މެދުއިރުމަތީގެ މަސްރަހު ގޯސްވެ، ސަލާމަތީ ނުރައްކާތައް އިތުރުވުމާ ގުޅިގެން އިރާގުގައި ތިބި ސްޕެއިންގެ ސިފައިން އެ ގައުމުން ބޭރުކުރުމުގެ މަސައްކަތް ސްޕެއިން ސަރުކާރުން ފަށައިފިއެވެ. މި އޮޕަރޭޝަން ކުރިއަށް ގެންދަނީ ތުރުކީވިލާތުގައި ހުންނަ ނޭޓޯގެ އިންސިރްލިކް އެއާ ބޭސް މެދުވެރިކޮށް ކަމަށް ސްޕެއިންގެ ދިފާއީ ވުޒާރާއިން ވަނީ ކަށަވަރުކޮށްދީފައެވެ.
ސްޕެއިންގެ ދިފާއީ ވަޒީރު މާގަރީޓާ ރޮބްލެސް ވިދާޅުވި ގޮތުގައި، އިރާގުން ސިފައިން ބޭރުކުރުމަށް ނިންމީ އެ ސަރަހައްދުގައި ހިނގަމުންދާ ހަމަނުޖެހުންތަކުގެ ސަބަބުން ސިފައިންގެ ރައްކާތެރިކަން ކަށަވަރުކުރުމުގެ ގޮތުންނެވެ. މިގޮތުން ފުރަތަމަ ބުރުގައި ގާތްގަނޑަކަށް 100 އެއްހާ ސިފައިން މިހާރު ވަނީ ތުރުކީގެ އިންސިރްލިކް ބޭސްއަށް ގެންގޮސްފައެވެ. އަދި ކުރިއަށް އޮތް ގަޑިތަކުގެ ތެރޭގައި ބާކީ ތިބި 200 އެއްހާ ސިފައިންވެސް އެ ބޭސްއަށް ބަދަލުކުރެވޭނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.
މި އޮޕަރޭޝަނަކީ ވަރަށް ނުރައްކާތެރި އަދި އުނދަގޫ ހާލަތެއްގައި ކުރިއަށްދާ މަސައްކަތެއް ކަމަށް ރިޕޯޓްތައް ބުނެއެވެ. ސިފައިން ބޭރުކުރަމުންދާ ވަގުތު ބައެއް އަސްކަރީ މަރުކަޒުތަކުގެ ކައިރިއަށް މިސައިލް ހަމަލާތައް އަމާޒުވަމުންދާ ކަމަށާއި، މީގެ ސަބަބުން ސިފައިން ރައްކާތެރި ހިސާބުތަކަށް ބަދަލުކުރުމުގައި ގިނަ ގޮންޖެހުންތަކަކާ ކުރިމަތިލާން ޖެހިފައިވާ ކަމަށް ވަޒީރު ފާހަގަކުރެއްވިއެވެ. މި އޮޕަރޭޝަންގައި އެމެރިކާ އާއި ޖަރުމަނުގެ އަސްކަރީ މަތިންދާބޯޓުތަކުގެ އެހީތެރިކަންވެސް ސްޕެއިންއަށް ދަނީ ލިބެމުންނެވެ.
އިރާގުގައި ތިބި ސްޕެއިންގެ ސިފައިންނަކީ އައިއެސް ޖަމާއަތާ ދެކޮޅަށް ކުރާ މަސައްކަތުގައި އިރާގުގެ ސިފައިން ތަމްރީނުކުރުމަށް ތިބި ބަޔެކެވެ. ނަމަވެސް މިހާރު ސަރަހައްދުގައި ހިނގަމުންދާ ހަނގުރާމައިގެ ސަބަބުން އެ މަސައްކަތްތައް ކުރިއަށް ގެންދިއުމަށް ވަނީ ހުރަސް އެޅިފައެވެ. ސްޕެއިން ސަރުކާރުން ވަނީ މި ހަނގުރާމައިގައި ބައިވެރިނުވާނެ ކަމަށާއި، އެ ގައުމުގެ އަސްކަރީ މަރުކަޒުތައް ހަމަލާ ދިނުމަށް ބޭނުންކުރުމުގެ ހުއްދަ ނުދޭނެ ކަމަށްވެސް ބުނެފައެވެ.
ތުރުކީގެ އިންސިރްލިކް ބޭސްއަށް ގެންދާ ސިފައިން، މަސްރަހު ހަމައަކަށް އެޅެންދެން އެތަނުގައި މަޑުކުރުމަށްފަހު އެނބުރި ސްޕެއިންއަށް ދާނެ ކަމަށް ބެލެވެއެވެ. ސްޕެއިންގެ އިތުރުން ނޭޓޯގެ ބައެއް އެހެން ގައުމުތަކުންވެސް ދަނީ އެ ގައުމުތަކުގެ ސިފައިން އިރާގުން ބޭރުކުރުމުގެ މަސައްކަތް ކުރަމުންނެވެ. މިއީ މުޅި މެދުއިރުމަތީގައި މަސްރަހު ގޯސްވެ، ބޮޑު ހަނގުރާމައަކަށް ފެތުރިދާނެ ކަމުގެ ބިރު އޮތުމުން އަޅާފައިވާ ރައްކާތެރިކަމުގެ ފިޔަވަޅެކެވެ.
Advertisement
This content is created and paid for by advertisers and does not involve Voice Journalists
