ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން 2026 ވަނަ އަހަރުގެ އޮގަސްޓް މަހު ފެށުމަށް ހަމަޖެހިފައިވާ ދެވަނަ ޓާމުގެ ކޯސްތަކަށް ކުރިމަތިލުމުގެ ފުރުޞަތު މިއަދު ހުޅުވާލައިފިއެވެ.

އެމްއެންޔޫއިން ބުނި ގޮތުގައި، މި ކޯސްތަކަށް އެދި ހުށަހެޅުމުގެ މުއްދަތު ކުރިއަށްދާނީ 17 މޭ 2026 ވާ އާދިއްތަ ދުވަހުގެ ހެނދުނު 08:00 އިން ފެށިގެން 30 ޖުލައި 2026 ވާ ބުރާސްފަތި ދުވަހުގެ މެންދުރުފަހު 14:00 ގެ ނިޔަލަށެވެ. ކޯސްތަކަށް އެޕްލައިކުރުމުގެ ހުރިހާ މަރުހަލާއެއްވެސް ކުރިއަށްދާނީ އޮންލައިންކޮށް، އެ ޔުނިވަރސިޓީގެ ޕޯޓަލް (portal.mnu.edu.mv) މެދުވެރިކޮށެވެ.

ކޯސްތަކަށް އެދި ފޯމު ހުށަހަޅާއިރު ސަމާލުކަންދޭންޖެހޭ ކަންތައްތަކެއް އެމްއެންޔޫއިން ވަނީ ފާހަގަކޮށްފައެވެ. އެގޮތުން، ހުށަހަޅާ އެންމެހާ ލިޔުންތައް ހުންނަންވާނީ އެއް ފައިލެއްގެ ގޮތުގައި، ކިޔަން ސާފުވާނޭހެން ޕީ.ޑީ.އެފް ފޯމެޓުގައި ސްކޭންކޮށްފައެވެ. ޔުނިވަރސިޓީން ހިންގާ އެކި ދާއިރާތަކުގެ ކޯސްތަކާ ބެހޭ ތަފްސީލީ މަޢުލޫމާތު courses.mnu.edu.mv އިން ލިބިވަޑައިގަންނަވާނެ ކަމަށްވެސް އެ ޔުނިވަރސިޓީން ބުނެއެވެ.

މީގެ އިތުރުން، ސިއްހީ ދާއިރާގެ ބައެއް މުހިންމު ކޯސްތަކަށް ހޮވޭ ފަރާތްތަކަށް އެކަމުގެ ލިޔުން ދޫކުރާނީ 30 ޖުލައި 2026 ގެ ފަހުންނެވެ. އޭގެ ތެރޭގައި ހިމެނެނީ:

އެޑްވާންސްޑް ސެޓްފިކެޓް އިން ނަރސިންގ

ބެޗްލަރ އޮފް ނަރސިންގ

ބެޗްލަރ އޮފް ފިޒިއޮތެރަޕީ

ކޯހަށް ވަނުމުގެ ޝަރުތުތައް ބެލުމަށް: https://mnu.edu.mv/wp-content/uploads/2026/05/Final-Course-Information-Sheet-2026-Term-2.pdf