ރާއްޖެއިން މިއަހަރު ދަރަނީގެ ގޮތުގައި ދައްކަންޖެހޭ 500 މިލިއަން ޑޮލަރުގެ ސުކޫކް ދެއްކުމުގެ ކަންކަން ހަމަޖެހިފައިވާ ގޮތަށް ބަދަލެއް ނައިސް ކުރިއަށްދާނޭކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

ނޫސްވެރިންނާއެކު މިއަދު ބޭއްވި ބައްދަލުވުމުގައި ވާހަކަދައްކަވަމުން ވަޒީރު މޫސާ ޒަމީރު ވިދާޅުވީ، ސުކޫކް ދެއްކުމުގެ ކަންކަން ހަމަޖެހިފައިވާ ގޮތަށް ކުރިއަށްދާނޭކަމަށާއި ކަމުގައި ނުތަނަވަސްކަމެއް ނެތްކަމަށެވެ. ރާއްޖެއިން އަދާކުރަންޖެހޭ މި ސުކޫކު ދައްކަންޖެހޭ އެންމެ ފަހު ތާރީހަކީ މިއަންނަ އޭޕްރިލްމަހުގެ 8 ވަނަ ދުވަހެވެ.

ވަޒީރު ވިދާޅުވީ ސުކޫކު ދައްކާނީ ރީފައިނޭންސް ކޮށްގެން ކަމަށާއި، ސަރުކާރުގެ ވިސްނުމަކީ އެއްބައި ރީ ފައިނޭންސްކޮށް އަނެއްބައި ސަރުކާރުން ދެއްކުން ކަމަށެވެ. އަދި ވިދާޅުވީ ސުކޫކް ދައްކައި ނިމުމުން އެ މުއާމަލާތާ ގުޅޭ ކަންކަމުގެ މައުލޫމާތުތައް ހާމަކުރައްވާނޭކަމަށެވެ. 

މާލީ ވަޒީރު މިއަދުވެސް ވިދާޅުވީ 500 މިލިއަން ޑޮލަރުގެ ސުކޫކް ދެއްކޭނޭކަމުގެ ޔަގީންކަން އެބައޮތްކަމަށާއި، މާލީ ހާލަތު އޮތީ ރަނގަޅަށް ކަމަށެވެ. 

މިމަހުގެ ދެވަނަ ދުވަހު ނޫސްވެރިންނާ ވާހަކަދައްކަވަމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒުވެސް ވަނީ ސުކޫކް ދައްކަންޖެހިއްޖަނަމަ އެ ދެއްކުމުގެ ގާބިލްކަން ސަރުކާރުގެ އެބައޮތްކަމަށް ވިދާޅުވެފައެވެ. އެގޮތުން ސުކޫކް ދެއްކުމަށް 650 މިލިއަން ޑޮލަރަށްވުރެ ގިނައިން ފައިސާ ރައްކާ ކުރެވިފައިވާ ކަމަށާ، އޭގެތެރެއިން 320 މިލިއަން ޑޮލަރަކީ އެސްޑީއެފްގައި ރައްކާކުރެވިފައިވާ ފައިސާ ކަމަށެެވެ. އަދި އަނެއް 330 މިލިއަން ޑޮލަރަކީ ޔޫޒަބަލް ރިޒާވްގައި ހުރި ފައިސާ ކަމަށެވެ.