މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ތެލުގެ އަގަށް އަންނަމުންދާ ބަދަލުތައް ކުޑަކުރުމުގެ ގޮތުން، ޖަޕާނުގެ ސްޓްރެޓީޖިކް ތެޔޮ ރިޒާވުން އިތުރު ބައެއް ބޭރުކުރަން ފަށާފައިވާ ކަމަށް އެ ގައުމުގެ އޮފިޝަލަކު އޭއެފްޕީ ނިއުސް އެޖެންސީއަށް މައުލޫމާތު ދީފިއެވެ.
ޖަޕާނުގެ މިނިސްޓްރީ އޮފް އިކޮނޮމީ، ޓްރޭޑް އެންޑް އިންޑަސްޓްރީގެ އޮފިޝަލެއް ކަމަށްވާ ކަނާމޭ މޮރިމޯޓޯ ވިދާޅުވީ، ގައުމީ ރިޒާވުން ތެޔޮ ރިފައިން ކުރާ ކުންފުނިތަކަށް ތެޔޮ ދޫކުރަން ފަށާފައިވަނީ މިއަދު ހެނދުނު 10:59 (ޖީއެމްޓީން 01:59) ގައެވެ. މިއީ ތެލުގެ ބާޒާރު ހަމައަކަށް އެޅުވުމަށް އެ ގައުމުން އަޅަމުންދާ ފިޔަވަޅެކެވެ.
މި ނިންމުން ނިންމާފައިވަނީ ސަރުކާރުގެ ރިޒާވުން އެއް މަސް ދުވަހުގެ ތެޔޮ ދޫކުރާނެ ކަމަށް ޓޯކިޔޯއިން އިއުލާން ކުރުމުގެ ފަހުންނެވެ. އެހެންކަމުން، ޕްރައިވެޓް ސެކްޓަރުގެ ޕެޓްރޯލިއަމް ރިޒާވުން 15 ދުވަހުގެ ތެޔޮ ދޫކުރުމުގެ މަސައްކަތް އޮފިޝަލުން ވަނީ މިހާރު ފަށާފައެވެ.
ޖަޕާނަކީ ދުނިޔޭގައި ފަސްވަނައަށް އެންމެ ގިނައިން ތެޔޮ އެތެރެކުރާ ގައުމެވެ. ފާހަގަކޮށްލެވޭ ގޮތުގައި އެ ގައުމަށް ބޭނުންވާ ތެލުގެ 90 އިންސައްތައަށް ވުރެ ގިނަ ތެޔޮ އެތެރެކުރަނީ މެދުއިރުމަތީގެ ގައުމުތަކުންނެވެ. އެހެންކަމުން އެ ސަރަހައްދުގެ ހަމަނުޖެހުންތަކުގެ އަސަރު އެ ގައުމަށް ދަނީ ކުރަމުންނެވެ.
ސަރުކާރުގެ އިސް ތަރުޖަމާނު މިނޯރޫ ކިހާރާ އޭއެފްޕީއަށް ވިދާޅުވީ، ރިޒާވް ސްޓޭޝަންތަކުގެ ދެބައިކުޅަ އެއްބައިން ތެޔޮ ރިފައިން ކުރާ ހަތަރު ކުންފުންޏަކަށް ތެޔޮ ފޮނުވުމުގެ މަސައްކަތް މިއަދު ފެށުމަށް ހަމަޖެހިފައިވާ ކަމުގެ މައުލޫމާތު ލިބިފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
