ބޭންކް އޮފް މޯލްޑިވްސް އިން ނެރޭ ސުކޫކްގެ ބޭނުމަކީ ސަރުކާރުގެ ހަރަދުތައް ހަމަޖެއްސުން ނޫންކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

ފިޗުން ނެރުނު ރާއްޖޭގެ ރޭޓިންނާ ބެހޭގޮތުން ރޭ އެކްސްގައި ކުރެއްވި ޕޯސްޓެއްގައި ބީއެމްއެލްގެ ސުކޫކާ ގުޅޭގޮތުން މާލީ ވަޒީރު މޫސާ ޒަމީރު ވިދާޅުވީ، ސަރުކާރުން ގެރެންޓީ ދީގެން ބޭންކުން ނެރުމަށް ހަމަޖެހިފައިވާ ސުކޫކަކީ އަމިއްލަ ފަރާތްތަކުގެ އިންވެސްޓްމަންޓްތައް ފުޅާކުރުމަށް އަމާޒުކޮށްފައިވާ ކަމެއް ކަމަށެވެ.

މި ސުކޫކަކީ މެދު ރާސްތާގައި އިޤްތިޞާދު ކުރިއެރުވުމަށް، ޚާއްސަކޮށް ރާއްޖޭގެ އުތުރާއި ދެކުނުގެ ސަރަހައްދުތަކުގައި ފަތުރުވެރިކަމުގެ ދާއިރާ ކުރިއެރުވުމަށް އަމާޒުކޮށް ސަރުކާރާއި ބީއެމްއެލް ގުޅިގެން ކުރިއަށްގެންދާ މާލީ މުއާމަލާތެއް ކަމަށެވެ.

މޫސާ ޒަމީރު ވިދާޅުވީ މިކަން ކުރުމަށް ސަރުކާރުން އިސްނެގުމުގެ މައިގަނޑު ސަބަބަކީ ފަތުރުވެރިކަމުގެ ދާއިރާގެ ތެރެއިން އިޤްތިޞާދު ކުރިއެރުވުމާއި، އަމިއްލަ ވިޔަފާރިތަކުގެ އިންވެސްޓްމަންޓްތަކަށް މަގުފަހިކޮށްދިނުމުގެ އިތުރުން، މާލެ ސަރަހައްދު ފިޔަވައި އެހެން ސަރަހައްދުތަކުގައި އިޤްތިޞާދީ ހަރަކާތްތައް ފުޅާކުރުން ކަމަށެވެ.

މި ސުކޫކުގެ ސަބަބުން ދައުލަތަށް އާމްދަނީ ލިބޭ ވަޞީލަތްތައް އިތުރުވެ، ކުރިއަށް އޮތް އަހަރުތަކުގައި ކަނޑައަޅާފައިވާ މާލީ ލަނޑުދަނޑިތައް ހާސިލުކުރުމަށް ބާރަކަށް ވާނެ ކަމަށްވެސް ވަޒީރު ވިދާޅުވިއެވެ.

އެގޮތުން މި ސުކޫކާއެކު ރާއްޖޭގެ އުތުރާއި ދެކުނުގެ ސަރަހައްދުތަކަށް އަމާޒުކޮށް އިގްތިސާދީ އަދި ވިޔަފާރީގެ މުހިންމު ހަރަކާތްތަކެއް ހިންގިގެންދާނޭކަން ވަޒީރު ފާހަގަކުރެއްވިއެވެ.

ފިޗުން އިއްޔެ ނެރުނު ރޭޓިންގައި ރާއްޖޭގެ ދަރަޖަ މަތިކޮށްފައިވާއިރު، ކްރެޑިޓް ރެޓިން މައްޗަށް ޖައްސާލާފައިވަނީ މިއަހަރުގެ އޭޕްރިލް މަހުގައި ދައްކަންޖެހޭ ސުކޫކްގެ ފައިސާ ދައްކައި ހަލާސްކުރުމުންނެވެ. އާމްދަނީ އިތުރުކުރުމަށް ގެންނަ އިސްލާހުތަކާއި ބޭރު ފައިސާއާ ބެހޭ ޤާނޫނުގެ ސަބަބުން، ދައުލަތަށް ބޭރު ފައިސާ ހޯދުމުގެ ޤާބިލުކަން އިތުރުވާނެ ކަމަށް ފިޗުން ވަނީ ފާހަގަކޮށްފައެވެ.

ފިޗްގެ ރޭޓިންގް މަތިވުމަކީ އިޤްތިޞާދީ ހާލަތު ރަނގަޅުވަމުންދާ ކަމުގެ ހެއްކެއް ކަމަށް މާލީ ވަޒީރު ވަނީ ފާހަގަކުރައްވާފައެވެ. އަދި މިކަމަކީ ސަރުކާރުގެ މާލީ އިޞްލާހީ އެޖެންޑާއަށް އޮތް އިތުބާރު ބޮޑުވަމުންދާ ކަމުގެ ނިޝާނެއް ކަމަށްވެސް ވަޒީރު ވަނީ ވިދާޅުވެފައެވެ.