ބަންގަލަދޭޝްއަކީ އިތުބާރުހުރި އަވަށްޓެރި ގައުމެއްގެ އިތުރުން ރާއްޖޭގެ ތަރައްގީގެ މުހިންމު ބައިވެރިއެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.  

ރައީސް މިހެން ވިދާޅުވީ، ބަންގްލަދޭޝްގެ މިނިވަން ދުވަހުގެ މުނާސަބަތުގައި، އެ ގައުމުގެ ރައީސް މުޙައްމަދު ޝަހާބުއްދީނަށާއި، ބޮޑުވަޒީރަށާއި، ސަރުކާރަށް އަދި ރައްޔިތުންނަށް ތަހުނިޔާ ފޮނުއްވައި އެކްސްގައި ކުރެއްވި ޕޯސްޓެއްގައެވެ.

ރައީސް ވިދާޅުވީ، ބަންގްލަދޭޝްގެ ތާރީޚުގައި މި ފާހަގަކުރާ މުހިންމު ދުވަހަކީ މިނިވަންކަމާއި މުސްތަޤުބަލަށް އޮތް އުންމީދުތައް ރަމްޒުކޮށްދޭ ދުވަހެއް ކަމަށެވެ. އަދި މި އުފާވެރި ފާހަގަކުރުންތަކަކީ އެ ގައުމުގެ ކުރިއެރުމާއި ލާބައަށް މަސައްކަތް ކުރުމަށް ބަންގްލަދޭޝްގެ ހުރިހާ ރައްޔިތުންނަށް ލިބިގެންދާނެ އިތުރު ހިތްވަރެއް ކަމުގައި ޔަގީންކުރައްވާ ކަމަށްވެސް އެމަނިކުފާނު ވިދާޅުވިއެވެ.

ބަންގްލަދޭޝްއަކީ ދިވެހިރާއްޖެއާ ގާތް ގުޅުމެއް ބާއްވާ، އިތުބާރު ހުރި އަވަށްޓެރި ގައުމެއްގެ އިތުރުން ތަރައްގީގެ މުހިންމު ބައިވެރިއެއްގެ ގޮތުގައި ރައީސުލްޖުމްހޫރިއްޔާ ސިފަކުރެއްވިއެވެ. ދެ ގައުމުގެ ރައްޔިތުންގެ މެދުގައި އޮތް ގާތް ގުޅުމަކީ ދެ ގައުމުގެ ކުރިއެރުމަށް މަގުފަހިކޮށްދޭ މައިގަނޑު އަސާސް ކަމަށްވެސް އެމަނިކުފާނު ފާހަގަކުރެއްވިއެވެ.

މީގެއިތުރުން، ދެ ގައުމުގެ ދެމެދުގައި އޮތް އެއްބާރުލުން އިތުރަށް ވަރުގަދަކުރުމަށްޓަކައި ކުރެވެމުންދާ ހެޔޮ މަސައްކަތްތަކާ މެދު އުފާކުރައްވާ ކަމަށް ވިދާޅުވެ، ރައީސުލްޖުމްހޫރިއްޔާ ވަނީ ބަންގްލަދޭޝްގެ ރައްޔިތުންނަށް ބާއްޖަވެރި މުސްތަޤުބަލަކަށް އެދިވަޑައިގެންފައެވެ.