ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އިންތިޒާމުކޮށްގެން ބާއްވާ "އެމް.އެން.ޔޫ ފަހި ފުރުސަތު 2026" ވަޒީފާގެ ބާޒާރު، މާދަމާއިން ފެށިގެން މިމަހުގެ 5 އަށް ބޭއްވުމަށް ނިންމައިފިއެވެ.

ދިވެހިރާއްޖޭގެ ޤައުމީ ޔުނިވަރސިޓީން މަޢުލޫމާތު ދޭ ގޮތުގައި، ތިން ދުވަހުގެ މުއްދަތަށް ކުރިއަށްދާ މި އިވެންޓް އޮންނާނީ ކޮންމެ ދުވަހެއްގެ ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށެވެ.

މި ބާޒާރު ކުރިއަށްދާނީ އެމްއެންޔޫގެ މާލޭ ކެމްޕަހުގެ އިތުރުން، އެ ޔުނިވަރސިޓީގެ އަތޮޅުތެރޭގެ ކެމްޕަސްތަކުގައެވެ.

މި އަހަރުގެ ފެސްޓިވަލްގައި 32 އަށްވުރެ ގިނަ މުއައްސަސާއަކުން ބައިވެރިވެއެވެ. މީގެ ތެރޭގައި ސަރުކާރުގެ އެކި މުއައްސަސާތަކާއި، އަމިއްލަ ކުންފުނިތަކުގެ އިތުރުން އެމްއެންޔޫގެ އެކި ފެކަލްޓީތަކާއި ސްޓޯލްތައް ހިމެނެއެވެ.

މި ބާޒާރުގެ ތެރެއިން ވަޒީފާގެ ފުރުސަތުތަކުގެ މަޢުލޫމާތު ދިނުމުގެ އިތުރުން، ދަރިވަރުންނާއި އާންމުންނަށް ބޭނުންވާ ކެރިއަރ ގައިޑެންސް ނުވަތަ ދާއިރާތަކުން ކުރިއަށްދާނެ މަގުދެއްކުމުގެ ސެޝަންތައް ވެސް ކުރިއަށްދާނެއެވެ.

އެމްއެންޔޫއިން ބުނި ގޮތުގައި މި ވަޒީފާގެ ބާޒާރަކީ ވަޒީފާ ދޭ ފަރާތްތަކާއި، ވަޒީފާ ހޯދާ ފަރާތްތަކުގެ އިތުރުން، ޔުނިވަރސިޓީން ދަސްވެނިވާ ދަރިވަރުން އެއް ފުރާޅެއްގެ ދަށުން ބައްދަލުވެ، ފަންނީ ދާއިރާތަކުން ގުޅުން ބަދަހިކުރުމަށް ހުޅުވާލެވޭ ރަނގަޅު ފުރުސަތެކެވެ.

"މުޖުތަމައަށް އަނބުރާ ދިނުން"މި ޝިއާރުގެ ދަށުން ބާއްވާ މި އިވެންޓަކީ މުޅި އާންމުކޮށް ހުޅުވާލެވިގެން، އެއްވެސް ފީއަކާ ނުލައި ވަދެވޭނެ ބާޒާރެކެވެ. މިއީ ރާއްޖޭގެ ވަޒީފާގެ ބާޒާރަށް ނުކުންނަ ޒުވާނުންނަށް ބޭނުންވާ މުހިންމު މަޢުލޫމާތާއި ފުރުސަތުތައް ފޯރުކޮށްދިނުމުގެ މަޤްޞަދުގައި ބާއްވާ ހަރަކާތެކެވެ.