ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އާޓްސްއިން އިންތިޒާމުކޮށްގެން ބޭއްވުމަށް ހަމަޖެހިފައިވާ "ޗައިނީޒް ލޭންގުއޭޖް ބޭސިކް" ކޯހުގައި ބައިވެރިވުމަށް ފޯމު ހުށަހެޅުމުގެ މުއްދަތު އެ ފެކަލްޓީން އިތުރުކޮށްފިއެވެ.

އެމްއެންޔޫއިން ބުނި ގޮތުގައި، މި ކޯހުގައި ބައިވެރިވާން އެދޭ ފަރާތްތަކަށް ފޯމު ހުށަހެޅުމުގެ ފުރުސަތު މިހާރު ވަނީ 31 މޭ 2026 ވާ އާދިއްތަ ދުވަހުގެ ރޭގަނޑު 23:59 އާ ހަމައަށް ހުޅުވާލާފައެވެ. މި ކޯހަކީ ޗައިނާ ބަހުގެ އަސާސީ މައުލޫމާތާއި، އާންމު ދިރިއުޅުމުގައި ބޭނުންކުރާ ބަސްމަގު ދަސްކޮށްދިނުމަށް ޚާއްޞަކޮށްގެން ފަރުމާކުރެވިފައިވާ ކޯހެކެވެ.

02 ޖޫން 2026 ގައި ފެށުމަށް ހަމަޖެހިފައިވާ މި ކޯސް ކުރިއަށްދާނީ 23 ޖުލައި 2026 ގެ ނިޔަލަށެވެ. ކިޔަވައިދިނުން ކުރިއަށްދާނީ ކޮންމެ ހަފުތާއެއްގެ އާދިއްތަ، އަންގާރަ އަދި ބުރާސްފަތި ދުވަހުގެ ރޭގަނޑު 19:00 އިން 21:00 އަށެވެ.

މި ކޯހުގެ މުހިންމު ބައެއް ތަފުސީލުތައް:

ކިޔަވައިދޭ ގޮތް: ފިޒިކަލްކޮށް ކލާސްތަކަށް ހާޒިރުވެގެން.

ޖާގަ: 30 ބައިވެރިން (ބައިވެރިން ހޮވުމުގައި އިސްކަންދެވޭނީ ފޯމު ހުށަހަޅާ ތަރުތީބުން).

އުމުރުފުރާ: 16 އަހަރުން މަތި.

ކޯސް ފީ: 2,250 (ދެހާސް ދުވިސައްތަ ފަންސަސް) ރުފިޔާ.

މި ކޯހުގައި ބައިވެރިވާން އެދޭ ފަރާތްތަކުން އޮންލައިން ލިންކު މެދުވެރިކޮށް ފޯމު ހުށަހެޅުމަށް އެ ފެކަލްޓީން އިރުޝާދު ދެއެވެ. އަދި ކޯހާ ގުޅޭ އިތުރު މައުލޫމާތު ސާފުކުރެއްވުމަށް ބޭނުންފުޅުވާ ނަމަ، ފެކަލްޓީ އޮފް އާޓްސްގެ އީމެއިލް އެޑްރެސް [email protected] އަށް މެއިލް ކުރެއްވުމަށް އެމްއެންޔޫއިން އެދެއެވެ.