ދިވެހިރާއްޖޭގެ ގައުމީ ޔުނިވަރސިޓީ (އެމް.އެން.ޔޫ) ގެ ސެންޓަރ ފޯ މެރިޓައިމް ސްޓަޑީޒް (ސީ.އެމް.އެސް) އިން ބައިނަލްއަގުވާމީ ފެންވަރުގެ ކޮލިޓީ މެނޭޖްމަންޓް ސިސްޓަމް، އައި.އެސް.އޯ 9001:2015 ރީ-ސެޓިފިކޭޝަން ކާމިޔާބީއާއެކު ހާސިލުކޮށްފިކަން އެ ޔުނިވަރސިޓީން ބުނެފިއެވެ.

ބިއުރޯ ވެރިޓާސް (ބީ.ވީ) މެދުވެރިކޮށް މި ސެޓްފިކެޓް ހާސިލުކުރުމަށްޓަކައި، ސީ.އެމް.އެސް އިން ވަނީ ނޮވެމްބަރު 2025 ގައި ކުރިއަށްދިޔަ ފުރިހަމަ އޮޑިޓަކާ ކުރިމަތިލާފައެވެ. މި އޮޑިޓުން ފާހަގަވި ކަންކަން އިސްލާހުކޮށް، މިންގަނޑުތަކަށް ފެތުމާ ގުޅިގެން ދޫކުރި މި ސެޓްފިކެޓް 28 ނޮވެމްބަރު 2028 ގެ ނިޔަލަށް ދެމިއޮންނާނެއެވެ. ނަމަވެސް، މި މުއްދަތުގެ ތެރޭގައި ދޭތެރެ ދޭތެރެއިން ކުރިއަށްދާ ސަވައިލެންސް އޮޑިޓްތަކުން ފާސްވާން ޖެހޭނެއެވެ.

މި ކާމިޔާބީއަކީ ތައުލީމާއި ތަމްރީނު ދިނުމުގައާއި، މުއައްސަސާގެ ހިންގުމުގައި ބައިނަލްއަގުވާމީ މިންގަނޑުތަކަށް އެމް.އެން.ޔޫ އިން ބަހައްޓާ އަހަންމިއްޔަތުކަން ރަމްޒުކޮށްދޭ ކަމެކެވެ. މީގެ އިތުރުން، މިއީ މިނިސްޓްރީ އޮފް ޓްރާންސްޕޯޓް އެންޑް ސިވިލް އެވިއޭޝަނާއި، އިންޓަނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ) ގެ އެސް.ޓީ.ސީ.ޑަބްލިޔު ކޮންވެންޝަންގެ ގަވާއިދުތަކަށް ސީ.އެމް.އެސް އިން ފުރިހަމައަށް އަމަލުކުރާކަން ކަށަވަރުކޮށްދޭ ހެކިލިބިގެންދިޔަ ކަމެކެވެ.

މި އުފާވެރި މުނާސަބަތުގައި، އެމް.އެން.ޔޫ އިން ވަނީ ސީ.އެމް.އެސްގެ މުޅި ޓީމުން ދެއްކެވި ހިތްވަރަށާއި، މަސައްކަތަށް ސާބަސް ދީފައެވެ. އަދި ޔުނިވަރސިޓީގެ ލީޑަރޝިޕް، ވަކިން ހާއްސަކޮށް ވައިސް ޗާންސެލަރާއި، ޑެޕިއުޓީ ވައިސް ޗާންސެލަރުންނާއި، ކޮލިޓީ އެޝުއަރެންސް (ކިއު.އޭ) ކޮންޓްރޯލަރ ދެއްވި އިރުޝާދާއި އެހީތެރިކަން އެ ޔުނިވަރސިޓީން ފާހަގަކުރެއެވެ.

މި އޮޑިޓް ކާމިޔާބުކުރުމުގައި އެމް.އެން.ޔޫގެ ކިއު.އޭ ސިސްޓަމްތަކާއި މަރުހަލާތަކުން ލިބުނު ފަންނީ އެހީތެރިކަން ވެސް ޔުނިވަރސިޓީން ވަނީ ހާއްސަ ގޮތެއްގައި ފާހަގަކޮށްފައެވެ. މި ސެޓްފިކެޓާއެކު ސީ.އެމް.އެސް ވެގެން ގޮސްފައިވަނީ ސަރަހައްދީ ފެންވަރުގައި ވެސް ފާހަގަކޮށްލެވޭ މެރިޓައިމް ތަމްރީނުދޭ މަރުކަޒަކަށެވެ.