ހއ.ބާރަށް ވަށައިގެންވާ މަގު ހެދުމުގެ މަސައްކަތުގައި ހިމާޔަތްކޮށްފައިވާ ސަރަހައްދަކުން ރުއްގަސްނެގި މައްސަލާގައި ޒިންމާދާރުވުމަށް އެދި އެންވަޔަރަންމަންޓަލް ރެގިއުލޭޓަރީ އޮތޯރިޓީން ބާރަށު ކައުންސިލަށް ނަސޭހަތްތެރިވެއްޖެއެވެ.

އީޕީއޭއިން ބާރަށު ކައުންސިލަށް ނަސޭހަތްތެރިވެފައިވަނީ، މަގު ހެދުމުގެ މަސައްކަތް ކުރަމުންދާ ކުންފުނި އެމްޓީސީސީން އެރަށު ކުޅި، ފާ، ޗަސްބިމުގެ ސަރަހައްދު" ހިމެނޭހެން ޤާނޫނާއި ގަވާއިދާ ޚިލާފަށް އެ އޮތޯރިޓީގެ ހުއްދަނެތި ރުއްގަސް ނަގައި މަގު ސާފުކޮށް މަގު ފުޅާކުރި މައްސަލާގައެވެ. 

ބާރަށު ވަށައިގެންވާ މަގު އެމްޓީސީސީން ހަދަނީ އެކުންފުނީގެ އިޖުތިމާއީ ޒިންމާގެ ދަށުން ކުރެވޭ މަސައްކަތެއްގެ ގޮތުގައެވެ. މަގު ހެދުމުގެ މަސައްކަތުގައި އެމްޓީސީސީން ވަނީ، އީޕީއޭގެ ރުހުން ހިމާޔަތްކޮށްފައިވާ ބައެއް ސަރަހައްދުތައް އުސޫލާ ހިލާފަށް ސާފުކޮށްފައެވެ. އީޕީއޭއިން ބުނީ، ހުއްދަނެތި ރުއްގަސް ނަގައި މަގު ސާފުކުރި މައްސަލަ ބަލާފައިވާކަމަށެވެ. އެގޮތުން ބައެއް ސަރަހައްދުތައް "ޤުދުރަތީ ނުވަތަ ޠަބީޢީގޮތުގައި ރައްކައުތެރިކޮށް ދެމަހައްޓާ ތަންތަނާބެހޭ ގަވާއިދު" އާ ހިލާފަށް ސާފްކޮށްފައިވާކަން އެއޮތޯރިޓީން ވަނީ ފާހަގަކޮށްފައެވެ.

މި މައްސަލަ ބެލުމަށްފަހު އީޕީއޭއިން ވަނީ އެމްޓިސީސީ 550,000 ރުފިޔާއިން ޖޫރިމަނާކޮށްފައެވެ. އަދި އިއްޔެއިން ފެށިގެން 30 ދުވަހުގެ ތެރޭގައި ޖޫރިމަނާ ފައިސާ ބަނޑޭރި ޕޯޓަލް މެދުވެރިކޮށް ދެއްކުމަށްވެސް ވަނީ އެމްޓީސީސީއަށް އަންގާފައެވެ.

މިކަމާ ގުޅިގެން އީޕީއޭއިން ބުނީ، އެމްޓީސީސީން ހުށަހަޅާފައިވާ ރެސްޓޮރޭޝަން ޕްލޭން، އެ ފަރާތުގެ އަމިއްލަ ހަރަދުގައި ކުރިޔަށް ގެންދިޔުމަށާއި، ރެސްޓޮރޭޝަނާ ގުޅުންހުރި މަސައްކަތްތައް ބާރަށު ކައުންސިލް އިދާރާގެ ބައިވެރިވުން ހިމެނޭގޮތަށް ކުރިޔަށް ގެންދިޔުމަށްވެސް އަންގާފައެވެ. އަދި ރެސްޓޮރޭޝަނާ ގުޅުންހުރި މަސައްކަތްތައް މޮނިޓަރކޮށް ބަލަހައްޓައި، އޮތޯރިޓީން އަންގާ ގޮތެއްގެ މަތިން އެ މައުލޫމާތު ހިއްސާކުރުމަށްވެސް ވަނީ އަންގާފައެވެ.

އީޕީއޭއިން ބުނީ ބާރަށުގެ ވަށައިގެންވާ މަގު ހެދުމަށް ޓަކައި، ރުއްގަސް ނެގުމުގައި ރަށުގެ ހޭޅިފަށުންނާއި ހިމާޔަތްކޮށްފައިވާ ސަރަހައްދަކުން އެއްވެސް ރުއްގަހެއް ނުކެނޑުމަށް އޮތޯރިޓީން ބާރަށު ކައުންސިލް އިދާރާއަށް މީގެ ކުރިން އަންގާފައިވާކަމަށެވެ. އެގޮތަށް އަންގާފައިވަނިކޮށް، އެ އެންގުމާއި ޚިލާފަށް އެމް.ޓީ.ސީ.ސީ މަސައްކަތްތައް ކުރިޔަށް ދިޔަހިނދު، ބާރަށު ކައުންސިލް އިދާރާއިން އެކަން މި އޮތޯރިޓީއަށް ރިޕޯޓް ނުކުރުމަކީ ޒިންމާދާރުކަން ކުޑަ ގޮތެއްގައި ކޮށްފައިވާ ކަމެއްކަމަށް އީޕީއޭއިން ވަނީ ފާހަގަކޮށްފައެވެ. އަދި އެފަދަކަމެއް ތަކުރާރު ނުކުރުމަށް ނަސޭހަތްތެރިވެފައިވާކަމަށްވެސް އީޕީއޭއިން ވަނީ ބުނެފައެވެ.