ކުޑަހުވަދޫގައި މިހާރު ކުރިއަށްދާ ބޮޑު ޢީދު ފުޓްސަލް ޗެލެންޖގައި ރޭ އައްސޭރި ސްޕޯޓްސް ކްލަބާއި ޔުނައިޓެޑް ރޯޔަލްސް ބައްދަލުކުރިމެޗް ފަސޭހަކަމާއެކު އައްސޭރި ކާމިޔާބުކޮށްފިއެވެ.

ކުޑަހުވަދޫ އަކިރެއިރެ ފުޓްސަލް ގްރައުންޑުގައި ކުޅުނު މި މެޗުގައި އައްސޭރި ކާމިޔާބުކުރީ 8-0 ގެ ނަތީޖާއަކުންނެވެ. މިމެޗްގައި އައްސޭރީގެ ފަރާތުން ފެނިގެންދިޔައީ ވަރުގަދަ ކުޅުމެކެވެ.

މި މެޗުގެ އެންމެ ފާހަގަކޮށްލެވޭ ކުޅުންތެރިޔަކީ ހެޓްރިކް ހެދި ރައްޔާން ބިން އިސްމާޢީލް ޢާދިލެވެ. މެޗްގައި ރައްޔާން ތިން ގޯލް ޖެހިއިރު، ލޫތް ވަނީ ދެ ގޯލް ކާމިޔާބުކޮށްފައެވެ. އައްސޭރިއަށް ދެން ގޯލްތައް ޖަހައިދިނީ އިބްރާހީމް ރަޝާދު، ލަޔާން ޢަބްދުﷲ އަދި ޒަލަފެވެ. 

މެޗުގެ މޮޅު ކުޅުންތެރިޔާގެ މަގާމު ހައްގު ކުރީ ހެޓްރިކް ހެދި ރައްޔާން ބިން އިސްމާޢީލް ޢާދިލެވެ.

މެޗްގެ މޮޅު ކުޅުންތެރިޔާގެ މަގާމް ހޯދި ރައްޔާން..

މި ނަތީޖާއާ އެކު ގްރޫޕް 1 ގެ ތާވަލަށް ވަނީ ބަދަލުތަކެއް އައިސްފައެވެ. އެގޮތުން މީގެ ކުރިން ދެ މެޗުން ބަލިވެ ޕޮއިންޓެއް ނުލިބި އޮތް އައްސޭރި އެސްސީއަށް ލިބުނު މި މޮޅާ އެކު ވަނީ ތިން ޕޮއިންޓް ލިބިފައެވެ. ޔުނައިޓެޑް ރޯޔަލްސް އަށް ތިން މެޗުން ވެސް ޕޮއިންޓެއް ނުހޯދި، އޮތީ ތާވަލްގެ އެންމެ ފުލުގައެވެ. މިހާތަނަށް ކުޅުނު މެޗްތަކަށް ބަލާއިރު، ގްރޫޕްގެ ކުރީގައި ނުވަ ޕޮއިންޓާ އެކު ރޯޔަލްސް ސިޓީ އޮތްއިރު، ހަ ޕޮއިންޓާ އެކު މައިދާން އެސްސީ އޮތީ ދެވަނައިގައެވެ.