މައި ދެ އިންތިހާބު ކަމަށްވާ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ސަރުކާރުން ގެންގުޅޭ ވިސްނުމަށް ތާއީދު ކުރާ ކަމަށް މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އިން ބުނެފި އެވެ.
އެމްޑީއޭ އަކީ ވިޔަފާރިވެރިޔާ އަހްމަދު ސިޔާމް މުހައްމަދު ލީޑަރުކަން ކުރާ ޕާޓީ އެވެ. އެ ޕާޓީއަކީ މި ސަރުކާރު ގެނައުމަށް ރިޔާސީ އިންތިހާބުގެ ދެވަނަ ބުރުގައި ތާއީދުކުރި ޕާޓީ އެކެވެ. ނަމަވެސް ފަހުން ވަނީ މި ސަރުކާރާއި ވަކިވެފަ އެވެ. އެ ޕާޓީ ރިޔާސީ އިންތިހާބުގެ ފުރަތަމަ ބުރުގައި އޮތީ އެމްޑީޕީ ކޯލިޝަންގަ އެވެ.
އެމްޑީއޭ އިން މިއަދު ބަޔާނެއް ނެރެ ބުނީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ސަރުކާރުން ގެންގުޅޭ ވިސްނުމަށް ތާއީދު ކުރާ ކަމަށެވެ. އެ ނިންމުމަށް މަރުހަބާ ކިޔާ ކަަމަށް ވެސް ބުންޏެވެ.
ދެ އިންތިހާބު އެއް ދުވަހެއްގައި ބޭއްވުމާމެދު ފަހު ބަސް އިއްވާނީ ރައްޔިތުންނެވެ. އެ ނިންމުން ރައްޔިތުން ނިންމާނީ އަންނަ މަހުގެ ހަތަރުވަނަ ދުވަހު އެވެ.
ހަރަދު ކުޑަވާނެ, ދަރަނި މެނޭޖްކުރެވޭނެ, ހަމަޖެހުން އަންނާނެ
އެމްޑީއޭ އިން ބުނީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ސަރުކާރުން ގެންގުޅޭ ވިސްނުމަށް ތާއީދު ކުރަނީ އެކަމުން ފައިދާ ބޮޑުވުމުން ކަމަށެވެ. އެގޮތުން ދެ އިންތިހާބު އެއް ދުވަހެއްގައި ބޭއްވުމަކީ ރާއްޖޭގެ އިގްތިސާދީ ހާލަތާއި، ގައުމުގެ ސުލްހަމަސަލަސްކަމަށް ރިއާޔަތްކުރާއިރު، ދިވެހި ދައުލަތަށާއި، ރައްޔިތުންނަށް އެންމެ ފައިދާހުރި ގޮތް ކަމަށެވެ.
އަދި އިންތިހާބުތައް އެއް ދުވަހެއްގައި ބޭއްވުމުން ދައުލަތުގެ ހަރަދުތައް ކުޑަކުރުމަށާއި ދަރަނި މެނޭޖްކުރަން ލިބޭނެ ވަރަށް ބޮޑު ލުޔަކަށް ވާނެ ކަމަށް ސަރުކާރުން ބުނާ ބުނުމަށް ފުރިހަމައަށް ތާއީދު ކުރާ ކަމަށެވެ.
އެމްޑީއޭއިން ބުނީ މިއީ ރަނގަޅު ފިޔަވަޅެއް ކަމަށެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ސަރުކާރު ހިންގާ ޕީއެންސީއާ ޖުމްހޫރީ ޕާޓީން ވެސް ތާއީދު ކުރެ އެވެ. އެކަމާއި ދެކޮޅީ އެމްޑީޕީއާ ކުރީގެ ރައީސް ޔާމީންގެ ޕީއެންއެފް އިންނެވެ.
Advertisement
This content is created and paid for by advertisers and does not involve Voice Journalists
