ޢުމްރާއަށް ގެންދިޔަ އުމްރާވެރިންތަކެއްގެ ޓިކެޓު ކެންސަލްވެ، އެމީހުން ސަޢޫދީގައި ތާށިވި މައްސަލައިގައި ޖަލުގައި ބަންދުކޮށްފައިވާ މަޝްއަރު ގްރޫޕުގެ ވެރިޔާ އަލީ ފާރިޝް ޖަލު ބަންދުން ގެ ބަންދަށް ބަދަލުކޮށްފި އެވެ.

ޢުމްރާވެރިންނަށް ލަނޑުދިން މައްސަލާގައި ފާރިޝްގެ މައްޗަށް ތިން އަހަރުގެ ޖަލު ހުކުމެއް އިއްވި އެވެ. އެއީ އޭޕްރީލް 17, 2025 ގަ އެވެ. ޖަލުގައި ބަންދުކުރިތާ 11 މަހެއްހާ ދުވަސް އޭނާ މިހާރު ވަނީ ގެ ބަންދަށް ބަދަލުކޮށްފަ އެވެ. އެކަން ކަރެކްޝަނުން ވެސް ޔަގީންކޮށް ދިނެވެ.

އެ އިދާރާއިން ބުނީ އޭނާ ގެ ބަންދަށް ލުއި ދީ ގެއަށް ބަދަލުކުރީ ބަލި ހާާލަތު ހުރި ގޮތުން ކަމަށެވެ. ނަމަވެސް އެކަމުގެ ތަފްސީލެއް ނުދެ އެވެ. އަދި ގެ ބަންދަށް ބަދަލުކުރީ ކިހާ ދުވަހަކަށް ކަމެއްވެސް ނުބުނެ އެވެ.

ފާރިޝްގެ މައްޗަށް އުފުލި ދައުވާތަކަށް އޭނާ ދެކޮޅު ހެދި ނަމަވެސް، އެ މައްސަލައިގެ ޙުކުމުގައި ވަނީ ހެކިތަކަށް ރިއާޔަތްކޮށް އެ ދައުވާ އަކީ ގާނޫނުއަސާސީގެ 51 ވަނަ މާއްދާގައި ބަޔާންކުރާ، އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާ ކަމަށް ކަނޑައަޅާފަ އެވެ.

އަދި އެ ކުށުގެ އަދަބެއްގެ ގޮތުން ތިން އަހަރާއި ދެ މަސް ދުވަހަށް ޖަލަށް ލުމާއެކު، އޭނާގެ ފަރާތުޖް އޭސް އޭވިއޭޝަނާއި އޭސް ޓެރްވަލްސްއަށް ލިބުނު ގެއްލުމުގެ ބަދަލުގެ ގޮތުގައި 26،350.32 ޑޮލަރު ނުވަތަ 406،321ރ. އެ ކުންފުންޏަށް ދެއްކުމަށް ކޯޓުން ވަނީ އަމުރުކޮށްފަ އެވެ. އަދި އެ ފައިސާ ދެ އަހަރުގެ ތެރޭގައި ދައްކައި ޚަލާސް ކުރުމަށް ވެސް ކޯޓުން ވަނީ އަމުރުކޮށްފަ އެވެ.