ސަރުކާރު ހިއްސާވާ ކުންފުނިތަކުން ވަކިވާ މުއައްޒަފުންނަށް އާމްދަނީ ހޯދައިދިނުމަށް ގޮތްތަކެއް ހަމަޖެއްސުމަށް އިންތިޒާމްތަކެއް ހަމަޖެއްސުމަށް މަސައްކަތްކުރަމުން އަންނަކަމަށް ފިނޭންސް މިނިސްޓްރީން ބުނެފިއެވެ.

ސަރުކާރުގެ ހަރަދުތައް ކުޑަކުރުމަށް ގެންގުޅެމުންދާ ސިޔާސަތުގެ ދަށުން އެސްއޯއީތަކުގައި ވަޒީފާ އަދާކުރަމުން އަންނަ ވަކި އިންސައްތައެއް މަދުކުރުމަށް ފިނޭންސް މިނިސްޓްރީން ވަނީ ނިންމާފައެވެ. މިކަމާ ގުޅޭގޮތުން އިއްޔެ ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މައުލޫމާތު ހިއްސާކުރަމުން މާލީ ވަޒީރު މޫސާ ޒަމީރު ވިދާޅުވެފައިވަނީ، ސަރުކާރު ކުންފުނިތަކުން ވަކިވާ މުއައްޒަފުންނަށް އިޤްތިސޯދުގައި ބައިވެރިވެ އާމްދަނީ ހޯދޭނެ ގޮތްތައް ރާއްވަވަމުން ގެންދަވާ ކަމަށެވެ. އެގޮތުން އެފަދަ ފަރާތްތަކަށް ލުއިލޯނު ދޫކުރެވޭނެ އިންތިޒާމުތަކެއް ހަމަޖެއްސުމަށް މަސައްކަތް ކުރަމުން އަންނަކަމަށެވެ.

ނޫސްވެރިންނަށް މައުލޫމާތު ދެއްވަމުން މާލީ ވަޒީރު ވަނީ އިޤްތިސޯދަށް މިވަގުތު އަންނަމުންދާ ބަދަލުތަކާއި ގުޅިގެން، ކުންފުނިތަކުުގެ ހަރަދު ކުޑަކޮށް ޑައުންސައިޒް ކުރަމުންދާއިރު، ވަޒީފާއިން ވަކިކުރާ ފަރާތްތަކަށް އާމްދަނީ ހޭދޭނެ އިތުރު ގޮތްތައް ފަހިކޮށްދީ އިކޮނޮމީގައި ބައިވެރިވެވޭނެ ގޮތަށް، ޚާއްސަ ދާއިރާތަކުން ލޯނު ދިނުމަށް ރައީސުލްޖުމްޙޫރިއްޔާ ލަފާ ދެއްވާފައިވާ ކަމަށް ވިދާޅުވެފައެވެ.

މިނިސްޓަރު ވިދާޅުވީ، ކުރިމަތިވެފައިވާ މި ހާލަތާއެކުވެސް ރައީސް ޑރ.މުހައްމަދު މުއިއްޒުގެ ޕޮލިސީއަކީ އިގްތިސާދުގެ ސޯބު ނުހުއްޓި އެނބުރޭނެ ގޮތަކަށް އިންތިޒާމުތައް ކުރިއަށްގެންދިއުންކަމަށެވެ.

މިނިސްޓަރ ވިދާޅުވީ ކުރިއަށް އޮތް ދެތިން މަހެއްގެ ތެރޭގައިވެސް އިތުރަށް 450 މިލިއަނެއްހާ ރުފިޔާ ހަމަޖެހިގެން ދާނޭކަމަށާއި، އެ ފައިސާ އެސް.އެމް.އީގެ ގޮތުގައި އިކޮނޮމީގެ ތެރެއަށް ނެރުމަށް މަސައްކަތް ކުރައްވަމުންގެންދަވާ ކަމަށެވެ.

ކުންފުނިތަކުުގެ ހަރަދު ކުޑަކުރަން ވަޒީފާތައް މަދުކުރަމުންދާއިރު، ކުދި އަދި މެދު ފަންތީގެ ވިޔަފާރިތަކަށް ބޭނުންވާ ފައިނޭންސިންގް އާއި ލޯނު ދޫކޮށްގެން ވިޔަފާރިތައް ފުޅާކުރުމަށް އެހީތެރިވެދީ، ޕްރައިވެޓް ސެކްޓަރގެ ވަޒީފާތައް އިތުރުކޮށް ވަޒީފާގެ ބާޒާރަށް ދިވެހިން ނެރުމަކީ ރައީސުލްޖުމްޙޫރިއްޔާ އިސްކަންދެއްވާ ކަމެއް ކަަމަށް މާލީ ވުޒާރާއިން ވަނީ ބުނެފައެވެ.