ގަދަނުވާވަރަށް ބަލިވުމުން ޕެންޝަން ފައިސާ އެކީ ނެގޭ ގޮތް ހަދަން ގާނޫނަށް ހުށައަޅާފައިވާ އިސްލާހު ރައްޔިތުންްގެ މަޖިލީހުން މިއަދު ފާސްކޮށްފި އެވެ.
ޕެންޝަނާ ބެހޭ ގާނޫނަށް މި އިސްލާހު ހުށައެޅުއްވީ ސަރުކާރުގެ ފަރާތުން މިލަންދޫ ދާއިރާގެ މެންބަރު ހަސަން މުފީދު އެވެ. ގު މުއްދަތަށް ބޮޑެތި ބަލިތަކަށް ފަރުވާ ކުރަމުންދާ މީހުންގެ ތެރެއިން ގަދަވާނެ ކަމުގެ އުންމީދު ކުޑަ މީހުންނަށް ޕެންޝަން ފައިސާ އެއްކޮށް ނެގޭ ގޮތް ހަދަން އަދި ޕެންޝަން ފައިސާ ބޭނުންކުރެވޭ އިތުރު ހާލަަތްތައް ކަނޑައަޅަން ހުށައެޅި މި އިސްލާހު ފާސްކޮށްފައި ވަނީ ވޯޓަށް އެހިއިރު ތަޅުމުގައި ހާޒިރުވެ ތިބި 70 މެންބަރުންގެ ތެރެއިން 61 މެންބަރުންގެ ވޯޓުންނެވެ.
މިއީ ރައީސް މުއިއްޒުގެ ވައުދުފުޅެކެވެ. ރައްޔިތު ބައްދަލްވުންތަކުގައި އެެކަން ކޮށްދެއްވާނެ ކަމަށް އެމަނިކުފާނު ވިދާޅުވެފައިވެ އެވެ. އެ ބައްދަލްވުންތަކުގައި ރައްޔިތުން ވެސް ވަނީ އެފަދަ ބަދަލެއް ގެނެސް ދިނުމަށް އެދިފަ އެވެ.
މިއަދު ފާސްކުރި މި އިސްލާހާއެކު ފަރުވާ ދިން ނަމަވެސް އެއް އަހަރަށްވުރެ ގިނަ ދުވަހު ދިރިހުރުމުގެ ފުރުސަތު ކުޑަ ކަމަށް ޑޮކްޓަރަކު ކަނޑައަޅާ ހާލަތްތަކުގައި ޕެންޝަން ފައިސާ އެކީ ނެގޭނެ އެވެ. ނުވަތަ އެ މީހަކު ބޭނުން މިންވަރަކަށް ބަހާލައިގެން ވެސް ނެގޭނެ އެވެ.
މީގެ އިތުރުން ޕެންޝަން ފައިސާއިން ބޯހިޔާވަހިކަން ހޯދުމަށް ކުރީން އޮތް ފުރުސަތު އިތުރަށް ފުޅާކުރަން ވެސް ފާސްކޮށްފައިވެ އެވެ. ކުރީން އޮތްގޮތުން ފްލެޓަށް ޑައުންޕޭމަންޓް ދެއްކުމަށް ޕެންޝަން ފައިސާއިން މިންވަރެއް ބޭނުންކުރެވެ އެވެ. ނަމަވެސް އަލުން ގެނައި އިސްލާހާއެކު އަމިއްލަ ބިމުގައި ގެދޮރު އިމާރާތްކުރުމާއި، ދިރިއުޅޭ ގެދޮރު މަރާމާތުކުރުމާއި، މިފަދަ ބޭނުންތަކަށް ނަގާ ލޯނުތަކުގެ ޑައުންޕޭމަންޓް ދެއްކޭނެ އެވެ.
Advertisement
This content is created and paid for by advertisers and does not involve Voice Journalists
