ދިވެހިރާއްޖޭގައި މަރުގެ ހުކުމް ތަންފީޒުކުރުމަށް ޓަކައި ޚާއްސަ ގާނޫނެއް ވުޖޫދު ކުރުމަށްޓަކައި، އޭގެ ބިލް މަޖިލީހަށް ހުށައެޅުމުގެ ތައްޔާރީތައް ކުރިއަށްދާ ކަމަށް ބަންޑާރަ ނާއިބު އަހްމަދު އުޝާމް ވިދާޅުވެއްޖެ އެވެ.
އުޝާމް މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރީންގެ ބައްދަލްވުމުގަ އެވެ. މަރުގެ ހުކުމް ތަންފީޒުކުރުމަށް ޓަކައި ޚާއްސަ ގާނޫނެއް ވުޖޫދު ކުރުމަށްޓަކައި، އޭގެ ބިލް ޑްރާފްޓުކުރުމުގެ މަސައްކަތް ކުރިއަށްދާ ކަމަށާއި، ރައްޔިތުންގެ މަޖިލީހުގެ މި ދައުރުގައި އެ ބިލް ހުށަހަޅާނެ ކަމަށް ރައީސް ޑރ. މުޙައްމަދު މުއިއްޒު ވެސް ވަނީ ވިދާޅުވެފަ އެވެ.
އެ ބިލާއި ގުޅޭގޮތުން ސުވާލު ކުރުމުން އުޝާމް ވިދާޅުވީ މަރުގެ ހުކުމް ތަންފީޒުކުރުމާއި ގުޅޭ ބިލުގެ މަސައްކަތް މި ދައުރުގެ ތެރޭގައި މަޖިލީހަށް ހުށައެޅުމަށް މަސައްކަތް ކުރަމުންދާ ކަމަށެވެ.
"ރައްޔިތުންގެ މަޖިލީހުގެ މި ދައުރު އެބަ ނިމޭ މި މަހު 15 ގައި. ގާތްގަނޑަކަށް ދެ ހަފްތާގެ ޗުއްޓީއަކަށްފަހު ދެން މި ހުޅުވެނީ ޖޫންމަހުގެ އެއްވަނަ ދުވަހު. އަޅުގަނޑު ގަބޫލުކުރަނީ ދެ ވަނަ ދައުރަށް މި ބިލުގެ މަސައްކަތް ނިންމައި މަޖިލީހަށް ހުށަހެޅޭނެކަމަށް," އުޝާމް ވިދާޅުވި އެވެ.
މި ބިލާއި ގުޅޭގޮތުން ރައީސް ކުރީން ވިދާޅުވީ، މަރުގެ އަދަބު ތަންފީޒުކުރުމުގެ ހުރިހާ މަރުޙަލާއެއް ފުރިހަމަވެފައި ތިބި މީހުން އެބަތިބި ކަމަށާ އެފަދަ ފަރާތްތަކަށް އެ އަދަބު ތަންފީޒުނުކުރައްވައި އެކަން މަޑު ޖައްސާލައިގެން ހުރުމަކީ އެ މަނިކުފާނަށް އޮތް “ޗޮއިސްއެއް“ ނޫންކަމަށެވެ.
މީގެ އިތުރުން ޑްރަގް ޓްރެފިކިން ގެ މައްސަލާގައި ގާނޫނަށް ގެނެވުނު އިސްލާހުގެ ދަށުން، ވަކިވަރަކަށްވުރެ ގިނައިން ޑްރަގް އެތެރެކުރާ މީހުންނަށްވެސް މަރުގެ އަދަބުދޭން ފާސްކުރެވިފައިވާކަން ފާހަގަކުރައްވައި އެމަނިކުފާނު ވިދާޅުވީ، އެފަދަ ފަރާތްތަކަށްވެސް މަރުގެ އަދަބު ތަންފީޒުކުރުމުގެ ކަންކަން އަދި މިހާތަނަށް ކުރެވިފައި ނުވާކަމަށެވެ.
އެހެންކަމުން މަރުގެ އަދަބު ތަންފީޒުކުރުމަށް، އެކަމަށް ޚާއްސަ ގާނޫނީ އޮނިގަނޑެއް އެކުލަވާލަންޖެހޭ ކަމަށާ، ހަމައެކަނި ގަވާއިދެއް ނުވަތަ އުސޫލެއްގެ ދަށުން އެކަން ކުރެވުމުގެ ބަދަލުގައި ގާނޫނެއްގެދަށުން އެކަން ކުރަންޖެހޭ ކަމަށް ރައީސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
