އިންޑިއާގައި ކައްކާ ގޭސް ލިބުން ދަތިވެ، އެންމެފަހުން ރެސްޓޯރެންޓްތަކަށް އެކަމުގެ ދަތިކަން އިންތިހާއަށް ކުރިމަތިލާން ޖެހިއްޖެއެވެ.

އިންޑިއާގެ ބައެއް މީޑިއާތަކުން މިއަދު ރިޕޯޓްކުރިގޮތުގައި ވިޔަފާރިތަކަށް ކައްކާ ގޭސް ނުލިބުމުގެ މައްސަލަ ވަނީ އިންތިހާއަށް ކުރިމަތިވެފައެވެ. އެކަމާހުރެ ބައެއް ރެސްޓޯރެންޓްތައް ބަންދުކޮށް، ގިނަ ރެސްޓޯރެންޓްތަކަކުން ވަނީ މެނޫގައި ހިމެނޭ ގިނަ އައިޓަމްތަކެއް މިވަގުތައް ވަރަށްބޮޑަށް މަދުކޮށްލާފައެވެ.

ފްރާންސް 24 ނޫހަށް ވާހަކަދައްކަމުން ގުޖަރާތް ސްޓޭޓްގެ ރެސްޓޯރެންޓެއްކަމަށްވާ ސްޕައިސީ ޑައިން އިން ރެސްޓޯރެންޓުން ވަނީ ކައްކާ ގޭސް ނުލިބުމުގެ މައްސަލަ ވަރަށް ބޮޑުކަން ފާހަގަކޮށްފައެވެ. އެގޮތުން ރެސްޓޯރެންޓްގެ ބަދިގޭ ތެރެއިން މިހާރު ފެންނަން ހުރީ ހުސް ފުޅިތައްކަމަށް އެ ރެސްޓޯރެންޓުގެ ފަރާތުން ވާހަކަދެއްކި މީހަކު ވަނީ ބުނެފައެވެ. 

ބެންގަލޫރުގައި 12 ރެސްޓޯރެންޓް ހިންގާ ސައީދު ޖަމީލް ބުނީ ގޭހުގެ ސަޕްލައިއަށް ބަލާއިރު، "ކޮމާޝަލް ސަޕްލައި" މުޅިން ހުއްޓިއްޖެ ކަމަށެވެ.

"ލިބެން ހުރި ގޭހުގެ އަގު ހަތަރު ގުނަ ބޮޑު. އެހެންވެ މެނޫ ގާތްގަނޑަކަށް 50 އިންސައްތަ މަދުކޮށްފިން" ޖަމީލް ބުންޏެވެ.

ގޭހުގެ ބަދަލުގައި ރެސްޓޯރެންޓްތަކުން ދަނީ ބޯޓުދެލި، ދަރު އަދި އިލެކްޓްރިކް ފްރަޔާ ފަދަ ވަސީލަންތައް ހޯދަމުންނެވެ. ނަމަވެސް ޖަމީލް ބުނީ، ރެސްޓޯރެންޓް ފަދަ ތަންތަނުގައި ކައްކަން ބޭނުންކުރަން ބޯޓުދެއްޔާއި، ދަރަށް ބަރޯސާވެވެން ނޯންނަ ކަަމަށެވެ. 

ގުޖުރާތު ސްޓޭޓުގެ ޝެފް ލީޖޫ ނިނާން ބުނީ "އަހަރެމެން މި ތިބީ ހަމަ ކިރިޔާ ސަލާމަތްވެގެން ކަމަށާއި ސަޕްލައިއެއް ނެތް. މެނޫގައި މިހާރު ހުންނާނީ ދޭއް ނުވަތަ ތިން ބާވަތް އެކަނި" ކަމަށެވެ.

