ދިވެހިރާއްޖޭގައި ފުރަތަމަ ފަހަރަށް ބާއްވާ "ބްލައިންޑް ފޯލްޑް ރަން" ނުވަތަ ލޮލަށް ނުފެންނަ މީހުންނާއެކު ދުވާ ދުވުމުގައި ބައިވެރިވުމުގެ ފުރުސަތު ޕެރަ ސްޕޯޓްސް އިން ހުޅުވާލައިފިއެވެ.
މި ދުވުމުގެ މޮޓޯއަކީ ”ރަން ފޯ ލައިޓް“ އެވެ. މިއީ ޕެރަ ސްޕޯޓްސް އިން އިންތިޒާމްކޮށްގެން، ލޮލަށް ނުފެންނަ މީހުން ދުވުންތަކުގައި ބައިވެރިވާއިރު ކުރެވޭ އިހްސާސްތައް އާންމުންނަށް ތަޖުރިބާކޮށްލުމުގެ ފުރުސަތު ދިނުމުގެ މަގުސަދުގައި ބާއްވާ ހަރަކާތެކެވެ. މި ދުވުން ބޭއްވުމަށް ހަމަޖެހިފައިވަނީ އަންނަ ޖޫން މަހުގެ 5 ވަނަ ދުވަހުއެވެ.
ޕެރަ ސްޕޯޓްސް އިން މައުލޫމާތު ދޭ ގޮތުގައި، މި ދުވުމުގައި ބައިވެރިވާން ބޭނުންވާ ފަރާތްތަކުން މެއި މަހުގެ 20 ވަނަ ދުވަހުގެ ނިޔަލަށް ރެޖިސްޓާ ކުރުމުގެ ފުރުސަތު ވަނީ ހުޅުވާލެވިފައެވެ.
ތިރީގައިވާ ލިންކު މެދުވެރިކޮށް ރެޖިސްޓާ ވެވޭނެއެވެ.
https://forms.gle/WRHkifrRJ2VyQPiUA
މި ދުވުމުގައި ބައިވެރިވާން ޖެހެނީ ދެ މީހުންގެ ޕެއާއެއް ނުވަތަ ޖޯޑެއްގެ ގޮތުގައެވެ. ދުވުމުގައި ރެޖިސްޓާ ކުރުމުގެ ފީއަކީ 700 ރުފިޔާއެވެ.
ދުވުމުގައި ބައިވެރިވާ ކޮންމެ ފަރާތަކަށްވެސް "ބްލައިންޑް ރަން ޕެކޭޖް" އެއް ލިބޭނެއެވެ. މި ޕެކޭޖުގައި ހިމެނެނީ:
ދުވުމަށް ޚާއްސަ ޖާޒީ
ބިބް
ލޯ ނިވާކުރާ މާސްކް
ދެމީހުން ގުޅުވައިދޭ ޓެތާ
ދުވުން ނިންމާ ފަރާތްތަކަށް ދެވޭ މެޑަލް
މި ހަރަކާތަކީ ނުކުޅެދުންތެރިކަން ހުންނަ ފަރާތްތަކުން ކުޅިވަރުގެ މައިދާނުގައި ކުރާ ހިތްވަރާއި، އެފަރާތްތަކަށް ދިމާވާ ގޮންޖެހުންތައް އަމަލީގޮތުން ތަޖުރިބާކޮށްލުމަށް ލިބޭ ރަނގަޅު ފުރުސަތެއް ކަމަށް ޕެރަ ސްޕޯޓްސް އިން ފާހަގަކުރެއެވެ. އެހެންކަމުން، ވީހާވެސް ގިނަ ފަރާތްތަކަކުން މި ދުވުމުގައި ބައިވެރިވުމަށް އެ ޖަމިއްޔާއިން ވަނީ ދައުވަތު އަރުވާފައެވެ.
Advertisement
This content is created and paid for by advertisers and does not involve Voice Journalists
