ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ ހަތަރު ދަރަޖަ ދަށަށް ހިނގައްޖެއެވެ. 

ރިޕޯޓާސް ވިތައުޓް ބޯޑާސް (އާރްއެސްއެފް) އިން ނެރުނު މިއަހަރުގެ ނޫސްވެރިކަމުގެ އިންޑެކްސްގައި ވާގޮތުން ރާއްޖެ ވަނީ 2025 ވަނަ އަހަރު އޮތް 104 ވަނަ ދަރަޖައިން 108 ވަނަ ދަރަޖައަށް ވެއްޓިފައެވެ. މީގެ އިތުރުން ރާއްޖޭގެ ސްކޯވެސް ވަނީ 2025 ވަނަ އަހަރު ހުރި 52.46 އިން 49.23 އަށް ވެއްޓިފައެވެ.

އާރްއެސްއެފް އިން ނެރުނު އިންޑެކްސްގައި ބަޔާންކޮށްފައިވަނީ، ރާއްޖޭގައި މީޑިއާތަކަށް މާލީ މިނިވަންކަން ހޯދުމަށާއި ނޫސްވެރިކަމަށް ގާނޫނީ ހުރަސްތައް އިތުރުވަމުންދާ ކަމަށެވެ. އެގޮތުން، އިގްތިސާދީ ގޮތުން ރާއްޖެ 39 ދަރަޖަ ފަހަތައް ޖެހިފާވާއިރު، ގާނޫނީ ގޮތުން ރާއްޖެ ވަނީ 23 ދަރަޖަ ފަހަތަށް ޖެހިފައެވެ.

މީގެ އިތުރުން، ނޫސްވެރިންގެ ސަލާމަތާއި ރައްކާތެރިކަމުން ވެސް ރާއްޖެ ވަނީ 21 ދަރަޖަ ދަށަށް ގޮސްފައެވެ. އެގޮތުން، އާރްއެސްއެފުން ފާހަގަކުރާ ގޮތުގައި، ނޫސްވެރިންނަށް ރާއްޖޭގައި އޮތް ނުރައްކާ ވަނީ ކަންބޮޑުވާންޖެހޭ މިންވަރަށް އިތުރުވެފައެވެ.

އާރްއެސްއެފުން ކޮންމެ އަހަރަކުވެސް މި ދަރަޖަ ނެރޭއިރު، މި އަހަރުގެ އިންޑެކްސްގައި އެންމެ ފަހަތުގައި މިފަހަރު އޮތީ އެރިޓްރެއާ އެވެ. އަދި އެންމެ މަތީގައި މިއަހަރު އޮތީ ނޯރވޭ އެވެ.