ސަރުކާރުގެ ސިޔާސަތުގެ ދަށުން ފަށާފައިވާ އުމްރާނީ ތަރައްޤީގެ މަޝްރޫޢުތައް ހަލުއިކޮށް ކުރިއަށްގެންދިއުމުގެ ގޮތުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ގިނަ އަދަދެއްގެ މެޝިނަރީ ގެނެސްފިއެވެ.

އާރުޑީސީން މި މެޝިނަރީތައް ގެނެސްފައިވަނީ، ޗައިނާގެ (އެކް.ސީ.އެމް.ޖީ) ކުންފުންޏާއެކު ވެފައިވާ އެއްބަސްވުމުގެ ދަށުންނެވެ. އެކްސީއެމްޖީ ކުންފުނީގެ މެޝިނަރީތައް އާރުޑީސީއާ ހަވާލުކޮށްފައިވާއިރު، މިކަމަށްޓަކައި ތިލަފުށީގައި ވަނީ ރަސްމިއްޔާތެއް ބާއްވާފައެވެ.

ޗައިނާގެ ކުންފުންޏާއެކު ވެފައިވާ އެއްބަސްވުމުގެ ދަށުން ޖުމްލަ 230 ޔުނިޓުގެ ހެވީ މެޝިނަރީ ރާއްޖެއަށް ގެނައުމަށް ވަނީ ހަމަޖެހިފައެވެ. މީގެ ތެރޭގައި މަގު ހެދުމުގެ މަސައްކަތްތަކަށް އެންމެ މުހިންމު އެއް ސާމާނު ކަމަށްވާ އެސްފަލްޓް މެޝިނަރީތައް ވެސް ހިމެނެއެވެ. މިއީ ރާއްޖޭގެ ތާރީޚުގައި ވެސް އުމްރާނީ ތަރައްގީގެ މަސައްކަތްތަކަށް އެއްފަހަރާ މިހާ ގިނަ އަދަދެއްގެ މެޝިނަރީ ގެނައި ފުރަތަމަ ފަހަރެވެ.

އާރުޑީސީއަށް ގެނައި އާ މެޝިނަރީތައް އެކުންފުންޏާ ހަވާލުކުރުން..

މެޝިނަރީތައް ގެނައުމުގެ އިތުރުން، މި ތަކެތި މަރާމާތުކޮށް ބެލެހެއްޓުމަށްޓަކައި ޚާއްސަ ސާވިސް ސެންޓަރަކާއި ސްޕެއާ ޕާޓްސް ހަބެއް ރާއްޖޭގައި ވަނީ ގާއިމްކޮށްފައެވެ. މި ހަބް ގާއިމުކުރުމުން މެޝިނަރީއަކަށް މައްސަލައެއް ދިމާވެގެން މަސައްކަތް ހުއްޓިފައި އޮންނަންޖެހޭ ވަގުތު މަދުވެ، މަޝްރޫއުތައް މެދުނުކެނޑި ކުރިއަށް ގެންދިއުމަށް މަގުފަހިވާނެއެވެ.

މިއަދުގެ ރަސްމިއްޔާތުގައި ވާހަކަދައްކަވަމުން އާރްޑީސީގެ މެނޭޖިން ޑިރެކްޓަރ އިބްރާހީމް ނަޒީމް ވިދާޅުވީ ތަކެތި ލިބުމުން ކުއްޔަށް މެޝިނަރީ ހޯދުމަށް ދައުލަތުން ކުރަންޖެހޭ ޚަރަދު ވަރަށް ބޮޑަށް ކުޑަވެގެންދާނެ ކަމަށެވެ. އަދި ގުޅީފަޅާއި ގިރާވަރުފަޅު ފަދަ ބޮޑެތި ސަރަހައްދުތަކުގެ މަގު ހެދުމާއި އެހެނިހެން އުމްރާނީ މަސައްކަތްތައް އަވަސްކުރުމަށް މި މެޝިނަރީތައް ބޭނުންކުރާނޭކަމަށް އޭނާ ވިދާޅުވިއެވެ.

އާރުޑީސީއަށް ގެނައި އާ މެޝިނަރީގައި ހިމެނޭ ބައެއް އެއްޗެހި..

ނަޒީމް ވިދާޅުވީ ގެނައި މި މެޝިނަރިއާއެކު އެކުންފުނީގެ މަސައްކަތްތައް އެތައް ގުނައަކަށް ހަލުއިވެގެން ދާނެކަމަށާއި، މިހާތަނަށް މަސައްކަތްތައް ކުރަމުން އައިސްފައިވަނީ ބޮޑެތި ގޮންޖެހުންތަކާއެކު ކަމަށެވެ.

މި މަޝްރޫއުގެ ސަބަބުން ރާއްޖޭގެ އެކި ކަންކޮޅުތަކުގައި ކުރިއަށްދާ މަގު ހެދުމުގެ މަޝްރޫއުތަކަށް ދިމާވެފައިވާ ލޮޖިސްޓިކަލް ގޮންޖެހުންތަކަށް ދާއިމީ ހައްލެއް ލިބިގެންދާނޭކަމަށް އާރުޑީސީން ބުނެއެވެ. މިއީ ރާއްޖޭގެ އުމްރާނީ ދާއިރާ ޒަމާނީކޮށް، ސަރުކާރުގެ ތަރައްގީގެ ވަައުދުތައް ފުއްދުމަށް އެޅުނު މުހިންމު ފިޔަވަޅެއްކަމަށްވެސް އެކުންފުނިން ފާހަގަކުރެއެވެ.