ދައުލަތުގެ ހަރަދުތައް ކުޑަކުރުމުގެ ގޮތުން އެޅެންހުރި ފިޔަވަޅުތައް އަދިވެސް އަޅަމުންދާނޭކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މާލީ ވަޒީރު މޫސާ ޒަމީރު ވިދާޅުވީ، މެދުއިރުމަތީގެ މަޝްރަހު މިވަގުތު ހުރިގޮތަށް ބަލައި ދައުލަތުގެ ހަރަދުތައް އިސްލާހްކުރުމަށް ގިނަ ފިޔަވަޅުތަކެއް އަޅައި ތަންފީޒުކުރަމުން ގެންދާކަމަށެވެ. އެގޮތުން ތެލުގެ އަގަށް އަންނަ ބަދަލުތަކާއި، ދައުލަތަށް ލިބޭ އާމްދަނީއަށް ކުރާ އަސަރާއި، ބޭރު ފައިސާ ބޭރުވާ މިންވަރު އިތުރުވުމާ ގުޅިގެން، ދައުލަތުގެ މާލިއްޔަތަށް ކުރިމަތިވެފައިވާ ޕްރެޝަރުތައް ކުޑަކުރުމަށްޓަކައި ހަރަދުކުޑަކުރުމަށް މިހާރުވެސް ގިނަ ފިޔަވަޅުތަކެއް އަޅާފައިވާކަމަށް ވަޒީރު ވިދާޅުވިއެވެ. މީގެ އިތުރުން ހަރަދުތައް އިސްލާހް ކުރެވޭނެ ގޮތްތައް ބަލައި ބައެއް ހަރަދުތައް ކުޑަކުރުމަށް މިހާރުވެސް ދިރާސާ ކުރަމުން އަންނަކަމަށް ވަޒީރު ވިދާޅުވިއެވެ.

އާމްދަނީ މަދުވުމާއި، ރިކަރަންޓް ޚަރަދު އިތުރުވުމާއި، ރިޒާވުން ފައިސާ ބޭރުވާ މިންވަރު އިތުރުވުމުގެ ސަބަބުން އުފެދިފައިވާ ފަރަގު ކުޑަކުރުމަށްޓަކައި ޚަރަދުތައް އެކަށޭނަ މިންވަރެއްގައި ބެހެއްޓުން މުހިންމުކަމަށް މާލީ ވުޒާރާއިން އިއްޔެ ނެރުނު ބަޔާނުގައި ވަނީ ބުނެފައެވެ. މިކަމަށް އިޝާރާތްކުރައްވައި ވަޒީރު ވިދާޅުވީ، ބަޖެޓު ކޮންޓްރޯލް ކުރުމުގެ ފިޔަވަޅުތައް މިހާރުވެސް ތަންފީޒުކުރެވެމުން ދާކަމަށެވެ. 

އެގޮތުން މާލީ ދާއިރާ މެދުވެރިކޮށް ބޭރު ފައިސާއިން ކުރާ ޚަރަދުތަކާއި ބޭރު ފައިސާ ބޭރުވާ މިންވަރު މެނޭޖުކުރުމުގެ ސިޔާސަތުތައްވެސް މުރާޖަޢާ ކުރަމުންދާކަމަށް ވަޒީރު ވިދާޅުވިއެވެ. ފިނޭންސުން މިހާރު ލަފާކުރާގޮތުގައި މެދުއިރުމަތީގެ ހަނގުރާމައާ ގުޅިގެން ތެލުގެ އަގުތަކަށް އަންނަމުންދާ ބަދަލުތަކާއެކު، މިހިނގާ އަހަރަށް ލަފާކުރި ބަޖެޓަށްވުރެ ތެލުގެ ސަބްސިޑީއަށް ހިނގާ ޚަރަދު ބޮޑުތަނުން އިތުރުވެގެންދާނެއެވެ.

ފިނޭންސުން ބުނީ މި ހާލަތާ ގުޅިގެން ހުށަހެޅިފައިވާ ޚަރަދު ކުޑަކުރުމުގެ ފިޔަވަޅުތަކަކީ ދައުލަތުގެ ކޭޝް ފްލޯއާއި، ބަޖެޓާއި އަދި ރިޒާވަށް ކުރިމަތިވާ ޕްރެޝަރުތައް ކުޑަކުރުމަށް އެޅޭ މުހިންމު ފިޔަވަޅުތަކެއްކަމަށެވެ.