މިހާރު ފެންނަމުން މިދަނީ އޮމާނުން ތެޔޮ އެތެރެކުރަން ނިންމި ނިންމުމުގެ ރަނގަޅު ނަތީޖާ ކަމަށް އެސްޓީއޯގެ ކުރީގެ މެނޭޖިންގ ޑިރެކެޓަރ ހުސައިން އަމްރު ވިދާޅުވެއްޖެއެވެ.
އަމްރު އެކްސް ގައި ކުރެެއްވި ޕޯސްޓް އެއްގައި ވިދާޅުވީ 2019 ވަނަ އަހަރު އޮމާނުން ތެޔޮ އެތެރެކުރުމަށް ދިވެހި ސަރުކާރުން ނިންމި ނިންމުމަށް އެތައް ބަޔަކު ފާޑުކިޔާފައިވާ ކަމަށެވެ.
ނަމަވެސް އޮމާނުން ތެޔޮ ގަންނަން ނިންމީ ދިވެހިރާއްޖެއާއި އޮމާނާއި ދޭތެރެ ކުރަން ޖެހޭ ދަތުރު ކުރުވުމުގެ ސަބަބުން ވަގުތު ސަލާމަތްކުރެވި އަދި ހަރަދު ކުޑަވުމަށް މަގުފަހިވެގެންދާތީކަމަށް އަމްރު ވިދާޅުވިއެވެ.
އަދި މީގެއިތުރުން އޮމާންއަކީ ސިޔާސީ ގޮތުން ވެސް ހަމަޖެހޭ ސްޓޭބަލް ޤައުމެއް ކަން އޭނާ ފާހަގަ ކުރެއްވިއެވެ.
މިއާއެކު އަމްރު ވަނީ މެދުއިރުމަތީގެ މަޝްރަޙް ހޫނުވެފައިވާ މި ދަނޑިވަޅުގައި، ތެލުގެ އަގުމަތިވެ ތެޔޮ ލިބުން ދަތިވާންފަށާފައިވާއިރު، ތެޔޮ ބޭނުން ކުރުމުގައި ސަރުކާރާއި އަދި އާއްމު ރައްޔިތުންވެސް ސަމާލުވެ ތިބުމަށް އެދިފައެވެ.
އަމްރު މިފަދައިން ޕޯސްޓު ކުރައްވާފައިމިވަނީ މެދުއިރުމަތީގެ ހަމަނުޖެހުން ބޮޑުވެ ދުނިޔޭގެ 20% ތެޔޮ ދައުރުކުރާ ހޯރމޫޒް ކަނޑުއޮޅި އީރާނުން ބަންދުކޮށްފައިވާ ދަނޑިވަޅެއްގައެވެ.
ހަނގުރާމައާއި ގުޅިގެން ރައީސް ޑރ މުހައްމަދު މުޢިއްޒު އުފައްދަވާފައިވާ ވަޒީރުންގެ ކޮމިޓީން ބޭއްވި ނޫސްވެރިންގެ ބަދައްލުވުމުގައި ރާއްޖެގެ ތެލުގެ ހާލަތާއިގުޅިގެން ކަންބޮޑުވާފަދަ ހާލަތަކަށް ނުދާނެކަމަށް ވަޒީރުން ވަނީ ވިދާޅުވެފައެވެ.
ސަރުކާރުން ވަނީ ތެލުގެ ހަރަދުކުޑަކުރުމަށް ބައެއް ފިޔަވަޅު އަޅަން ނިންމިކަންވެސް އިއުލާންކުރައްވާފައެވެ. އެގޮތުން ޢީދު ދިއްލުން ރަށްރަށުގައި ނުދިއްލުމަށް ވަނީ ނިންމާފައެވެ.
Advertisement
This content is created and paid for by advertisers and does not involve Voice Journalists
