އަންނަ އޮކްޓޫބަރު މަހުގެ ތެރޭގައި ޕީއެންސީގެ ކޮންގްރެސް އޮންނާނެ ކަަމަށް އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ދަ ގްރޭޓާ އައްޑޫ ވިޝަންގެ ތަފްސީލު ލޯންޗުކުރުމުގެ މިރޭ އާޓިފިޝަލް ބީޗުގައި އޮތް ހަފްލާގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ޕީއެންސީގެ ކޮންގްރެސް އަންނަ އޮކްޓޫބަރު މަހު އޮންނާނެ ކަމަށެވެ. އެ ނިންމުން ޕާޓީގެ ލީޑާޝިޕުން ނިންމާފައިވާ ކަަމަށް ވިދާޅުވި އެވެ.
ރައީސް ވަނީ މިއީ އެ ޕާޓީގެ މެންބަރުންގެ އަދަދު އެއްލައްކައަށް އިތުރުކުރަން މަަސައްކަތް ކުރަންވީ ވަގުތު ކަމަށެވެ. 2023 ވަނަ އަހަރު ޕީއެންސީގައި ތިބީ 3,000 މެންބަރުން ކަމަށާ ނަމަވެސް މިއަދު އެ ޕާޓީގައި 75,000 ވުރެ ގިނަ މެންބަރުން އެބަ ތިބި ކަމުގައި ވިދާޅުވި އެވެ. ރައީސް ވިދާޅުވީ އެކަމުގެ ހުރިހާ ޝުކުރެއް ހައްގީ ޕާޓީގެ މެންބަރުންނަށް ކަމަށެވެ.
ޕީއެންސީއަށް ގަދަކަމުން މެންބަރުން ނުވައްދާނެ ކަމަށާ ކޮންމެ މެންބަރަކީ ފުރިހަމަ ރުހުމުގައި ޕާޓީއާ ގުޅިފައިވާ މެންބަރުން ކަމުގައި ވިދާޅުވި އެވެ.
ރައީސް ވިދާޅުވީ ކުރިއަށް އޮތް ކޮންގްރެސް އަކީ ސިޔާސީ މަސައްކަތުގައި ކުރިއަށްދާން ހުޅުވާލެވޭނެ ވަރަށް ރަނގަޅު ފުރުސަތެއް ކަމަށެވެ. އެހެން ކަމުން ކޮންގްރެސްގެ ކުރީން އެ ޕާޓީއާ އިތުރު މެންބަރުން ގުޅުމަށް އެދިވަޑައިގަތެވެ. އަދި ވިދާޅުވީ އެކި ސަބަބުތައް ދިމާވެ ކުޑަކޮށް ހިތްހަމަނުޖެހިފައި ތިބި މެންބަރުން ވެސް ޕާޓީއާއެކު އިތުރަށް މަސައްކަތް ކޮށް ދިނުމަށް އެދިވަޑައިގަތެވެ.
އެމަނިކުފާނު ޔަގީންކަން ދެއްވީ ކޮންގްރެސްގައި މަގާމުތަަކަށް މެންބަރުން އިންތިހާބު ކުރާނީ ދެފުށްފެންނަ އަދި ވަރަށް އިންސާފުވެރި ކަމާއެެކު ކަމެވެ.
Advertisement
This content is created and paid for by advertisers and does not involve Voice Journalists
