ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ޕީއެންސީގެ މެންބަރު މުހައްމަދު ސިނާނުގެ ގޮނޑި ގެއްލިފައިވާކަމަށް ސުޕްރީމް ކޯޓުން މިއަދު ހުކުމްކޮށްފިއެވެ.

ހިތަދޫ މެޖިސްޓްރޭޓް ކޯޓުން މީގެ ދެ އަހަރު ކުރިން ވަނީ ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ މެންބަރު, ސިނާންއާއެކު އަހުމަދު ވަހީދާއި މުހައްމަދު ސަލީމް، މޯލްޑިވްސް އިސްލާމިކް ބޭންކުން ނަގާފައިވާ 3.8 މިލިއަން ރުފިޔާގެ ލޯނެއް ނުދައްކާ އޮތް މައްސަލައެއް ބަލާފަ އެވެ. 

މި ތިން މީހުންނާ ދެކޮޅަށް ހިތަދޫ މެޖިސްޓްރޭޓް ކޯޓުގައި 2024 ވަނަ އަހަރުގެ ޖުލައި 21 ގައި އެމްއައިބީން ކުރި ދައުވާ, އެ އަހަރުގެ އޮކްޓޯބަރު މަހުގެ 14 ވަނަ ދުވަހު ވަނީ ނިންމާފަ އެވެ. މައްސަލަ ނިމުނީ އެމްއައިބީ ކޮޅަށެވެ.

އެގޮތުން ކޯޓުން ވަނީ ނުދެއްކި ހުރި ލޯނު ދެއްކުމާއި ޖޫރިމަނާގެ ފައިސާ 6 މަސް ދުވަހުގެ ތެރޭގައި އެމްއައިބީއަށް ދެއްކުމަށް ހުކުމް ކޮށްފައެވެ.

އެ ފައިސާ ނުދައްކައި، ދަރަންޏެއް އޮތުމުން ވަކީލު ގާލިބު ސަލީމް ވަނީ މެންބަރު މުޙައްމަދު ސިނާންގެ ގޮނޑިއާ މެދު ގޮތެއް ނިންމުމަށް ސުޕްރީމް ކޯޓަށް މައްސަލަ ހުށަހަޅާފައެވެ. 

ސުޕްރީމް ކޯޓުގައި މި މައްސަލަ ބަލާފައިވަނީ ފަސް ފަނޑިޔާރުންގެ ބެންޗަކުންނެވެ. ބެންޗުގައި ހިމެނެނީ ފަނޑިޔާރު ޢާއިޝާ ޝުޖޫން މުޙައްމަދު، ފަނޑިޔާރު ޢަލީ ރަޝީދު ޙުސައިން، ފަނޑިޔާރު ޑރ. މުޙައްމަދު އިބްރާހީމް، ފަނޑިޔާރު ޙުސައިން ޝަހީދު އަދި ފަނޑިޔާރު މުޙައްމަދު ސަލީމް އެވެ.

އެމްއައިބީއަށް ދައްކަންޖެހޭ ފައިސާ 15 އޭޕްރީލް 2025ގައި ދައްކައި ޚަލާސްކޮށްފައިވާކަމަށް ވިދާޅުވި ނަމަވެސް، އެ ފައިސާ ދައްކާފައިވަނީ ހިތަދޫ ކޯޓުގެ ހުކުމުގައި ބުނެފައިވާގޮތަށް، ކޮންމެ މަހަކު އެމަހަކަށް ވާވަރަށް ދައްކަމުން ނޫން ކަމަށް ފަނޑިޔާރު ޝުޖޫން ވިދާޅުވިއެވެ. 

”ސިނާންގެ މައްޗަށް ދަރަންޏެއް ސާބިތުވެފައިވާ ކަމަށާ، ކޯޓުގެ ހުކުމާ އެއްގޮތަށް ފައިސާ ދައްކާފައި ނުވާ ކަން އެނގޭ. ސިނާންއަކީ މަޖިލީހުގެ މެމްބަރެއް ކަމަށްވާތީ ހިތަދޫ ކޯޓުގެ ހުކުމާ އެއްގޮތަށް އޭނާ ފައިސާ ދައްކާފައި ނުވުމުގެ ނަތީޖާއަކީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 73 ވަނަ މާއްދާގެ ނ ގައި ސަރީހަ ބަހުން ބަޔާންކޮށްފައިވާ ގޮތުން އޭނާ ރައްޔިތުންގެ މަޖިލީހުގެ މެންބަރު ކަމުން ވަކިވުން… އެހެންކަމުން މަޖިލީހުގެ މެންބަރު ސިނާން ވަކިވެފައިވާ ކަމަށް ކަނޑައަޅަން އަޅުގަނޑަށް ފެނޭ“ ފަނޑިޔާރު ޝުޖޫން ވިދާޅުވިއެވެ. 

ފަނޑިޔާރު ޝުޖޫންގެ މި ރައުޔަށް މައްސަލައިގައި ހިމެނޭ ބެންޗުގެ އެހެން ފަނޑިޔާރުން ވަނީ ތާއީދުކޮށްފަ އެވެ. 

ގާނޫނު ބުނާ ގޮތުގައި މަޖިލީސް މެންބަރެއް އިންތިހާބުގެ ކުރިން ނުވަތަ މެންބަރުކަމަށް ވަޑައިގަތުމަށްފަހު ދަރަންޏެއް ނުދައްކާހުރިނަމަ އެ މެންބަރެއްގެ ގޮނޑި ގެއްލޭނެއެވެ.