ޖަޕާނުގެ އުތުރު ސަރަހައްދަށް މިއަދު އައި ރިކްޓަރ މިންގަނޑުން 7.4 ގެ ބާރުގަދަ ބިންހެލުމަކާ ގުޅިގެން، އެ ގައުމުގެ އައްސޭރިފަށުގެ ސަރަހައްދުތަކަށް ސުނާމީ އަރާފާނެކަމުގެ އިންޒާރު ކަމާބެހޭ ފަރާތްތަކުން ނެރެފިއެވެ.

ޖަޕާނުގެ ގައުމީ ބްރޯޑްކާސްޓަރު އެން.އެޗް.ކޭ އިން ރިޕޯޓްކޮށްފައިވާ ގޮތުގައި މި ބިންހެލުމާ ގުޅިގެން ކޯސްޓަލް ސަރަހައްދުތަކަށް ވަނީ ވަރަށް ބޮޑަށް ސަމާލުވާން އަންގާފައެވެ.

ކަމާބެހޭ އިދާރާތަކުން ހާމަކޮށްފައިވާ ގޮތުގައި އިވާޓޭ ޕްރިފެކްޗާ އަދި ހޮކައިޑޯގެ ބައެއް ސަރަހައްދުތަކަށް 3 މީޓަރުގެ އުސްމިނުގެ ރާޅު އެރުން އެކަށީގެންވެއެވެ. މިކަމާ ގުޅިގެން އެ ސަރަހައްދުތަކުގެ ރައްޔިތުން ރައްކާތެރިކަމުގެ ފިޔަވަޅެއްގެ ގޮތުން އުސް ބިންތަކަށް ބަދަލުވުމަށް އޮފިޝަލުން ވަނީ އިރުޝާދު ދެއްވާފައެވެ. މި ހާދިސާގައި ލިބިފައިވާ ގެއްލުންތައް ބަލައި، ހާލަތު މޮނިޓަރު ކުރުމަށް ކަމާބެހޭ އިމަޖެންސީ ޚިދުމަތްތައް މިހާރު ވަނީ ތައްޔާރީ ހާލަތަކަށް ގެނެސްފައެވެ.

ޖަޕާނުން ނެރުނު އެޑްވައިޒަރީގައި ބުނެފައިވަނީ, ސުނާމީގެ ރާޅުތައް މިހާރުވެސް އައްސޭރިފަށާ ގާތްވަމުންދާ ކަމަށާއި، މި ރާޅުތައް  އެރުން އެކަށީގެންވާ ކަމަށެވެ. އެހެންކަމުން، ވީހާވެސް އަވަހަކަށް ރައްކާތެރި ސަރަހައްދުތަކަށް ދިއުމަށާއި، ސުނާމީއާ ގުޅިގެން ދީފައިވާ އިންޒާރު އުވާލަންދެން ރައްކާތެރި ތަންތަނުގައި މަޑުކުރުމަށް ވަނީ އެދިފައެވެ. މީގެ އިތުރުން، ލަފާކުރި ވަގުތަށްވުރެ އަވަހަށް ނުވަތަ ލަހުންވެސް ރާޅު އަރާފާނެ ކަމަށާއި، އުސްމިންވެސް ލަފާކުރި ވަރަށްވުރެ ބޮޑުވެދާނެ ކަމަށް ވަނީ އިންޒާރުދީފައެވެ.

އައްސޭރިފަށުގެ ސަރަހައްދުތަކާއި ކޯރުތަކުގެ ކައިރީގައި އުޅޭ ފަރާތްތަކުން އެ ތަންތަނާ ދުރުގައި ތިބުމަށް ވަނީ އިރުޝާދު ދީފައެވެ. އެއީ ކޯރުތައް ފުރިގެން ބޭރުވުމުގެ ފުރުސަތު އޮތުމުންނެވެ. ޖަޕާނަކީ ދުނިޔޭގައި އެންމެ ގިނައިން ބިންހެލުން އަންނަ އެއް ގައުމެވެ. އެ ގައުމު އޮންނަނީ ޕެސިފިކް "ރިންގް އޮފް ފަޔަރ" ގެ ހުޅަނގު ބިތުގައި، ހަތަރު ބޮޑު ޓެކްޓޯނިކް ޕްލޭޓެއްގެ މަތީގައެވެ.

ގާތްގަނޑަކަށް 125 މިލިއަން މީހުންގެ އާބާދީއެއް އޮންނަ ޖަޕާނަށް އަހަރަކު އެވްރެޖްކޮށް 1,500 އެއްހާ ބިންހެލުން އާދެއެވެ. މިއީ ދުނިޔޭގައި އަންނަ ބިންހެލުންތަކުގެ ގާތްގަނޑަކަށް 18 އިންސައްތައެވެ. މި ބާރުގަދަ ބިންހެލުމާ ގުޅިގެން ކަމާބެހޭ ފަރާތްތަކުން ދަނީ ހާލަތު ވަރަށް ގާތުން ބަލަމުންނެވެ.

މި ބިންހެލުމުގެ ސަބަބުން ރާއްޖެއަށް އެއްވެސް ނުރައްކަލެއް ނެތްކަމަށް މެޓް އޮފީހުން ވަނީ ބުނެފައެވެ.