59 އަށްވުރެ ގިނަ ގައުމީ މަޖިލިސް މެންބަރުން ސޮޔާއެކު އެމްޑީޕީގެ ވަގުތީ ޗެއާޕާސަންގެ މަގާމުން ޢަބްދުލްޣަފޫރު މޫސާ (ގަޕޯ) ވަކި ކުރަން ހުށައަޅައިފިއެވެ.
ޣަފޫރު މަގާމުން ވަކިކުރުމަށް އެދި ހުށަހެޅި މައްސަލާގައި ބުނީ، ޕާޓީގެ ވަގުތީ ޗެއަރޕަރސަންކަމުގެ މަގާމު، އޭނާއާ ހަވާލުކުރީ ސަރުކާރުން ހިންގަމުންގެންދާ ބޮޑެތި ޖަރީމާތައް ހުއްޓުވުމަށް ޕާޓީން ކުރަންޖެހޭ މަސައްކަތް އިންތިޒާމު ކުރުމަށް ކަމަށެވެ.
އަދި ޕާޓީއާމެދު ރައްޔިތުން ކުރަމުންދާ އުއްމީދުތައް ހަގީގަތަކަށް ހެދޭނީ ޕާޓީގެ މަސްލަހަތު ހިފަހައްޓައި، ޕާޓީއަށް ތާއީދު އިތުރުކޮށް، އާންމު މެންބަރުން ޕާޓީގެ ލީޑަރުންގެ ގޮތުގައި ބަލާ، އެއްވެސް ފަރާތެއް ބާކީ ނުކޮށް، އާންމު މެންބަރުންގެ އިހްސާސްތައް ދެނެގަނެގެން ޗެއަރޕަރސަންގެ މަސްއޫލިއްޔަތު އަދާކޮށްގެން ކަމަށްވެސް ބުންޏެވެ.
މައްސަލާގައި މިހެން ބުނެފައިވާއިރު، ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި އެމްޑީޕީއަށް ލިބުނު ކާމިޔާބީ ފާހަގަކުރަން ބޭއްވި ޖަލްސާގައި ކުރީގެ ޗެއާޕާސަން ފައްޔާޒު އާއި ކުރީގެ ރައީސް ނަޝީދު ވާހަކަދައްކަވަން ފުރުސަތު ނުދެއްވުމުން ގިނަ މެންބަރުންތަކެއް އަންނަނީ ނުރުހުން ފާޅުކުރަމުންނެވެ.
އެހެންނަމަވެސް، ފެންނަމުންދާ މަންޒަރަކީ، ޕާޓީގެ ވަގުތީ ޗެއަރޕަރސަންގެ މަސްއޫލިއްޔަތު އަދާކުރެއްވުމުގައި، ޗެއަރޕަރސަން ނިންމަންޖެހޭ ނިންމުންތައް ނިންމެވުމުގައި، އެހެން ފަރާތަކުން އަންގަވާހައި ގޮތަކަށް ނިންމުންތައް ނިންމަވަމުން ގެންދާ މަންޒަރެވެ. އަދި ވަކީން ޚާއްޞަކޮށް ޕާޓީގެ އަސާސީ ގަވާއިދާ ކަނޑައެޅިގެން ޚިލާފަށް އަމަލުކުރަން ފަށާފައިވާތަނެވެ.
ގަޕޯ ވަކިކުރަން ހުށަހެޅި އަނެއް ސަބަބުގެ ގޮތުގައި ފާހަގަކޮށްފައިވަނީ ޕާޓީގެ ޗެއަރޕަރސަންގެ ނާއިބު، އިބްރާހިމް ވަހީދު، އެ މަގާމުން ވަކިކުރުމާ، ޕާޓީގެ ލީގަލް ޑިރެކްޓަރ، އަޙްމަދު މައުރޫފު ވަނީ، އެ މަގާމުން ކުއްލި ގޮތަކަށް ވަކިކުރުމެވެ.
އަދި އޭނާ ވަނީ ޕާޓީއާއި މެންބަރުންގެ މަސްލަހަތު ހިމާޔަތްކުރަން ނުކުޅެދިފައިކަން ފާަހަގަކޮށް ޕާޓީގެ ކުރިމަގަށާއި ޕާޓީގެ މަސްލަހަތަށް، މިވަގުތު އެންމެ ރަނގަޅު ގޮތަކީ، ޕާޓީގެ ވަގުތީ ޗެއަރޕަރސަންކަމުގެ މަގާމުން، ޢަބްދުލްޣަފޫރު މޫސާ ދުރަށް ޖެހިވަޑައިގެންނެވުން ކަމަށް މައްސލާގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
