ދަ ގްރޭޓާ އައްޑޫ ގެ ތަޞައްވުރާއެކު ފެށިގެންދާނީ އައު ބާބެއް ކަމަށާ އެއީ އައްޑޫގެ ތަރައްގީގެ އައު މަރުޙަލާއެއް ކަމަށް ކޮންގްރެސް ޕާޓީގެ ޓިކެޓްގައި އައްޑޫސިޓީގެ މޭޔަރުކަމަށް ކުރިމަތިލައްވާފައިވާ ކެނޑިޑޭޓް މުޝްރިފް އަލީ ވިދާޅުވެއްޖެއެވެ.
”ދަ ގްރޭޓާ އައްޑޫ“ ވިޝަން އިފްތިތާޙް ކުރުމަށް ރޭ ބޭއްވި ޙާއްސަ ހަފްލާގައި ވާހަކަދައްކަވަމުން މުޝްރިފް ވިދާޅުވީ، އައްޑޫގެ ރައްޔިތުންނަކީ ހީވާގި، މަސައްކަތްތެރި، އަދި އަމިއްލަ ފައިމައްޗަށް ތެދުވުމުގެ ޤާބިލްކަންހުރި ކާމިޔާބު ބައެއް ކަމަށެވެ. އެގޮތުން، އައްޑޫގެ ރައްޔިތުން، އެކިއެކި ދާއިރާތަކުން ރާއްޖެއަށް ކޮށްދީފައިވާ ޚިދުމަތްތަކުގެ އަގު ނުކުރެވޭނެ ކަމަށްވެސް އޭނާ ވިދާޅުވިއެވެ.
މިއާއެކު އޭނާ ވަނީ، އައްޑޫގެ ރައްޔިތުން ރާއްޖެއާއި ރާއްޖެއިން ބޭރުގައި ދައްކަމުންދާ ހުނަރާއި، ހަކަތައާއި އަދި ތަރައްޤީގެ ރޫޙް، އަމިއްލަ ސިޓީގައި ވަރުގަދަވެއްޖެ ނަމަ އައްޑޫއަށް އަންނާނެ ބޮޑު ބަދަލާމެދު ސުވާލުުކުރައްވާފައެވެ.
މިރޭ ތަފްސީލްކޮށް މި ދެންނެވުނު ދަ ގްރޭޓާ އައްޑޫގެ ތަޞައްވުރުގެ އަސްލަކީ މިއީ. މިއީ ހަމައެކަނި ޗާޓެއްގައި ކުރަހާ ކުރެހުމެއްނޫން. މިއީ އިގްތިޞާދީގޮތުން ވަރުގަދަ އަދި ދެމެހެއްޓެނިވި މުސްތަގުބަލަކަށް އައްޑޫ ތައްޔާރުކުރުމުގެ މަސައްކަތެއް
މުޝްރިފް އަލީ
މުޝްރިފް އިތުރަށް ވިދާޅުވީ، އައްޑޫއަކީ ތަރައްގީއަށް ބޭނުންވާ ހުރިހާ ސިފަތަކެއް ފުރިހަމަވެފައިވާ ތަނެއް ކަމަށެވެ. ނަމަވެސް ހަމައެކަނި ގާބިލްކަން ހުރުމަކީ، އައްޑޫ ރައްޔިތުން އެދޭފަދަ ސިޓީއަކަށް އެތަން ބަދަލުކުރެވޭނެ ކަމެއް ނޫންކަމަށެވެ. އެހެންކަމުން އާ ބިންގަލެއްމަތީގައި ފައިތިލަ ސާބިތުކޮށް ތެދުވަންވީ ވަގުތު އައިސްފައިވާ ކަމަށްވެސް އޭނާ ވިދާޅުވިއެވެ.
ދަ ގްރޭޓާ އައްޑޫގެ ތަޞައްވުރަކީ، އައްޑޫގެ ތަރައްގީގެ މަރުހަލާގެ އައު ބިންގާ. މިއީ އަމިއްލަވަންތަކަާއި އިގްތިސާދީ ފުރުސަތުތައް ގުޅުވައިދޭ ބިންގާ. މިމަގު ހޯދާނެ ކާމިޔާބީ އަކީ ހަމައެކަނި މިސިޓީއަށް އޮތް ފައިދާއެއް ނޫން. މިއީ ރާއްޖޭގެ އިގްތިޞާދަށް ލިބޭނެ ވަރަށް ބޮޑު ކުރިއެރުމެއް.
މުޝްރިފް އަލީ
މުޝްރިފް ވިދާޅުވީ، ދަ ގްރޭޓާ އައްޑޫގެ ތަޞައްވުރާއެކު ފެށިގެންދަނީ އައު ބާބެއް ކަމަށާ، އައްޑޫ ރައްޔިތުން ކޮންމެ ތަނެއްގައި ތިބި ނަމަވެސް، އެ ތަޞައްވުރު ހަގީގަތަކަށް ހަދާނެ ކަމަށެވެ.
Advertisement
This content is created and paid for by advertisers and does not involve Voice Journalists
