ސިޓީތަކާއި ބެހޭ ވުޒާރާ އުވާލުމަކުން ގާނޫނީ ހުރަހެއް ނުވަތަ ހުސްކަމެއް އަތުވެދާނެކަމަށް ނުދެކޭކަމަށް ލޯކަލް ގަވަރމަންޓް އޮތޯރިޓީ ( އެލްޖީއޭ ) އިން ބުނެފިއެވެ.

އެލްޖީއޭއިން މިހެން ބުނެފައިވަނީ، އަތޮޅު ކައުންސިލުތަކާއި އަދި ސިޓީތަކާއި ބެހޭ ވުޒާރާގެ އިތުރުން ލޯކަލް ގަވަރމަންޓް އެންޑް ޕަބްލިކް ވޯކްސް އުވާލުމަށް ނިންމުމާ ގުޅިގެން އިދާރީ ދާއިރާތައް ހިންގުމަށް ގާނޫނީ ހުސްކަމެއް އަންނާނެކަމަށް މީސް މީޑިއާގައި ދައްކަވަމުންދާ ވާހަކަތަކައް ރައްދު ދިނުމުގެ ގޮތުން، މިއަދު ނެރުނު ރަސްމީ ބަޔާނެއްގައެވެ.

އެލްޖީއޭއިން ބުނި ގޮތުގައި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 230 ވަނަ މާއްދާގައި ދިވެހިރާއްޖޭގެ އިދާރީ ދާއިރާތައް ހިންގަވާނީ ލާމަރުކަޒީ އުސޫލުން ކަމަށް ބަޔާންކޮށްފައިވެއެވެ. އެގޮތުން، ގާނޫނުއަސާސީގައި ބަޔާންކޮށްފައިވާ ގޮތަށް އިދާރީ ދާއިރާތައް ލާމަރުކަޒީ އުސޫލުން ހިންގުމަށް ބޭނުންވާ ރަށު ކައުންސިލުތަކާއި ސިޓީ ކައުންސިލުތައް ރައީސުލްޖުމްހޫރިއްޔާ އުފައްދަވަންވާނެކަމަށް  ގާނޫނުއަސާސީގައި ބަޔާންކޮށްފައިވެއެވެ.

އެލްޖީއޭއިން ފާހަގަކުރެއްވި ގޮތުގައި، ރަށު ކައުންސިލުތަކާއި ސިޓީ ކައުންސިލުތަކުން ފޯރުކޮށް ދޭންޖޭހެނެކަމަށް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ބަޔާންކޮށްފައި އެންމެހާ ހިދުމަތްތައް ދިނުމަށް ބޭނުންވާ އެހީތެރިކަމާއި އެއްބާރުލުން ދިނުމަކީ ލާމަރުކަޒީ ގާނޫނުގެ ދަށުން އެލްޖީއޭގެ މައްޗަށް ލާޒިމުކަމެކެވެ.

އެގޮތުން، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު އަށް ގެނެވުނު 17 ވަނަ އިސްލާހުގައި އަތޮޅު ކައުންސިލުތައް އުވާލާ އަތޮޅު ކައުންސިލުތަކުން ފޯރުކޮށްދެމުންދިޔަ އެންމެހާ ހިދުމަތްތައް ފޯރުކޮށްދިނުމުގެ ގާނޫނީ ޒިންމާ މަތިކޮށްފައިވަނީ އެލްޖީއޭއަށް ކަން އެ އިދާރާއިން ވަނީ ބަޔާންކޮށްފައެވެ. އަދި އަތޮޅު ކައުންސިލުގެ ނަމުގައި ހުރި އެންމެހާ މުދަލާއި ވަސީލަތްތައް ބަދަލުވެގެން ދާނެކަމަށް ގާނޫނުގައި ބަޔާންކޮށްފައިވަނީ އެލްޖީއޭއަށް ކަން އެ އިދާރާއިން ފާހަގަކުރެއެވެ.

މީގެ އިތުރުން، އަތޮޅު ކައުންސިލުތައް އުވާލާ އިދާރީ ދާއިރާތަކުގައި އެލްޖީއޭގެ އޮފީސްތަކެއް ގާއިމް ކުރުމުގެ އިހްތިޔާރު ލާމަރުކަޒީ ގާނޫނަށް ގެނެވުނު 17 ވަނަ އިސްލާހުގައި ސާފުކޮށް ބަޔާންކޮށްފައިވާނެކަން ވެސް އެ އިދާރާއިން ވަނީ ފާހަގަކޮށްފައެވެ.

އެގޮތުން ބަޔާން ނިންމާލުމުން އެލްޖީއޭއިން ބުނީ، އަތޮޅު ކައުންސިލުތައް އުވާލާ އަތޮޅު ކައުންސިލުތަކުން އަދާކުރަމުންދިޔަ ގާނޫނީ މަސްއޫލިއްޔަތު އެލްޖީއޭއަށް ބަދަލުވާނެކަމަށް ގާނޫނުގައި ބަޔާންކޮށްފައިވުމާއި އަދި އަތޮޅު ކައުންސިލުތަކުގެ ބަދަލުގައި އިދާރީ ދާއިރާތަކުގައި އެލްޖީއޭގެ އޮފީސްތަކެއް ގާއިމްކުރުމުގެ އިހްތިޔާރު ލާމަރުކަޒީ ގާނޫނުގައި ބަޔާންކޮށްފައި އޮތުމުން މިނިސްޓްރީ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވޯކްސް މިނިސްޓްރީ އުވާލުމަކުން ގާނޫނުއަސާސީގައި އަދި ލާމަރުކަޒީ ގާނޫނުގައި ބަޔާންކޮށްފައިވާ އިދާރީ ދާއިރާތައް ލާމަރުކަޒީ އުސޫލުން ހިންގުމަށް، ގާނޫނީ ހުރަހެއް ނުވަތަ ހުސްކަމެއް އަތުވެދާނެކަމަކަށް އެ އިދާރާއިން ނުދެކޭ ކަމަށެވެ.

މި ބަދަލު ގެނެސްފައިވަނީ މީގެ 1 ދުވަސް ކުރިން ރައީސް ޑރ. މުޙައްމަދު މުޢިއްޒު ސަރުކާރުގެ ކެބިނެޓައް ގެނައި ބޮޑު ބަދަލަކާއެކުއެވެ. އެގޮތުން، ބައެއް މިނިސްޓްރީތައް މުޅިން އުވާލާފައިވާއިރު ބައެއް މިނިސްޓްރީތައް ވަނީ އެއްކޮށްލާފައެވެ. އަދި ކެބިނެޓުގެ 10 މިނިސްޓަރަކު ރައްޔިތުންގެ ވިންދާއެކު ސަރުކާރު ހިންގެވުމަށް ރައީސް ގެންނަން ބޭނުންފުޅުވާ ހެޔޮ ބަދަލުތަކައް ފުރުސަތު ދިނުމުގެ ގޮތުން އިސްތިއުފާ ދިނުމުން، ރައީސް ވަނީ އަލަށް 4 މިނިސްޓަރަކު އައްޔަނުކުރައްވާފައެވެ.