އިދިކޮޅުގައި މިހާރު ތިއްބެވި ތިން ރައީސުން އެކުވެ މަޝްވަރާ ކުރެއްވުމަށް ނިންމެވި ކަމަށް ދެކެވޭ ވާހަކަތަކާއި ގުޅިގެން ސަރުކާރުގެ ތަރުޖަމާން މުހައްމަދު ހުސައިން ޝަރީފް (މުންދު) ވަރަށް ބޮޑަށް ފާޑު ވިދާޅުވެއްޖެ އެވެ.
ކުރީގެ ރައީސް ޔާމީން ވަނީ ރައީސް ނަޝީދާއި ރައީސް ސޯލިހާއެކު މަޝްވަރާކުރައްވާ އެކުގައި މަސައްކަތް ކުރައްވަން ތައްޔާރަށް ހުންނެވި ކަމަށް ވިދާޅުވެފަ އެވެ. އެއާއެކު ތިން ރައީސުންގެ މަޝްވަރާތަކެއް ވަރަށް އަވަހަށް ފެށޭނެ ކަމަށް ދަނީ ވާހަކަ ދެކެވެމުންނެވެ. އެމްޑީޕީގައި ދެ ރައީސުންގެ މެދުގައި ބޮޑު ނުތަނަވަސް ކަމެއް އޮތް ނަަމަވެސް ސަރުކާރާ ދެކޮޅަށް ކުރެވޭ މަސައްކަތެއްގައި ދެ ރައީސުން ވެސް ބައިވެރިވާނެ އެވެ.
ތިން ރައީސުންގެ މަޝްވަރާއާ ގުޅޭގޮތުން ސުވާލުކުރުމުން މިއަދު އޮތް ''ޕްރެސާ ވިތު ދަ ސްޕޮކްސް'' ގައި ތަރުޖަމާން ވިދާޅުވީ އެއީ ވެރިކަަން ލިބިވަޑައިގަތުމުން ދެން ތިއްބެވި ބޭފުޅުން ހައްޔަރު ކުރެއްވި ބޭފުޅުން ކަމަށެވެ. ތަރުޖަމާން އެ އިޝާރާތް ކުރައްވަނީ ރައީސް ނަޝީދުގެ ވެރިކަމުގައި ރައީސް ޔާމީން އަދި ރައީސް ޔާމީންގެ ވެރިކަމުގައި ރައީސް ނަޝީދު އަދި ރައީސް ސޯލިހްގެ ވެރިކަމުގައި ރައީސް ޔާމީން ހައްޔަރު ކުރެއްވި ކުރެއްވުމަށެވެ.
ނަޝީދުގެ ވެރިކަމުގައި ޔާމީން ހައްޔަރުކޮށް އާރަށުގައި ބަންދުކުރެެއްވި އެވެ. އަދި ޔާމީންގެ ވެރިކަމުގައި ނަޝީދަށް 12 އަހަރުގެ ޖަލު ހުކުމެއް އިއްވާ ޖަލުގައި ބަންދު ކުރެއްވި އެވެ. ރައީސް ސޯލިހްގެ ވެރިކަމުގެ ބޮޑުބައިގައި ޔާމީން އޮންނެވީ ޖަލުގަ އެވެ.
"ކޮންމެ ބޭފުޅަކަކީ އަނެއް ބޭފުޅަކު ހައްޔަރު ކުރެއްވި ބޭފުޅެއް. ކޮންމެ ބޭފުޅަކީ އަނެއް ބޭފުޅަކު އެބޭފުޅުންގެ ސީދާ މެއިން ރައިވަލްއޭ ވިދާޅުވި ބޭފުޅުން," މުންދު ވިދާޅުވި އެވެ.
ތަރުޖަމާން އަދި ވިދާޅުވީ ތިން ރައީސުންގެ މަގްސަދަކީވެސް އެއް މަގުސަދެއް ކަމަށެވެ. އެއީ އިދިކޮޅުގެ ރިޔާސީ ޓިކެޓް ހޯއްދެވުން ކަމަށް ވިދާޅުވި އެވެ. އަދި އެކުގައި މަސައްކަތް ކުރައްވަން ވިދާޅުވާއިރު މިއީ ކުރީން ކިހާ އެކުގައި އުޅުއްވި ބޭފުޅުންތަކެއްތޯ ސުވާލު ކޮށްލަން ޖެހޭ ކަމުގައި ވިދާޅުވި އެވެ.
Advertisement
This content is created and paid for by advertisers and does not involve Voice Journalists
