އެމެރިކާއާ އިޒްރޭލުން މެދުއިރުމަތީގެ ހަމަނުޖެހުން ނަގާލަން ފެށި ހަނގުރާމާގައި ލިބޭ ގެއްލުން ފޫބަން 100 މިލިއަން ޑޮލަރުގެ ލޯނެއް ނަގަން މަސައްކަތް ކުރަމުންދާ ކަމަށް ސަރުކާރުން ބުނެފި އެވެ.

މެދުއިރުމަތީގައި ފެށިފައިވާ ހަނގުރާމައާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެކުލަވާލެއްވި ވަޒީރުންގެ ހާއްސަ ކޮމިޓީން މިއަދު ބޭއްވި ނޫސްވެރީންގެ ބައްދަލްވުމުގައި ވާހަކަ ދައްކަވަމުން ފިނޭންސް މިިނިސްޓަރު މޫސާ ޒަމީރު ވިދާޅުވީ މެދުއިރުމަތީގެ ހަނގުރާމަ ދިގުލައިގެން ގޮސްފިނަމަ ރާއްޖެއަށްވެސް ބޮޑެތި ގެއްލުންތަކެއް ލިބޭނެ ކަމަށެވެ.

އެގޮތުން މި ހަނގުރާމަ މަސް ދުވަހަށް ދިގުލައިގެން ގޮސްފިނަމަ 85 މިލިއަން ޑޮލަރާއި 100 މިލިއަން ޑޮލަރާ ދެމެދުގެ ގެއްލުމެއް ވާނެ ކަމަށް މިނިސްޓަރު ވަނީ ލަފާކޮށްފަ އެވެ. މިނިސްޓަރު ވިދާޅުވީ ފަތުރުވެރީން އަންނަ މިންވަރު މަދުވުމާއި ތެލަށް ކުރަން ޖެހޭ ހަރަދު ބޮޑުވުމުގެ ސަބަބުން ބޮޑު ހޭދައެއް ކުރަން ޖެހޭނެ ކަމަށެވެ.

މިއަދުގެ ބައްދަލްވުމުގައި ޓްރާސްޕޯޓް މިނިސްޓަރު މުހައްމަދު އަމީން ވިދާޅުވި ގޮތުގައި އެވްރެޖްކޮށް ކޮންމެ ދުވަހަކު 20 ފްލައިޓް ދަނީ ކެންސަލް ވަމުންނެވެ. ހަނގުރާމައިގެ ކުރީން ދުވާލަކު 60 ފްލައިޓް ރާއްޖެ އައި ނަމަވެސް 19 ނޫނީ 20 ފްލައިޓް ކެންސަލް ވާތީ އެއީ ދުވާލަކު 2800-3000 ޓޫރިސްޓުން މަދުވުން ކަމުގައި ވިދާޅުވި އެވެ.

މިނިސްޓަރު ޒަމީރު ވިދާޅުވީ ގެއްލުންތައް ފޫބައްދަން 100 މިިލިއަން ޑޮލަރު ބޭނުންވާނެ ކަމަށެވެ. އެހެން ކަމުން އެ ފައިސާ ހޯދުމުގެ މަސައްކަތް މިހާރު ކުރަމުންދާ ކަމަށް ވިދާޅުވި އެވެ. އަދި އެ މަސައްކަތް އޮތީ ކާމިޔާބު ވުމުގެ މަރުހަލާގައި ކަމަށް ވިދާޅުވި އެވެ.

އަދި ރައީސްގެ އެޕްރޫވަލަށް މިހާރު ފޮނުވާފައިވާ ކަމަށް މިނިސްޓަރު ވިދާޅުވި އެވެ. ނަމަވެސް ލޯނާއި ގުޅޭ އިތުރު ތަފްސީލެއް މިނިސްޓަރު މިއަދު ނުދެއްވަ އެވެ.