އިތުރު މާކެޓްތަކުން ރާއްޖެއަށް ތެއޮ ގެނައުމުގެ މަސައްކަތް ފަށާފައިވާކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

މެދުއިރުމަތީގެ މަޝްރަހާ ގުޅޭގޮތުން ރާއްޖެއަށް ކުރަމުންދާ އަސަރުތައް ކުޑަކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އުފައްދަވާފައިވާ ވަޒީރުންގެ މަޖިލީހުގެ ކޮމިޓީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މާލީ ވަޒީރު ވިދާޅުވީ، އިތުރު މާކެޓްތަކުން ތެލުގެ ބާވަތްތައް ރާއްޖެއަށް ގެނައުމަށް މަސައްކަތް ފަށައި ކާމިޔާބުކަމާއެކު އެކަން ކުރިއަށްދާކަމަށެވެ. އެގޮތުން މެލޭޝިއާ އަދި ސިންގަޕޫރުން ތެއޮ ގެނައުމުގެ މަސައްކަތް ކުރިއަށްދާކަމަށް ވަޒީރު ފާހަގަކުރެއްވިއެވެ.

ޒަމީރު ވިދާޅުވީ ސިންގަޕޫރުކޮޅުން ގެންނަ ތެލުގެ ޝިމްޕަންޓް އަންނަމަހުގެ ކުރީކޮޅު ރާއްޖެ އަންނާނޭކަމަށެވެ. މީގެ ތެރޭގައި ހިމެނެނީ ޕެޓްރޯލާއި ޑީސަލެވެ.

މާލީ ވަޒީރު މޫސާ ޒަމީރު ވިދާޅުވީ، އަރަބިގައުމުތަކާއެކު އޮތް ގާތް ގުޅުމުގެ ސަބަބުން މި ދަނޑިވަޅުގައި ރަނގަޅު އަގުގައި ތެއޮ ލިބެމުންދާކަމަށެވެ. އެގޮތުން އޮމާނުން ކުރިއަށްއޮތްތަނުގައި އިތުރު ޝިޕްމަންޓެއް ރާއްޖެ އަންނާނޭކަން ވަޒީރު ވިދާޅުވިއެވެ.

ވަޒީރު ވިދާޅުވީ ދުނިޔޭގެ ބާޒާރުގައި ތެލުގެ އަގު ބޮޑުވިނަމަވެސް ރާއްޖޭގައި ތެލުގެ ބާވަތްތަކުގެ އަގު ބޮޑު ކުރުމުގެ ވިސްނުމެއް ސަރުކާރުގެ ނެތްކަންކަމަށެވެ. އެގޮތުން ސަރުކާރުން މަސައްކަތް ކުރަމުންދަނީ އިންތިޒާމުތައް ހަމަޖައްސައިގެން ރައްޔިތުންނަށް ހެޔޮ އަގުގައި ތެއޮ ފޯރުކޮށްދިނުމަށްކަމަށް ވަޒީރު ވިދާޅުވިއެވެ.