މި އަހަރުގެ ޕްރިމިއާ ލީގު ސީޒަން ނިމެން ގާތްވެފައިވާއިރު، އިނގިރޭސިވިލާތުގެ އެންމެ ބޮޑު އެއް ކްލަބު، ޓޮޓެންހަމް ހޮޓްސްޕާ ލީގުން ރެލިގޭޓްވުމުގެ ބިރު ބޮޑުވެއްޖެއެވެ.

މިވަގުތު ތާވަލުގެ 18 ވަނައިގައި ޓޮޓެންހަމް އޮތްއިރު، މިއީ ލީގުން ވަކިވާންޖެހޭ ތިން މަގާމުގެ ތެރެއިން އެއް މަގާމެވެ. ޖުމްލަ 34 މެޗު ކުޅެފައިވާއިރު އެ ޓީމަށް މިހާތަނަށް ލިބިފައިވަނީ އެންމެ 34 ޕޮއިންޓެވެ.

މި ސީޒަނުގައި ޓޮޓެންހަމްގެ ނަތީޖާތައް ވަނީ ވަރަށް ބޮޑަށް ދަށްވެފައެވެ. ޚާއްޞަކޮށް 2026 ވަނަ އަހަރު ފެށުނު ފަހުން ލީގުގައި އެއްވެސް މެޗަކުން އެ ޓީމު މޮޅުވެފައެއް ނުވެއެވެ. މިއީ 1977-1978 ވަނަ އަހަރުގެ ސީޒަނަށް ފަހު އެ ޓީމު ރެލިގޭޓްވުމާ މިހާ ގާތަށް ދިޔަ ފުރަތަމަ ފަހަރެވެ.

ޓޮޓެންހަމްގެ ކޯޗުކަމާ ރޮބާޓޯ ޑި ޒާބީ ހަވާލުވި ނަމަވެސް، ޓީމުގެ ނަތީޖާއަށް އަދިވެސް ހެޔޮ ބަދަލެއް އައިސްފައެއް ނުވެއެވެ. މީގެ އިތުރުން ޓީމުގެ މުހިންމު ކުޅުންތެރިންނަށް އަނިޔާވުމަކީ ވެސް ޓީމަށް ކުރިމަތިވެފައިވާ ބޮޑު ގޮންޖެހުމެކެވެ. އެގޮތުން މުހިންމު ދައުރެއް އަދާކުރާ ޑޮމިނިކް ސޮލާންކޭ އާއި ޒަވީ ސިމަންސް ފަދަ ކުޅުންތެރިންނަށް އަނިޔާވެ ކުޅުމާ ދުރުގައި ތިބެން ޖެހުމަކީ ޓީމުގެ ކުރިމަގަށް އޮތް ބިރެކެވެ.

ޓޮޓެންހަމް ކުރިއަށް އޮތް މެޗުތަކުގައި ވެސް ކުރިމަތިލާން ޖެހެނީ ވަރުގަދަ ޓީމުތަކާއެވެ. އޭގެ ތެރޭގައި އެސްޓަން ވިލާ، ޗެލްސީ އަދި އެވަަޓަން ހިމެނެއެވެ. މި މެޗުތަކުން ރަނގަޅު ނަތީޖާއެއް ނުނެރެވިއްޖެނަމަ، ޓޮޓެންހަމް އަންނަ ސީޒަނުގައި ފެންނާނީ ޗެމްޕިއަންޝިޕުންނެވެ.

ލީގުގެ ތާވަލަށް ބަލާއިރު، ބާންލީ އަދި ވުލްވްސް މިހާރު ވަނީ ރެލިގޭޓްވެފައެވެ. އެހެންކަމުން ދެން އޮތް ހަމައެކަނި ރެލިގޭޝަން ޖާގައަށް ޓޮޓެންހަމްއާއެކު ވާދަކުރަމުންދަނީ ވެސްޓް ހޭމް ޔުނައިޓެޑާއި ނޮޓިންހަމް ފޮރެސްޓެވެ. ވެސްޓް ހޭމް މިވަގުތު އޮތީ ޓޮޓެންހަމްއަށްވުރެ ދެ ޕޮއިންޓް ކުރީގައި 36 ޕޮއިންޓާއެކުގައެވެ. އަދި ނޮޓިންހަމް ފޮރެސްޓް އޮތީ 39 ޕޮއިންޓާއެކުގައެވެ.