މި ސަރުކާރުގައި މިފްކޯއަށް އައްޔަނުކުރެވުނު ތިންވަނަ ސީއީއޯ ފަރުހަތު ޝަހީރު، މަގާމުން އިސްތިއުފާ ދެއްވައިފި އެވެ.
ވޮއިސް އަށް އެނގިފައިވާ ގޮތުގައި އޭނާ މަގާމުން އިސްތިއުފާ ދެއްވީ މިއަދުއެވެ.
އޭނާ އިސްތިއުފާ ދެއްވާފައި މިވަނީ، ދާދިފަހުން މިފްކޯއިން ވިއްކާ ތެޔޮ މަސްދަޅުގެ އަގު ބޮޑު ކުރި މައްސަލަ ހޫނުވެފައި ވަނިކޮށް، އެ ކުންފުނިން އެކަންކުރީ ސަރުކާރަށް ނޭނގި ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައިވާ ދަނޑިވަޅެއްގަ އެވެ. މަސްދަޅުގެ އަގު ބޮޑު ކުރުމަށްފަހު އެ ދުވަހު މިފްކޯއިން ވަނީ އެ ނިންމުން ބަދަލުކޮށް އަގު ކުރީގެ އަގަށް އިއާދަކޮށްފައެވެ.
މިފްކޯގެ ފަރުހަތު ހަވާލުވެވަޑައިގަތީ މިދިޔަ އަހަރު މާރިޗު މަހުގެ ތެރޭގައެވެ. އޭނާއާ މަގާމު ހަވާލު ކުރެވުނީ އޭގެ ކުރިން އެ ކުންފުނީގެ ސީއީއޯގެ މަގާމުގައި ހުންނެވީ ޑރ. ވިޓަލީ ލިއުބިމޯވް ކިޔާ ބޭރުގެ ބޭފުޅާ މަގާމުން ވަކިކުރުމަށްފަހުގައެވެ.
މިފަހުން ސަރުކާރު ކުންފުނިތަކުގެ އިސްމަގާމު ތަކުގައި ތިއްބެވި ގިނަ ބޭފުޅުންތަކެއް މަގާމުން ވަކިކުމާއި އިސްތިއުފާ ދިނުމުގެ ކަންކަން ވަނީ ހިނގާފައެވެ.
އެގޮތުން ފެނަކައިގެ ޑެޕިއުޓީ މެނޭޖިންގ ޑިރެކްޓަރ، މުހައްމަދު އާރިފްއާއި، މެނޭޖިންގ ޑިރެކްޓަރ، ނަޖާހު ހިމެނޭހެން 6 މީހަކު މަގާމުން ވަކިކޮށްފައިވެއެވެ. އަދި އެމް.ޕީ.އެލް ގެ ސީއީއޯ، ރިޝްވާން ވަނީ މަގާމުން އިސްތިއުފާ ދެއްވައިފައެވެ.
Advertisement
This content is created and paid for by advertisers and does not involve Voice Journalists