ކަންކަން މިދާގޮތަށް ބަލާއިރު، އަދި އިތުރު ފަސްދުވަހު މިކަމުގައި ތަހައްމަލުކޮށްގެން ހުންނަން ޖެހިދާނޭކަމަށް ޝެފް ލީޖޫ ނިނާން ބުންޏެވެ. "ނޫނީ ދެން އިތުރު ފަސްދުވަހަށް މިކަން ދިގުލައިގެން ހިނގައްޖެނަމަ ރެސްޓޯރެންޓް ޖެހޭނީ ބަންދުކުރަން" އޭނާ ބުންޏެވެ.

އިންޑިއާގައި ކައްކާ ގޭހުގެ އަގު ބޮޑުވެ، ލިބުން ދަތުވުމާ ގުޅިގެން ނެޝަނަލް ރެސްޓޯރެންޓް އެސޯސިއޭޝަން އޮފް އިންޑިއާ (އެންއާރުއޭއައި) އިން ވަނީ މާޗް 11 ގައި ޕެޓްރޯލިއަމް ވަޒީރަށް ސިޓީއެއްވެސް ފޮނުވާފައެވެ. އެގޮތުން މި ސިޓީގައި އެފަރާތްތަކުން ވަނީ ރެސްޓޯރެންޓްތަކަށް މެދުނުކެނޑި ކޮމާޝަލް ގޭސް ފޯރުކޮށްދިނުމަށް ގޮވާލާފައެވެ.

ހުޅަނގު އިންޑިއާއަށް ނިސްބަތްވާ ހޮޓެލް އެންޑް ރެސްޓޯރެންޓް އެސޯސިއޭޝަނުން ނެރެފައިވާ ބަޔާނެއްގައި ބުނެފައިވަނީ، ކުރިއަށްއޮތް ދެ ދުވަހެއްގެ ތެރޭގައި މި ހާލަތު ރަނގަޅު ނުވެއްޖެ ނަމަ، މުމްބާއީގެ ދެބައިކުޅަ އެއްބައި ރެސްޓޯރެންޓް ބަންދުކުރަން ޖެހިދާނެ ކަމަށެވެ.

އިންޑިއާގައި ކައްކާ ގޭސް ލިބުން ދަތިކަމަށް މީޑިއާތަކުން ފާހަގަކުރިނަމަވެސް އިންޑިއާ ސަރުކާރުން ބުނެފައިވަނީ ގޭހުގެ ދަތިކަމެއް ނެތް ކަމަށެވެ. އެގޮތުން އިންޑިއާގެ ބޮޑުވަޒީރު ނަރެންދުތަ މޯދީ މާޗް 12 ގައި ވިދާޅުވެފައިވަނީ ބައެއް މީހުން މިކަމުގައި މީހުންގެ ހިތްތަކުގައި ބިރުވެރިކަން އުފެއްދުމަށް މަސައްކަތް ކުރަމުންދާކަމަށެވެ. އިންޑިއާ ސަރުކާރުން ވަނީ، ކުރިމަތިވި މި ދައްޗާއެކު ޤައުމީ ފެންވަރުގައި ގޭސް އުފައްދާ މިންވަރު އިތުރުކުރުމަށް މަސައްކަތް ކުރަމުންދާކަމަށް ބުނެފައެވެ.

އިންޑިއާގެ ރެސްޓޯރެންޓްތަކަށް ކައްކާ ގޭސް ލިބުން ކުއްލިއަކަށް ދަތިވި މައިގަނޑު ސަބަބަކީ ވިޔަފާރިތަކަށް ގޭސް ސަޕްލައިކުރުން ހިފެހެއްޓުމަކަށްގެނެސް ގޭބިސީތަކަށް ގޭސް ފޯރުކޮށްދިނުމުގައި އިސްކަން ދިނުމުންނެވެ. ސަރުކާރުގެ މިހާރު ސިޔާސަތަކީ ކައްކާ ގޭސް ފޯރުކޮށްދިނުމުގައި ގޭބިސީތަކާއި، ތައުލީމްދޭ ތަންތަނައި ހޮސްޕިޓަލްތައް އިސްކުރުމެވެ.