އިންޑިޔާގެ އެފްކޮންސް ކުންފުނިން އަޅަމުންދާ ތިލަމާލޭ ބްރިޖުގައި ބަނޑި ހުރިކަމަށްބުނެ ދެކެވޭ ވާހަކަތައް މިނިސްޓާ އޮފް އިންފްރާސްޓްރަކްޗާ ޑރ. އަބްދުالله މުއްޠަލިބު ވިދާޅުވެއްޖެއެވެ.
ބުރިޖުގެ މަސައްކަތް ކުރިއަށްދާގޮތް ނޫސްވެރިންނަށް ދައްކާލުމަށްފަހު ނޫސްވެރިންނާ ވާހަކަދައްކަވަމުން ވަޒީރު މުޢްޠަލިބު ވިދާޅުވީ، ބްރިޖުގައި ބައެއް މައްސަލަތަކެއް ހުރިކަމަށާ، ބަނޑިތަކެއް ހުރި ކަމަށް ބުނެ ބައެއް ފަރާތްތަކުން މީސއމީޑިއާގައި ވާހަކަތައް ފަތުރަމުންދާ ކަމަށެވެ.
މިއީ ކުރަހާފައި އިން ބްރިޖެއް ނޫން. މިއީ ޑިޒައިން ކޮށްފައި އިންޖީނިއާކޮށްފައި، އިން ބްރިޖެއް. މާނައަކީ ދުރުން ފެންނަ ގޮތަކަށްނޫން ކޮންމެހެން ހުންނަންޖެހޭނީކީ. އެ ބުނާކަހަލަ ޑިޕްއެއް ނުހުންނާނެ. މިއީ ލެގޯ އެއްގޮތަށް އެކިއެކި ބައިތައް ގެނެސް ގުޅުވައި، ސްޓްރަކްޗާއަކަށްވާތީވެ، އެ ބުނާ ކަހަލަ ޑިފެކްޓެއް އިން ނަމަ، ހުރިހާ ސެގްމެންޓެއް ގުޅިގެން އެއްވަރުވެގެން ނުދާނެ. އެހެންވީމާ ކޮލިޓީ މައްސަލައެއް ނޫޅޭ. ދުރުން ފެންނަނީ އެއީ އިލޫޝަންއެއް. ބްރިޖުގެ މަސައްކަތް ދަނީ އެބުނާ ކަހަލަ ބެންޑް ތަކެއް ހުރެގެންނެއް ނޫން.
ވަޒީރު މުއްޠަލިބު
ބްރިޖު ނިމިދާއިރު ވެގެންދާނީ ”އިންޖީނިއަރިން މާވެލް“ އަކަށް ކަމަށާ، އެފަދަ ބުރަ މަސައްކަތެއް އެފްކޮންސްއަށް ނިންމާލެވުމަކީ އެ ކުންފުންޏަކީވެސް ބޮޑެތި ބުރަ މަސައްކަތް ކުރެވޭނެ ކުންފުންޏަކަށް ބަދަލުވެގެންދާނެ ކަމެއް ކަމަށް ވަޒީރު ވިދާޅުވިއެވެ.
މީގެ އިތުރުން ވަޒީރު ވިދާޅުވީ، ބްރިޖުގެ މަސައްކަތް ލަސްވެފައި، ނިންމާ ތާރީޚް ވެސް ފަސްވަމުންދާ ކަމަށާ، އެހެންނަމަވެސް، ސަރުކާރުން މަސައްކަތް ކުރަނީ، ކޮންޓްރެކްޓަރަށް ހަރުކަށި ފިޔަވަޅުތަކެއް އަޅައި މަސައްކަތް ހުއްޓާލުމަށް ނޫން ކަމަށް ކަމަށެވެ. އޭގެ ބަދަލުގައި ކޮންޓްރެކްޓަރާއި ވާހަކަދައްކައިގެން މަސައްކަތް ނުހުއްޓި ކުރިއަށް ގެންގޮސް ނިންމާލުމަށް މަސައްކަތް ކުރެވެމުންދާ ކަމަށް ވިދާޅުވިއެވެ.
އަދި މަސައްކަތް މިހާރު ކުރިއަށްދާ ގޮތުން، އަންނަ 2027 އަހަރު ނިމުމުގެ ކުރިން ނިންމާލެވޭނެ ކަމަށް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
