ޔުނައިޓެޑުގެ ކުޅުންތެރިން ވިއްކަން މަޖުބޫރެއް ނުކުރެވޭނެ: ކޯޗް
މެންޗެސްޓާ ޔުނައިޓެޑުގެ ކުޅުންތެރިން ވިއްކަން މަޖުބޫރު ނުކުރުވޭނެ ކަމަށައި ކުޅުންތެރިންގެ މާކެޓް ވެލިއުއަށްވުރެ އިތުރަށް ޔުނައިޓެޑުން ފައިސާ ހަރަދުކުރަން މަޖުބޫރު ނުކުރެވޭނެކަމަށް އެ ކްލަބުގެ ކޯޗް ޝޯލްޝާ ބުނެފިއެވެ. ޝޯލްޝާ މިހެން ބުނެފައިވަނީ ޕްރީ ސީޒަން ނިއުސް ކޮންފަރެންސްގައި ނޫސްވެރިންނައި މައުލޫމާތު ހިއްސާ ކުރަމުންނެވެ.
ކުޅުންތެރިންނަށް ހަރަދު ކުރަން ޖެހޭނީ އެދެވޭ ރަނގަޅު އަގުތަކެއް ކަމަށް ކަމަށައި އެގޮތުން ޔުނައިޓެޑުގެ ސްކޮޑަށް ބެލާލިއަސް، ގިނަ އަދަދެއްގެ މޮޅު ކުޅުންތެރިންތަކެއް ތިބިކަމަށް އޭނާ ބުންޏެވެ.
އެއްބަސްވުމުގެ މުއްދަތު ހަމަވުމާ ގާތަށް ގޮސްފައިވާ ކީޕަރު ޑިގެއާ އަދި ކްލަބައި ދެމެދު އައު އެއްބަސްވުމަކަށް އައުމަށް ވާހަކަތައް ދެކެވެމުންދާ ކަމަށައި ވާހަކަތައް ކުރިއަށް ދަނީ ވަރަށް 'ޕޮޒިޓިވް' ކޮށް ކަމަށްވެސް ޝޯލްޝާވަނީ ހާމަކޮށްފައެވެ.
ޔުނައިޓެޑް ދޫކޮށްލަން ބޭނުންވާ ކަމުގެ އަޑުތައް ފެތުރިފައިވާ ފްރާންސްއަށް ނިސްބަތްވާ އެ ކްލަބުގެ ސްޓާ މިޑްފީލްޑަރ ޕޯލް ޕޮގްބާއަށް އިޝާރާތް ކުރަމުން ޝޯލްޝާ ބުނީ އެއްވެސް ކުޅުންތެރިޔަކު ގަތުމަށް ހުށަހެޅުމެއް ލިބިފައިނުވާ ކަމުގައެވެ.
މިދިޔަ ސީޒަނުގައި ޔުނައިޓެޑަށް ކުޅުނު އެންޑާ ހެރޭރާ، އެންޓޯނިއޯ ވެލެންސިއާ، އަދި ޖޭމްސް ވިލްސަން އެ ކްލަބުން ވަނީ ފްރީ އޭޖެންޓުންގެ ގޮތުގައި ދޫކޮށްލާފައެވެ. ކުރިއަށް އޮތް އައު ސީޒަނަށް ސްކޮޑް ވަރުގަދަ ކުރުމަށްޓަކައި މިހާތަނަށް އެ ކްލަބަށް ގެންދެވިފައިވަނީ ސްވޯންސީއަށް ކުޅުނު ޑެނިއެލް ޖޭމްސް އަދި ކްރިސްޓަލް ޕެލަސްގެ ވެން ބިސާކާއެވެ.
Advertisement
This content is created and paid for by advertisers and does not involve Voice Journalists