ތ.ވިލުފުށީގައި ރަށު ފެންވަރުގައި އަޟްހާ ޢީދު ފާހަގަކުރުމަށް ބޭއްވި ހަރަކާތްތަކުގެ ތެރެއިން އިއްޔެ ހަވީރު ބޭއްވި މާލި ޕެރޭޑަށް ކަމާ ނުބެހޭ ބަޔަކު ވަދެގަނެ ހިންގި އަމަލުތައް ވިލުފުށި ކައުންސިލުން ކުށްވެރިކޮށްފިއެވެ.
އިއްޔެ ހަވީރު ވިލުފުށީގައި ބޭއްވި މަށި މާލި ޕެރޭޑްގެ ތެރޭގައި ހިނގާދިޔަ ހާދިސާއާ ގުޅޭގޮތުން އެރަށު ކައުންސިލުން ނެރުނު ބަޔާނުގައި ބުނެފައިވަނީ، އީދުގެ ކުޅިވަރުތައް ކައުންސިލުން ރާވާ އިންތިޒާމު ކޮށްފައިވާނީ ރަށުގެ މުއައްސަސާތަކާއި ދައުަލަތުގެ ކުންފުނިތަކާއި، ރަށުގެ ޖަމްޢިއްޔާތަކާއި ޒަމާނުންސުރެ ރަށުގައި، އޮންނަ ހަތަރު ވިލާ ހިމެނޭގޮތުން ޖުމްލަކޮށް، ރަށުގެ ހުރިހާ ރައްޔިތުން ޝާމިލު ވާނޭގޮތަށް ކަމަށެވެ. އަދި މި ކުޅިވަރުތައް ބާއްވަނީ ހުރިހާ އުމުރު ފުރާތަކެއްގެ ކުޅިވަރުތައް ހިމަނައިގެން ޘަޤާފީ ޢީދު" ނަމުގައި އިހުގެ ގިނަ ކުޅިވަރުތަކާއި ޙަރަކާތްތައް .ހިމަނައިގެން ކަމަށެވެ.
އެ ކުޅިވަރުތައް އިންތިޒާމުކޮށް ރާވާފައިވަނީ ޒުވާނުންނާއި ކުޑަކުދިންނާއި، ގުޅޭގޮތުން އާއްމު އިޖުތިމާއީ މިންގަނޑުތަކާއި ހިލާފް ނުވާނޭގޮތަށް އިސްކަންދީގެން ކަމަށްވެސް ވިލުފުށި ކައުންސިލުން ބުންޏެވެ.
ވިލުފުށީގައި އިއްޔެ ކުރިއަށްދިޔަ މާލި ޕެރޭޑްގެ ތެރެއިން..
އެގޮތުން އިއްޔެ ބޭއްވި މާލި ޕެރޭޑަކީވެސް އެކަމަށް ޝައުގުވެރިވާ ދަރިވަރުންނާއި ޒުވާނުންނަށް އަދި އާންމުނަށް ބައިވެރިވުމުގެ ފުރުސަތު ދީގެން މީގެ ކުރިންވެސް ބާއްވަމުންދާ އިވެންޓެއްކަމަށް ކައުންސލުން ފާހަގަކުރިއެވެ.
ވިލުފުށި ކައުންސިލުން ބުނީ ސިޔާސީ ކުލަ ޖެއްސުމުގެ މަގްސަދުގައި ކަމާ ގުޅުންނެތް ބަޔަކު ޕެރޭޑެއްގެ ސިފާގައި ކައުންސިލުން ކުރިއަށްގެންދިޔަ ޕެރޭޑްގެ ތެރެއަށް ވަދެގަނެ ސަރުކާރާއި ކައުންސިލާއި ޖެހޭގޮތަށް ހިންގާފައިވާ އަމަލުތައް ކައުންސިލުން ހަރުކަށި އިބާރާތުން ކުށްވެރިކުރާ ކަމަށެވެ. އަދި މިފަދަ ނާތަހުޒީބު ކަންކަން ތަކުރާރު ކުރުމަށް ކައުންސިލުން ފުރުސަތު ނުދޭނެކަމުގެ ޔަގީންކަން އަރުވާކަމަށްވެސް ކައުންސިލްގެ ބަޔާނުގައި ވަނީ ބުނެފައެވެ.
ކައުންސިލްގެ ބަޔާނުގައި ބުނެފައިވަނީ ވިލުފުއްޓަކީ ނިމިދިޔަ އިންތިޚާބުގައި އިންތިޚާބަކާ ނުލައި ސަރުކާރަށް ކައުންސިލް 4 ގޮނޑިއާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ 5 ގޮނޑިދީފައިވާ ރަށެއް ކަމަށެވެ. އަދި ކައުންސިލްގެ ރައީސްގެ ގޮނޑިވެސް ބޮޑު ތަފާތަކުން ދީފައިވާ ސަރުކާރާމެދު ގިނަ އުންމީދު ތަކެއްއޮތް ރައްޔިތެއް ދިރިއުޅޭ ރަށެއްކަމަށްވެސް ބުންޏެވެ.
ކައުންސިލުން މަސައްކަތްކުރާނީީ ވިލުފުށީ ރައްޔިތުން ދެއްކި ނަމޫނާ އެއްބައިވަންތަކަމާއެކު، ރަށުގެ ތަރައްޤީއަށް އެ ރައްޔިތުންގެ މެދުގައި އޮތް އުންމީދު ޙަޤީޤަތަކަށް ހަދައިދިނުމަށްކަމަށެވެ. އެހެންކަމުން ސިޔާސީ ދެކޮޅުވެރިކަމާއި ބައިބައިވުމަށް، ޖާގަނުދީ އެކުވެރިކަމާއި، އެއްބައިވަންތަކަމާއެކު އެންމެން، "އެކުއެކީގައި، ފަށާފައިވާ މިދަތުރުގެ މަންޒިލަށް ވާސިލުވުމަށް، މަސައްކަތްކޮށް ދިނުމަށް، ވިލުފުށި ކައުންސިލުން ވަނީ ރައްޔިތުންގެ ކިބައިން އެދިފައެވެ.
Advertisement
This content is created and paid for by advertisers and does not involve Voice Journalists
