ސަރުކާރުން ކުރިއަށްގެންދާ ބޯހިޔާވަހިކަމުގެ ސިޔާސަތުގެ ދަށުން ފްލެޓްތައް އެޅުމަށް އަމިއްލަ ކުންފުނިތަކުގެ ވަރަށްބޮޑު ޝައުގުވެރިކަމެއް ލިބިފައިވާކަމަށް ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މުއްތަލިބް ވިދާޅުވީ، ރައްޔިތުންނަށް ބޯހިޔާވަހިކަން ހޯދައިދިނުމަށް ފްލެޓް އެޅުމަށް ހުޅުވާލި ފުރުސަތުގައި ދިވެހި ކޮންޓްރެކްޓަރުންގެ ފަރާތުން ވަރަށްބޮޑު ޝައުފުވެރިކަމެއް ލިބިގެންގޮސްފައިވާކަމަށެވެ. މިނިސްޓަރު ވިދާޅުވީ މިހާރުވެސް ދިވެހި ކޮންޓްރެކްޓަރުންގެ ފަރާތުން ގާތްގަނޑަކަށް ދިހަހާސް ޔުނިޓު އެޅުމަށްޓަކައި ޕްރޮޕޯސަލްތައް ލިބިފައިވާކަމަށެވެ. އޭގެ ތެރެއިން މިނިސްޓްރީން ބަލަންޖެހޭ ކަންކަން ބެލުމަށްފަހު ބައެއް ޕްރޮޕޯސަލްތަކުގައި ސޮއިކުރުމަށް އިކޮނޮމިކް ކައުންސިލަށް ހުށަހަޅާފައިވާކަން މިނިސްޓަރު ފާހަގަކުރެއްވިއެވެ.

މުއްތަލިބް ވިދާޅުވީ، އެގާރަހާސް ޔުނިޓާއެކު އިތުރު ޔުނިޓްތައް އެޅުމަށް ކުންފުނިތަކާއެކު މިހާރުވެސް މުއާމަލާތްތައް ކުރިއަށްދާކަމަށެވެ. މާލެ ސަރަހައްދުގައި ފްލެޓް އަޅަން ބަލާއިރު، މިހާރު އެންމެ ގިނަވެގެންވެސް އިމާރާތްކުރެވެން އޮތީ ބާރަހާސް ޔުނިޓްކަން މިނިސްޓަރުގެ ވިދާޅުވިއެވެ.

މިނިސްޓަރު ވިދާޅުވީ މާލެ ސަރަހައްދުގައި ފްލެޓް އަޅަން ބިން ލިބުން ދަތިނަމަވެސް އެޗްޑީސީ އާ ވާހަކަދައްކައިގެން ހައުސިންގެ ކަންކަމަށް ބައެއް ބިންތައް ލިބޭތޯ ބަލަމުން އަންނަ ކަމަށެވެ. އަދި ހަމަ އެހެންމެ މާލެއިންވެސް ބައެއް ބިންތައް ހޯދުމުގެ މަސައްކަތް ކުރަމުން އަންނަކަމަށް މިނިސްޓަރު ވިދާޅުވިއެވެެ.

މިނިސްޓަރު އިތުރަށް ވިދާޅުވީ އިސްވެދިޔަ ތަނުގައި ނަގާފައިހުރި ލޯނުތަކުގެ ސަބަބުން ބޯހިޔާވަހިކަމަށް ލޯނު ނެގުމަށް ބޮޑެތި ގޮންޖެހުންތައް ހުރިނަމަވެސް، ތަފާތު މޮޑެލްތައް ބޭނުންކޮށްގެން ގެދޮރޔު އެޅޭނެ ގޮތްތައް ހޯދަމުން އަންނަ ކަމަށެވެ. އެގޮތުން ބޭންކް އޮފް މޯލްޑިވްސްގެ ފަންޑްގެ ތެރެއިން މިހާރުވެސް ބޯހިޔާވަހިކަމުގެ ބައެއް ތަންތަނުގެ އަމަލީ މަސައްކަތް ފަށާފައިވާއިރު، އަމިއްލަ ކުންފުނިތަކަށް ހާއްސަ އިނާޔަތްތަކެއް ހަމަޖައްސައިދީގެން ހައުސިން ޔުނިޓްތައް އެޅުމުގެ މަސައްކަތް ކުރުމަށް ތައްޔާރުވަމުން އަންނަކަމަށެވެ.