތަނަށް ގޮސް ހުރި އުމުރުން 14 އަހަރުގެ އާމިނާ ޚާނަމްއެވެ.

މި ގޮވުމާއެކު ވޯޓުލާން ގޮސް ތިބި މީހުންގެ މެދުގައި ބޮޑު ބިރުވެރިކަމެއް ފެތުރިގެން ދިޔައިރު، ފުލުހުން ބުނި ގޮތުގައި މި ހަމަލާގެ ސަބަބުން ވޯޓުލާ މަރުކަޒުގެ މައި ދޮރާއްޓަށް ވަނީ އެކި ވަރުގެ ގެއްލުންތައް ލިބިފައެވެ. މި ހާދިސާއާ ގުޅިގެން އެ ސަރަހައްދުގެ ސަލާމަތީ ކަންކަން މިހާރު ވަނީ އިތުރަށް ވަރުގަދަކޮށްފައެވެ.

ބަންގްލަދޭޝްގައި މިއަދު ކުރިއަށްދާ އިންތިޚާބަކީ 2024 ވަނަ އަހަރު ދަރިވަރުން އިސްވެ ތިބެ ކުރި މުޒާހަރާތަކާ ގުޅިގެން ހަސީނާ މަގާމުން ވަކިވެވަޑައިގަތުމަށްފަހު ބާއްވާ ފުރަތަމަ އިންތިޚާބެވެ.

ބަންގްލަދޭޝްގެ އިލެކްޝަން ކޮމިޝަނުން ހާމަކޮށްފައިވާ ގޮތުގައި، މިއަދު ހެނދުނު 7:30ގައި ފެށި މި ވޯޓުލުން ކުރިއަށްދާނީ ހަވީރު 4:30 އާ ހަމައަށެވެ. މި އިންތިޚާބުގެ ކެމްޕޭން ކުރުން މިދިޔަ އަންގާރަ ދުވަހުގެ ހެނދުނު ވަނީ ނިންމާލާފައެވެ.

މި އިންތިޚާބުގައި ޖުމްލަ 300 ދާއިރާއަކަށް މެންބަރުން އިންތިޚާބުކުރާނެއެވެ. ވޯޓުލުން ކުރިއަށްދަނީ 64 ޑިސްޓްރިކްޓެއްގައި ގާއިމުކޮށްފައިވާ 42,761 ވޯޓުލާ މަރުކަޒުގައެވެ.

ބަންގްލަދޭޝްގެ ގާނޫނު ހަދާ މަޖިލިސް ނުވަތަ "ޖާތިޔޯ ޝަންގްސަދު" އެކުލެވިގެންވަނީ ޖުމްލަ 350 ގޮނޑީގެ މައްޗަށެވެ. މީގެ ތެރެއިން 300 ގޮނޑިއަށް މެންބަރުން ހޮވަނީ ރައްޔިތުންގެ ސީދާ ވޯޓުންނެވެ. ބާކީ ހުރި 50 ގޮނޑިއަކީ އަންހެނުންނަށް ޚާއްސަކުރެވިފައިވާ ގޮނޑިތަކެކެވެ. މި ގޮނޑިތައް ބަހާލެވޭނީ އިންތިޚާބުގައި ޕާޓީތަކުން ކާމިޔާބުކުރާ ގޮނޑީގެ ނިސްބަތުންނެވެ.

މިފަހަރުގެ އިންތިޚާބުގައި ވޯޓުލުމުގެ ހައްގު ލިބިފައިވާ 127.7 މިލިއަނަށްވުރެ ގިނަ މީހުން އެބަތިއްބެވެ. މީގެ ތެރޭގައި ރާއްޖެ ހިމެނޭހެން ބޭރު ގައުމުތަކުގައި މަސައްކަތްކުރާ 15 މިލިއަނެއްހާ ބަންގްލަދޭޝް ރައްޔިތުންނަށް ފުރަތަމަ ފަހަރަށް ޕޯސްޓަލް ވޯޓު މެދުވެރިކޮށް ވޯޓުލުމުގެ ފުރުސަތު ވަނީ ހުޅުވާލާފައެވެ.

2024 ވަނަ އަހަރުގެ ޖުލައި މަހު ބަންގްލަދޭޝްގައި، ސަރުކާރުގެ ވަޒީފާގެ ކޯޓާ ސިސްޓަމާ ދެކޮޅަށް ދަރިވަރުން ފެށި މުޒާހަރާތަކުގައި 1,400 އެއްހާ މީހުން މަރުވެ، 20,000 އަށްވުރެ ގިނަ މީހުން ޒަޚަމްވެފައިވާއިރު، ހަމަނުޖެހުންތަކާ ގުޅިގެން ހަސީނާ އިސްތިއުފާ ދެއްވައި އިންޑިއާއަށް ފިލައިވަޑައިގަތުމުން، ގައުމު ހިންގުމާ ވަގުތީގޮތުން ހަވާލުވެވަޑައިގަތީ ނޯބެލް އިނާމު ހާސިލުކުރައްވާފައިވާ މުހައްމަދު ޔޫނުސްއެވެ.

ޝެއިޚް ހަސީނާގެ މައްޗަށް އިންސާނިއްޔަތާ ޚިލާފު ޖަރީމާތައް ހިންގިކަމުގެ ކުށް ސާބިތުވެ، ބަންގްލަދޭޝްގެ ކޯޓަކުން ވަނީ އެކަމަނާގެ މައްޗަށް މަރުގެ ހުކުމް އިއްވާފައެވެ. އަދި އެކަމަނާގެ ޕާޓީ، އަވާމީ ލީގު ވަނީ ސިޔާސީ ހަރަކާތްތަކުން މަނާކޮށްފައެވެ.

މި އިންތިޚާބާ އެކު، ބަންގްލަދޭޝްގެ ގާނޫނު އަސާސީއަށް ގެންނަންޖެހޭ ބަދަލުތަކާ ގުޅޭގޮތުން އެކުލަވާލާފައިވާ "ޖުލައި ނޭޝަނަލް ޗާޓަރ 2025" އަށް ރައްޔިތުންގެ ފެންނަ ނުފެންނަ ވޯޓެއް ނެގުންވެސް ކުރިއަށްދާނެއެވެ. މި އިންތިޚާބުން ހޮވޭ މަޖިލީހުގައި 151 ގޮނޑި ކާމިޔާބުކުރާ ޕާޓީއަކަށް އަމިއްލައަށް ސަރުކާރު އެކުލަވާލުމުގެ ފުރުސަތު ލިބޭނެއެވެ.