މިދިޔަ އާދިއްތަ ދުވަހުގެ ރޭ އައްޑޫ ސިޓީ ހިތަދޫގައި ނުރައްކާތެރި އެކްސިޑެންޓެއް ހިނގި އެވެ. ބާރު ސްޕީޑްގައި ދުއްވާފައި އައި ސައިކަލެއް އެހެން ސައިކަލެއްގައި ޖެހި ހިނގި މި އެކްސިޑެންޓްގައި ދެ މީހަކަށް އަނިޔާވި އެވެ.
އެންމެ ބޮޑުވަރުވީ ސ. ހިތަދޫ, ޖަބްރާނުގޭ އުމުރުން 48 އަހަރުގެ ރަމީޒް އަބްދުﷲ އަށެވެ. ރަމީޒަކީ ގަވާއިދު ފަޅުން މަޑުމަޑުން ސައިކަލުގައި އައި މީހާ އެވެ. ރަމީޒު, ދުއްވި ސައިކަލުގައި ޖެހުނީ ބާރު ސްޕީޑްގައި ދުއްވަމުންް އައިސް ނުބައި ފަޅިން ދުއްވަމުން އައި ސައިކަލެވެ.
އެކްސިޑެންޓާއި ގުޅިގެން ރަމީޒަށް ވަރަށް ހާނިއްކަވި އެވެ. ބޮލަށް ވަރަށް ބޮޑަށް ގެއްލުންވި އެވެ. ނާށިގަނޑު ފަޅައިގެންގޮސް ސިކުނޑިއަށް ލޭ އެޅުނެވެ. އެކި ގުނަވަންތައް ވަނީ ބިނދިފަ އެވެ. ކަނާތު ފަޔަށް ވަނީ ވަރަށް ބޮޑު ޒަޚަމެއް ލިބިފަ އެވެ. ބައެއް މަސްދަރުތަކުން ޔަގީން ކުރެވުނު ގޮތުގައި ފައިގެ ބޮޑު ބައެއް ވަނީ ޗިސްވެފަ އެވެ.
އެކްސިޑެންޓްގެ ކުރީން ރަމީޒަކީ ގަދަފަދަކޮށް ހުރި މީހެކެވެ. ސިއްހީ އެއްވެސް މައްސަލައެއް ނެތެވެ. ނަމަވެސް އެއްވެސް ގުޅުމެއް ނެތް ނުރައްކާތެރި އެކްސިޑެންޓެއްގައި މުޅި ދިރިއުޅުން ބަދަލުވީ އެވެ. ހަފްތާއެއްހާ ދުވަހުގެ ގަދަ ވޭނުގައި ހޭދަކުރުމަށް ފަހު މިއަދު ދުނިޔެ ދޫކުރީ އެވެ.
ތިން ކުދީން ބިކަވީ, އުފާވެރި އާއިލާއަކަށް ފުން ހިތާމައެއް
ރަމީޒަކީ މޮޅު ކެއްކުންތެރި އެކެވެ. ޒިންމާދާރުކަމާ އެކު ވަޒީފާގައި އުޅެމުންދިޔަ ހެޔޮ އަޚްލާގެއްގެ ވެރިއެކެވެ.
ތިން ކުދީންގެ ބައްޕަ އެކެވެ. އުފާވެރި އާއިލާއެއްގެ މައިތަނބެވެ. ކުދީންނާއި ރަމީޒްއާ އޮތީ ވަރަށް ހާއްސަ ގުޅުމެކެވެ. އާއިލާއިން ފާހަގަކުރާ އެންމެ ހާއްސަ ކަމަކީ އެ ކުދީން ބޭނުންވާ މީރު ކާތަކެތި ތައްޔާރު ކުރުމުގައި ރަމީޒު އަދާކުރާ ދައުރެވެ.
އެކްސިޑެންޓްވި ރޭ ވެސް ރަމީޒު, އޭނާގެ ކުދީންނަށް އެ ކުދީން އެންމެ ބޭނުންވާ ގޮތަށް ނޫޑްލްސް ތައްޔާރުކޮށް ދިނެވެ. އެ ކުދީން ކައި ނިމެންދެން އުފާވެރި ވަގުތުތަކެއް ހޭދަކުރި އެވެ. އެކްސިޑެންޓްވީ އޭގެ ފަހުންނެވެ.
ބަލަންޖެހޭ ވަރަށް ނުބަލާ އަދި އެހާމެ ނުރައްކާތެރިކޮށް ދުއްވުމުގެ ސަބަބުން މިއަދު ރަމީޒުގެ އެ އުފާވެރި އާއިލާ ފުން ހިތާމައެއްގެ ތެރެއަށް ވެއްޓުނީ އެވެ. ކުށެއްނެތި ތިން ކުދީން ބިކަވީ އެވެ. އުފާވެރި އާއިލާއެއް ރޫޅުނީ އެވެ.
މިއަދު އެންމެންވެސް ކުރަނީ މި ސުވާލެވެ. ރަމީޒު ނިޔާވުމުގެ ޒިންމާ ނަގާނީ ކާކު ހެއްޔެވެ. މިއީ ހަމަ "އޯކޭ" ވެގެން ތިބެންވާނެ ކަންކަން ހެއްޔެވެ.
ނުރައްކާތެރިކޮށް ދުއްވާ ޒުވާނުން މިއަދުވެސް ވަރަށް ގިނަ އެވެ. އެހެން މީހުންގެ ފުރާނައަށް އެއްވެސް ވިސްނުމެއް ނެތި ބާރު ސްޕީޑްގައި ދުއްވުން ކޮންޓްރޯލް ކުރެވޭ ގޮތެއް ނުވެ އެވެ. މިހާތަނަށް މިފަދަ އެކްސިޑެންޓްތަކުގައި އެތައް ބަޔަކު އަޅުގަނޑުމެންނާއި ވަކިވެ ހިނގައްޖެ އެވެ. ރަމީޒު ފަދަ ކުށެއްނެތް އެތައް ބައެކެވެ. އެފަދަ އެތައް އާއިލާއެއް ބިކަވެއްޖެ އެވެ.
ބައެއް މީހުން ނުކުޅެދުންތެރި ކަމުގެ ހާލަތުގައި ދުވަސްތައް ދަނީ ގުނަމުންނެވެ. ޒުވާން އުމުރުގައި އެފަދަ ހާލަތެއް މެދުވެރިވެ އާއިލާއަށް ބުރައަކަށްވީ ކަމުގެ އިހްސާސް ކުރެވި އެ ނިކަމެތި ކަމުގެ މައްޗަށް ނަފްސާނީ ބަލި އިތުރުވެ އެތައް ވޭނެއް ތަހަންމަލު ކުރަމުންދާ މީހުން މިއަދުވެސް ދުނިޔޭގައި އެބަ ތިއްބެވެ. އެ މީހުންގެ އެއްވެސް ކުށެއް ނެތި އެވެ. ބަލާ ނުލައި ނުރައްކާތެރިކޮށް ދުއްވި މީހުންގެ ސަބަބުންނެވެ.
Advertisement
This content is created and paid for by advertisers and does not involve Voice Journalists
